90-იანებში დაწყებული ბიზნესი - ბრენდად ქცეული “დიო”

ფარდა-ჟალუზების მწარმოებელი კომპანია "დიო" ქართულ ბაზარზე 1996 წელს გამოჩნდა. მანამდე იყო 2-წლიანი დაუღალავი მუშაობა და ბევრი დაბრკოლება კომპანიის ჩამოსაყალიბებლად. "დიო" საოჯახო ბიზნესია 21 წლიანი ისტორიით, რომელიც ირმა დაუშვილმა მის და-ძმასთან თამაზ დაუშვილთან და თამარ დაუშვილთან ერთად შექმნა. ამ დროის განმავლობაში კომპანიამ არაერთი რთული პერიოდი გამოიარა, თუმცა, მოახერხა ბაზარზე დამკვიდრება და რაც მთავარია, ნდობის მოპოვება ქართველ და უცხოელ პარტნიორებს შორის, რაც, როგორც ბიზნესმენები ხშირად აღნიშნავენ, ერთ-ერთი ყველაზე რთული საკითხია ბიზნესის წარმოებისას.

დღეს "დიო" უკვე ბრენდია, რომელსაც გამოცდილების გაზიარება სხვა კომპანიებისთვის სურს, ამისთვის კი კომპანია "თიბისი ბანკისა" და "ჯეოსელის" ბიზნესდაჯილდოებაში იღებს მონაწილეობას. 3 თანამშრომლით და ერთი ოფისით დაწყებული ბიზნესი დღეს გუნდის 150 წევრს და 4 ფილიალს აერთიანებს. კომპანიის ისტორიაზე, განვითარებასა და სფეროში არსებულ პრობლემებზე კომპანიის გენერალური დირექტორი და ერთ-ერთი დამფუძნებელი ირმა დაუშვილი საუბრობს: 

კომპანია “დიო” 1996 წელს დაარსდა. ეს იყო ერთ-ერთი ყველაზე რთული პერიოდი საქართველოს უახლოეს ისტორიაში, როგორც ეკონომიკური, ისე პოლიტიკური და სოციალური მიმართულებით. რა იყო მოტივაცია ჩამოგეყალიბებინათ საყოფაცხოვრებო პროდუქტების მწარმოებელი კომპანია, რომელმაც, ფაქტია, გაამართლა? გასულ წელს “დიოს” 20 წელი შეუსრულდა... 

მოტივაცია იმ პერიოდისათვის ყველას ერთი ჰქონდა, რთული ეკონომიკური სიტუაციიდან თავის დაღწევა, მაშინ როდესაც დასაქმების ინსტიტუტი არ არსებობდა. გაუქმდა სამუშაო ადგილები და მოგვიწია ახლის ძებნა და შექმნა. ასე, გაჩნდა “დიოს” დაარსების იდეა. ამას გარდა, არსებობდა სხვა პატარა წინაპირობებიც. 

ვინ არიან თქვენი მომხმარებლები - სასტუმროები, სამშენებლო კომპანიები, ფიზიკური პირები? 

ჩვენი პროდუქტი საინტერესოა თითქმის ყველა სეგმენტის მომხმარებლისათვის, როგორც სახელმწიფო სტრუქტურებისათვის, ასევე, ბანკებისათვის, სასწავლო დაწესებულებებისათვის, კერძო კომპანიებისა და ფიზიკური პირებისთვის. 

წლებთან ერთად თქვენი მომსახურების სერვისი და პროდუქციის ასორტიმენტი გაიზარდა. რისი შეძენა და რა მომსახურების მიღება შეუძლია მომხმარებელს “დიოში” დღეს? 

დღესდღეობით კომპანია “დიო” სთავაზობს მომხმარებელს 60-ზე მეტი დასახელების კარ-ფანჯრებისა და მზისგან დამცავი სისტემების მრავალფეროვან არჩევანს; რომელთაგან დიდი ნაწილი ექსკლუზიურია და ვყიდით, როგორც საქართველოს მასშტაბით, ასევე ექსპორტზე მეზობელ ქვეყნებში. ესენია: ალუმინისა და მეტალოპლასტმასის კარ-ფანჯრები, ფარდა-ჟალუზების 12 სახეობა, მწერებისაგან დამცავი ბადეების 7 სახეობა, ტენტები / თვითრეცხვადი ტენტები, პერგოლა, ფრანგული გასაჭიმი ჭერი, შემინვის სისტემა, ფასადის საჩრდილობელი სისტემები, ქოლგა, გარე დამცავი ჟალუზები, ჭიშკარი და ჭიშკრის მართვა და ა.შ.

საიდან შემოდის ნედლეული და სად იწარმოება პროდუქციის ძირითადი ნაწილი?

1997 წლის აპრილიდან კომპანია ძირითად პროდუქციას აწარმოებს თბილისში. ძირითადი ნედლეული შემოდის ევროპის სხვადასხვა ქვეყნიდან, კერძოდ: გერმანია, იტალია, პოლონეთი, ესპანეთი... 

საქართველოში ბაზრის რა წილი გიჭირავთ და პროდუქციის ექსპორტი სად ხდება? 

21 წლიანი მუშაობის შემდეგ “დიოს” ჟალუზების ბაზრის 65% უჭირავს. რაც შეეხება ექსპორტს, კომპანიის პროდუქცია ორ მეზობელ ქვეყანაში უკვე იყიდება, ესენია სომხეთი და აზერბაიჯანი. თუმცა, ბაზრის დივერსიფიკაციაზე ფიქრობთ და გვსურს, “დიოს” პროდუქცია სხვა მეზობელ ქვეყნებშიც გავიტანოთ. 

რა არის თქვენი პროდუქციის უპირატესობა? 

ჩვენს კომპანიას აქვს საკმაოდ გრძელი ღირებულებათა ჯაჭვი დაწყებული ნედლეულის შერჩევით, იმპორტით, დასაწყობებით, წარმოებით, ინსტალაციით და გაყიდვების შემდგომი სერვისით - მომხმარებელს აქვს შესაძლებლობა შეიქმნას კომფორტი და ინოვაცია სახლში და გარეთ. 

კომპანიას მოუწია ბიზნესის დაწყება საკმაოდ რთულ პერიოდში, ამას მოჰყვა 2000-იანი წლების ბოლოს მსოფლიო ეკონომიკური კრიზისი და 2008 წლის ომი საქართველოში. ამ 20 წლის განმავლობაში ყველაზე რთული პერიოდი თქვენთვის როდის იყო? 

ყველაზე რთული პერიოდი მაინც ალბათ 1995-1996  წლები იყო.  ,,დიო” -ამ სახელით  კომპანია  საქართველოს ბაზარზე შემოვიდა 1996 წელს.  მანამდე იყო რთული 1994-1995, არ იყო ელექტრო ენერგია, რთული იყო კომუნიკაცია სხვა ქვეყნებთან, ასევე, ძნელი იყო ტრანსპორტირება, საბანკო სექტორიც ჩამოყალიბების პროცესში იყო, არც საგადასახადო სისტემა იყო დახვეწილი, პრობლემები იყო საბაჟოზეც, არც ჩვენ გვქონდა ბიზნეს გამოცდილება, თუმცა, ძალიან დიდი იყო მოტივაცია, ვნერგავდით სიახლეს და ვიბრძოდით საკუთარი ბიზნესის დამკვიდრებისათვის. 

კომპანია “თიბისი ბანკისა” და “ჯეოსელის” ბიზნეს დაჯილდოებაში იღებს მონაწილეობას. რატომ გადაწყვიტეთ დაჯილდოებაში მონაწილეობის მიღება და რას ელოდებით? 

ჩვენი ინფორმაციით, ეს კონკურსი გასულ წელს დამწყები ბიზნესისთვის იყო, ვფიქრობ ახლაც ბევრი ახალბედა ორგანიზაცია მიიღებს მონაწილეობას. გვინდა, კოლეგებს გავუზიაროთ  კომპანია ,,დიო”-ს გამოცდილება: როგორ დაიწყო 21 წლის წინ ოჯახის სამმა წევრმა ნულოვანი კაპიტალით ბიზნესი და როგორ შეძლო ამ რთულ პერიოდში ქართული ბრენდის შექმნა, როგორი დიდი მნიშვნელობა აქვს მომხმარებელთან შემოქმედებით ურთიერთობას და რამდენად მნიშვნელოვანია სტაბილურობა ბიზნესში, რომ კომპანიამ დიდხანს იარსებოს ბაზარზე. აი, ეს არის ის ძირითადი აზრი, რატომ გადავწყვიტეთ ამ კონკურსში მონაწილეობა. 

რა არის ის ძირითადი პრობლემები, რომლებსაც დღეს ბიზნესი აწყდება? 

სამწუხაროდ, წლები გავიდა და კვლავ არის პრობლემები ბიზნესში. ისევ გამოვყოფდი საკანონმდებლო ხარვეზებს, არ არსებობს სამშენებლო ნორმები და არ ექცევა ყურადღება ხარისხის კონტროლს, როგორც სამშენებლო სფეროში, ასევე სხვა სფეროებში. ქვეყანაში არასტაბილური პოლიტიკური სიტუაცია მოქმედებს ბიზნესის განვითარებაზე და,  რა თქმა უნდა არასტაბილური სავალუტო კურსი. 

სამომავლო გეგმებზე რა შეგიძლიათ გვითხრათ? 

ბოლო წლებში საკმაოდ გაფართოვდა ჩვენი ასორტიმენტი. დღეისათვის ვფიქრობთ გავაფართოვოთ ალუმინის წარმოება, რათა უფრო სწრაფად შევძლოთ საინტერესო და ორიგინალური პროექტების დაწყება და განვითარება.

დიო ბიზნესდაჯილდოება თიბისი ჯეოსელი

წინა სტატია

Nenskra Hydro Seeks A Provider Of English Language And Computer Skills
20 ოქტომბერი, 2017

შემდეგი სტატია

წინანდალი: მომაჯადოებელი საღამო კახეთში
21 ოქტომბერი, 2017
რომელი სახელმწიფო უწყებების დაფინანსება იზრდება 2018 წელს
საქართველო | ოქტ, 02, 2017
ქართული ბიზნესის #1 არჩევანი
კომპანიები | ოქტ, 19, 2017
Lifestyle Changer
Forbes Georgia in English | ოქტ, 16, 2017
Forbes Georgia in EnglishForbes WomanForbes Banker
მილიარდერების რეიტინგი - Real Time
იხილეთ ყველა