შვიდი ჩვევა ნაყოფიერი სამუშაო კვირისათვის

შვიდი ჩვევა ნაყოფიერი სამუშაო კვირისათვის

სენდი თითქმის ყოველდღე 40 წუთის დაგვიანებით შერბის სამსახურში. ხელში ყავით სავსე ერთჯერადი ქაღალდის ჭიქა უკავია. ბუზღუნით შედის თავის კაბინეტში, მიიჯახუნებს კარს, არ პასუხობს ელექტრონულ ფოსტაზე მოსულ შეტყობინებებს და ტელეფონის განუწყვეტელ ზარებს, ვიდრე ლანჩის დრო არ მოვა ან მისი ცხოვრება არ დალაგდება.

ყველა სამსახურში მოიძებნება ერთი სენდი. იგი არაორგანიზებული, დაბდურა და იმედგაცრუების განსახიერებაა. მისი ყოველდღიური ჩვევები (ან ჩვევების არქონა) აფერხებს მის წინსვლას და ასევე მის გარშემომყოფთა პროდუქტიულობას, იმიტომ რომ სენდი მუდმივად აგვიანებს ან არ ყოფნის მოთმინება. რა უნდა ვქნათ, რომ არ გადავიქცეთ სენდიდ? სცადეთ ქვემოთ ჩამოთვლილი 7 ნაცადი ჩვევა, რომელსაც ყველა პროდუქტიული გუნდი და ლიდერი იყენებს იმისათვის, რომ უკეთესი სამუშაო კვირა ჰქონდეთ. ამ ჩვევების სწავლა და შესრულება მხოლოდ ერთ წუთს წაგართმევთ, მათ ეფექტიანობას კი მალევე იგრძნობთ.

1. შექმენით საკუთარი რიტუალი

ყველაზე პროდუქტიულ ადამიანებს ერთი საერთო ჩვევა აქვთ. ეს არის მათი დილის რიტუალი. არა აქვს მნიშვნელობა, თუ რას წარმოადგენს ეს რიტუალი: ვარჯიშს, ყავის დალევას, გაზეთის წაკითხვას თუ სამსახურში გზად მუსიკის მოსმენას. მთავარია, რომ ისინი ყოველ მზის ამოსვლას ერთი და იმავე რიტუალით ეგებებიან. ჩატარებულმა კვლევამ აჩვენა, რომ რიტუალის გამეორებას შეუძლია დასწიოს თქვენი სტრესის დონე და ფსიქიკურად შეგამზადოთ მომავალი სამუშაო დღისათვის. ასე რომ, შექმენით საკუთარი დილის რიტუალი, რომელიც ძალიან გეყვარებათ. თქვენ მზად იქნებით ყოველი ახალი სამუშაო დღისათვის იმისდა მიუხედავად, თუ როგორ ადრიანად დარეკავს თქვენი მაღვიძარა.

2. იყავით მიზანზე ორიენტირებული

რატომ აკეთებთ იმას, რასაც აკეთებთ? რამდენად გეხმარებათ თქვენი ამჟამინდელი პოზიცია თქვენი პირადი და პროფესიული მიზნების მიღწევაში? რამდენად აფასებენ საერთო საქმეში თქვენ მიერ შეტანილ წვლილს გუნდის წევრები? შეგაქვთ თუ არა თქვენი მუშაობით წვლილი კომპანიის წარმატებაში?

ვიდრე სამსახურში წახვალთ, ჩამოწერეთ პასუხები აღნიშნულ კითხვებზე და ეს პასუხები თან წაიღეთ. როდესაც საქმე არც ისე კარგად მიდის ან თავს იმედგაცრუებულად გრძნობთ, გადახედეთ თქვენს პასუხებს იმისათვის, რომ აიმაღლოთ მოტივაცია და საბრძოლო შემართება. შეახსენეთ საკუთარ თავს, თუ რატომ არის თქვენი შესანიშნავი მუშაობა ესოდენ მნიშვნელოვანი თქვენი გუნდის წევრებისა და კომპანიისათვის.

3. ისწავლეთ დაგეგმვა

იმისათვის, რომ სწორად გადაანაწილოთ თქვენი დრო, აუცილებელია გეგმის შედგენა და ამ გეგმით ხელმძღვანელობა. დაგეგმეთ შეხვედრები, დღეში გარკვეული დრო გამოყავით წერილებზე პასუხის გასაცემად და პროექტების შესადგენად. და რაც ყველაზე მთავარია, გამოყავით დრო შესვენებისათვის. ნაყოფიერი თანამშრომლები ყოველი 52 წუთის მუშაობის შემდეგ 17 წუთით შესვენებაზე გადიან. შეიძლება ეს ცოტა ზედმეტად მოგეჩვენოთ, მაგრამ მთელი კვირის განმავლობაში, ორიოდე საათი მაინც გამოყავით შესვენებისთვის. მცირეოდენი გონებრივი პაუზა ზრდის კონცენტრაციის უნარს და, შესაბამისად, თქვენ მთელი კვირის განმავლობაში უფრო ნაყოფიერად შეძლებთ მუშაობას.

4. გამოხატეთ მადლიერება

კიდევ ერთი რამ, რაც აუცილებლად უნდა ჩართოთ თქვენს გეგმაში და გამოყოთ ამისათვის დრო, არის მადლიერება კარგი მუშაობისათვის. დაფასება უპირველესი მოტივაციაა, ის განაპირობებს თანამშრომლების მუშაობის პროდუქტიულობას და ასევე არის სამსახურში ბედნიერი ატმოსფეროს მთავარი ინდიკატორი. ყველას სიამოვნებს, როდესაც მათ მიერ შეტანილ წვლილს აფასებენ. თქვენ თავად მიეცით მაგალითი სხვებს და ყოველ კვირას გამოხატეთ თქვენი მადლიერება და დაფასება რომელიმე გუნდის წევრის მუშაობის თაობაზე. შეგიძლიათ უბრალოდ მადლიერების ბარათი დაწეროთ ან გუნდის რომელიმე წევრის მაგიდასთან მიხვიდეთ და უთხრათ, თუ როგორ აფასებთ მის კარგ მუშაობას. მერწმუნეთ, თქვენს საქციელს ტალღისებრი რეაქცია მოჰყვება და მთელ თქვენს გუნდსა და ორგანიზაციაში მუშაობის პროდუქტიულობა შესამჩნევად გაიზრდება.

5. აქციეთ თქვენი ჯანმრთელობა პრიორიტეტად

წესრიგში მოიყვანეთ საკუთარი ჯანმრთელობა და საღი აზრიც დაგიბრუნდებათ. საღი აზრი კი თავად გიკარნახებთ, რომ უძილობა ადუნებს თქვენს კრეატიულ და ანალიტიკურ აზროვნებას. ფიზიკური ვარჯიში, დატენიანება და ჯანმრთელი კვება დადებითად მოქმედებს თქვენს პროდუქტიულობაზე. Neuro Leadership Institute-ის მეცნიერებათა დოქტორი ჯოშ დევისი გვირჩევს, რომ ყოველ სამუშაო დღეს შევასრულოთ მსუბუქი ფიზიკური ვარჯიში. ამგვარი ვარჯიში ხელს უწყობს თქვენს პოზიტიურ განწყობას და აუმჯობესებს თქვენს საერთო გონებრივ შესაძლებლობებს. კარგად მოეპყარით საკუთარ სხეულს და სულ მალე თქვენში დამალულ პროდუქტიულობას აღმოაჩენთ.

6. ისაუბრეთ გასაგები ენით

არაფერი ისე არ აფერხებს ნაყოფიერ მუშაობას, როგორც არასწორი კომუნიკაცია. მართალია, საკუთარი თავი ყველას ძალიან კარგი კომუნიკატორი ჰგონია, მაგრამ ამ ჩვევის გაუმჯობესება არავის აწყენს. ეცადეთ, თქვენი ელექტრონული ფოსტით გაგზავნილი წერილები შეძლებისდაგვარად ლაკონიური იყოს. ეცადეთ, თავი აარიდოთ მეტყველებაში ყველაზე გავრცელებულ შეცდომებს, ისწავლეთ საკუთარი აზრების გარკვევით გადმოცემა და ნაკლებ დროს დახარჯავთ გამეორებასა და განმარტებებზე, თან მუშაობისთვისაც მეტი დრო დაგრჩებათ.

7. გამოდით ოფისიდან

ზოგჯერ ყველა ზემოთ ჩამოთვლილ რჩევას ასრულებთ, მაგრამ თქვენი მუშაობა საკმარისად ნაყოფიერი მაინც არ არის. ეს იმიტომ ხდება, რომ სამსახური სავსეა ყურადღების გამფანტავი თანამშრომლებით, უაზრო შეხვედრებით და ზოგჯერ იქ არცთუ იდეალური სამუშაო პირობებია შექმნილი. არავის გაჰკვირვებია, როდესაც FlexJobs-ის ბოლო დროს ჩატარებულმა გამოკითხვამ აჩვენა, რომ თანამშრომელთა 76% უფრო ნაყოფიერად მუშაობს ოფისის გარეთ. ბევრმა განაცხადა, რომ მათთვის ყველაზე სასურველი სამუშაო გარემო არის სახლი ან კაფეტერია მეტწილად იმის გამო, რომ ოფისში გონების გამფანტავი უამრავი ფაქტორია. ასე რომ, თუ თქვენ საათობით ზიხართ თქვენს კაბინაში, სცადეთ ადგილის შეცვლა ოფისშივე ან თუ თქვენი სამსახური იძლევა ამის საშუალებას, ისარგებლეთ სახლში მუშაობის პოლიტიკით. შესაძლოა აღმოაჩინოთ, რომ გაზრდილი პროდუქტიულობა უბრალოდ სამუშაო გარემოს შეცვლით არის შესაძლებელი.

ეს ჩვევები იმდენად მარტივია, რომ განმარტებასაც არ საჭიროებენ. თუ შექსპირის ციტირებას მოვახდენთ, ამ ჩვევების „სწავლას სჭირდება მხოლოდ ერთი წუთი, ხოლო დაუფლებას – მთელი ცხოვრება”. სწორედ ამიტომ ყველაზე პროდუქტიული ადამიანები ყოველდღიურად ცდილობენ ამ ჩვევების გამომუშავებას და თუ თქვენც დაეუფლებით მათ, თქვენც მათსავით ნაყოფიერი თანამშრომელი გახდებით.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *