გამოწვევები და შესაძლებლობები

გამოწვევები და შესაძლებლობები

351 კვალიფიციური თანამშრომელი, 1.3 მილიონი ერთგული მომხმარებელი, ბაზარზე მესამე და შესაძლებლობები, რომლებიც ბილაინმა ახალი ენერგიით უნდა აითვისოს.

ღია სივრცე. შესასვლელიდან ბოლომდე. ყველა მუშაობს – კლავიატურის ხმა, ბევრი კომპიუტერი და ბევრი სინათლე. მოსაცდელიდან ამ ყველაფერს როგორც ხელის გულზე ისე ხედავ. მერე რა – რომ შეიძლება პრეტენზიული კლიენტი იყო ან კონკურენტი კომპანიიდან დასაზვერად მოსული წარმომადგენელი – აქ დასამალი არაფერი აქვთ. ყურადღებით მოგისმენენ, ყველა კითხვაზე პასუხს გაგცემენ და მიუხედავად იმისა, რომ ყველაზე დეფიციტური მათ საქმეში ნამდვილად დროა, სწრაფ განვითარებას წამითაც რომ არ ჩამორჩნენ, სწორედ ამ დროის თქვენზე დახარჯვა არ დაენანებათ არც ერთი წამით.

ეს ვიონ საქართველოს – იგივე ბილაინის – სათაო ოფისია. მას 2017 წლის აპრილიდან ანდჟეი მალინოვსკი ხელმძღვანელობს. მას სიმბოლურად მიაჩნია ის, რომ საქართველოში სწორედ ვიონ საქართველოს და არა მობიტელის ხელმძღვანელია. მისი თქმით, დღეს კომპანია აღარაა ფოკუსირებული მხოლოდ სატელეფონო კომუნიკაციაზე და სახელწოდების ცვლილებაც ამას ასახავს.

ანდჟეის ოთახი საერთო სივრცისგან შუშის კედლით იყოფა, მაგრამ მხოლოდ იმიტომ, რომ მთელი ოფისი ერთხმად შეთანხმდა ამაზე. ეს შუშის კედელი არავისთვის წინაღობა არ არის, რადგან უფროსს ურჩევნია, თავისი თანამშრომლების გრაფიკს თავად მოერგოს და არა – პირიქით, ამიტომ თუ ვინმეს ნამუშევრის გაზიარება სურს, ან რჩევის კითხვა ან უბრალოდ, მისალმება – ლოდინი არ სჭირდება.

გამარჯობას გამართულად მეუბნება, თუმცა, როცა უცხოელის მიერ წარმოთქმულ ტრადიციულ მისალმებას რამდენიმე ფრაზას ისევ ქართულად აბამს, ვხვდები, რომ სადღაც მისი ‘შპარგალკა“ უნდა იმალებოდეს. ასეც არის. კედელზე ყველა საჭირო ფრაზა გამოკრული აქვს. ქართულს ენთუზიაზმით სწავლობს, თუმცა რთულ ენად მიიჩნევს – იმაზე რთულადაც კი, ვიდრე მშობლიური – პოლონურია.

ანდჟეი  წარმოშობით პოლონელი ბიზნესმენია, რომელსაც პირველადი მოხმარების საქონელის მწარმოებელი და ონლაინ ვაჭრობის კომპანიების, e-commerce ტიპის ბიზნესების მართვის 17 წლიანი გამოცდილება აქვს. მათ შორის, ხელმძღვანელობდა სტარტაპებისა და მობილური აპლიკაციების დანერგვა-განვითარების პროცესებს.

ბილაინში სწორედ ეს გამოცდილება და სიახლეების მუდმივი დახვეწის ხედვა მოიტანა. მისი მართვის პირობებში – ბილაინი გახდა პირველი, ვინც დანერგა ინდივიდუალური ინტერნეტ პლატფორმა ვიონი, ვინც მობილური ინტერნეტის მოხმარების კუთხით 2017 წლის მაისის მონაცემებით, საკუთარ აბონენტებში, რეკორდული – 127%-იანი ზრდა აჩვენა და, როგორც ანდჟეი აანალიზებს, ამ ტიპის ზრდის ტემპით ბაზარზე უპირობო ლიდერად იქცა.

ანდჟეი მალინოვსკის მთავარი თვისება, რომელიც მასთან საუბრისას სულ თვალში გხვდება ის არის, რომ რეალობას თვალს უსწორებს – არ მალავს, რომ ისედაც მცირე ბაზარზე მესამე პოზიცია საუკეთესო მოცემულობა არ არის, თუმცა ზუსტად იცის, რა შეიძლება გაკეთდეს იმისთვის, რომ დღეს არსებული 1.3 მილიონი მომხმარებელი კმაყოფილი იყოს და მათი მომსახურების ხარისხი, ტემპი თუ მრავალფეროვნება მუდმივად იზრდებოდეს.

ანდჟეის ფილოსოფია ასეთია – შეუძლებელია განვითარება ვინმეს ან რამეს დააძალო, უბრალოდ, არ უნდა გამოგეპაროს ის შესაძლებლობები, რამაც ეს პროცესი შეიძლება ბუნებრივად დააჩქაროს.

ინტერვიუს სწორედ გამოწვევებზე საუბრით ვიწყებთ. თუმცა მალევე ვხვდები, რომ ენთუზიაზმით აღსავსე ადამიანთან მხოლოდ გამოწვევებზე საუბარი საკმარისი არ არის, ამიტომ პირველი კითხვის ფორმულირებას თავადვე ვცვლი.

მოდით, მხოლოდ გამოწვევებზე კი არა – გამოწვევებსა და შესაძლებლობებზე საუბრით დავიწყოთ ჩვენი ინტერვიუ – სადაც ერთს ხედავთ, ალბათ მეორეც იქვეა – ზოგჯერ შეიძლება, ოდნავ რთულად შესამჩნევი…

მადლობა, საკითხის ასე დასმისთვის. ჩვენ ზუსტად ასე ვხედავთ ჩვენ გარშემო ყველაფერს. არავისთვის უცხო არ არის, რომ ჩვენ სპეციფიკურ სიტუაციაში ვართ – ისედაც მცირე ბაზარზე მესამე ადგილი გვიჭირავს. მაგრამ, როგორც თქვენც ამბობთ, ეს გამოწვევაც არის და შესაძლებლობაც. ვერცერთ ბიზნესში ვერ იქნები ბაზრის 100%-იანი წილის მფლობელი, მეტიც – 40%-ის მფლობელიც თუ ხარ, მაშინ უკვე საკმაოდ დიდი ხდები ბაზრისთვის და შემდეგ, სულ სხვა მექანიზმები ერთვება. ამიტომ, ჩემი მიდგომა ასეთია, სანამ ბაზრის 100%-ს არ ფლობ, ყოველთვის გაქვს ადგილი ზრდისთვის. ამ ეტაპზე ჩემი ყოველდღიური საქმიანობის მთავარი ამოსავალია, რაც შეიძლება კარგად მოვემსახუროთ ჩვენს 1.3 მილიონ მომხმარებელს. და ამას ემსახურება ჩვენი 351 თანამშრომელი. გამიმართლა, რომ ჩემ გვერდით მხოლოდ პროფესიონალები არიან და როგორც სტივ ჯობსმა თქვა: „აზრი არ აქვს, დაიქირავო ჭკვიანი ხალხი და უთხრა, რა აკეთონ; უფრო ჭკვიანურია, მათ გითხრან, რა აკეთო“. ჩემი მიდგომაც ასეთია. და ეს მიდგომა ამართლებს.

მაგალითად, გუნდური მუშაობის შედეგად, ჩვენი 1.3 მილიონი მომხმარებელი, ერთ ღამეში, სხვადასხვა IT სისტემებიდან ისე გადავიყვანეთ მხოლოდ ერთ სისტემაზე, რომ არც ერთი მათგანი არ დაგვიკარგავს. ჩვენი გამოცდილებით ჩვენი ჯგუფის  კოლეგებიც დაინტერესდნენ, მაგალითად, ალჟირიდან, სადაც 17 მილიონი მომხმარებელი ჰყავთ – იგივე სქემა გაიმეორეს და კლიენტების რაოდენობის მიუხედავად, სისტემამ მათთვისაც წარმატებით იმუშავა. დაგვირეკეს და მადლობა გადაგვიხადეს. მათთვის ეს გზა ჩვენ გავკვალეთ.

ამდენად, ჩემი, როგორც შედარებით ახალი უფროსის ამოცანაა, ჩემი გუნდი სამსახურში სიხარულით მოდიოდეს, თავისი შესაძლებლობების თუ ემოციური ინტელექტის მაქსიმუმს დებდეს საქმეში და მომხმარებლებისთვის ქმნიდეს კომპანიას, რომელიც მათ უსმენს. მშვენიერი სლოგანია – კომპანია, რომელიც გისმენს – იმდენად კარგი, რომ ყველა კედელზეც თავისუფლად გამოვაკრავდი, მაგრამ არ უნდა დაგვავიწყდეს, რომ ბევრისთვის მოსმენა პასიურ ქმედებად აღიქმება – თითქოს ისმენ და არაფერს აკეთებ. ჩვენი ამოცანაა მივიღოთ ბაზრის გზავნილები (კარგიც და ცუდიც) და შემდეგ შესაბამისად ვიმოქმედოთ, წინ წავიდეთ: დღეს შეიძლება კარგი ხარ, მაგრამ ხვალაც რომ კარგი იქნები, ამის გარანტია არ არსებობს.

რას ნიშნავს ეს წინსვლა უფრო კონკრეტულად, რა ამბიცია აქვს კომპანიას?

ჩვენი ბიზნესის უდიდესი ნაწილის დიჯიტალიზაცია – ეს არის დღეს ჩვენი მთავარი ამოცანა და ამბიცია. ეს იმას ნიშნავს, რომ გვინდა, ჩვენი მომხმარებელი სულ უფრო ხშირად იყენებდეს ონლაინ სერვისებს და მის მიერ ამ სერვისების გამოყენება იყოს მაქსიმალურად ადვილი და მოსახერხებელი.

ჩვენ ვართ ინდუსტრიაში, რომელმაც ბოლო 20 წლის მანძილზე, წარმოუდგენელი ცვლილებები განიცადა. მობილური ოპერატორები დიდ ფულს შოულობდნენ, რადგან ისინი იყვნენ ამ ინდუსტრიის პიონერები და ინდუსტრიაც თავის მხრივ, ყველაზე სწრაფად მზარდი და განვითარებადი იყო. მოულოდნელად ადამიანებს გაუჩნდათ შესაძლებლობა, დიდ მანძილებზე ელაპარაკათ საიდანაც უნდოდათ, ახალი ტექნოლოგიების წყალობით თითქმის შეუზღუდავად ესარგებლათ ინტერნეტით – 3G, 4G და დღეს უკვე ყველაზე ხმამაღალი აბრევიატურა ამ სფეროში 5G – და ეს იმის მიუხედავად, რომ ჯერ ერთი ბიზნეს ქეისიც კი არ გვინახავს მთელი მსოფლიოს მასშტაბით, რაც მიუთითებდა, რომ ეს ტექნოლოგიური გადაწყვეტა ინდუსტრიას ფულს მოუტანს. პროგრესი ძალიან კარგია და ჩვენც, ბუნებრივია, გვაქვს მოსაზრებები, როგორ ავითვისოთ ეს ახალი პოტენციალი, თუმცა ჯერ არ არის ცხადი, რამდენად  მომგებიანი იქნება 5G.

წინსვლა ჩვენთვის მომხმარებელთა იმ ჯგუფზე სრულად კონცენტრირებაა, ვინც შეიძლება ითქვას, ჩვენთან ერთად გაიზარდა. ამ ქვეყანაში ჩვენ ვიყავით პირველები, ვინც ბაზარზე 4G დავნერგეთ, 2015 წლიდან დღემდე 127%-ით გავზარდეთ მობილური ინტერნეტის მოხმარება და ამ მონაცემით, ბაზარზე უპირობო ლიდერები ვართ, ვნერგავთ სრულიად ახალ გამოცდილებას ვიონის სახით და ეს არ იქნება ერთადერთი სიახლე, რასაც ჩვენ მივმართავთ მომხმარებელთა ურთიერთობების ოფლაინიდან ონლაინ რეჟიმში გადასაყვანად.

ეს ნაწილობრივ სარისკო ამბიციაა, რადგან სხვადასხვა ტიპის მომხმარებლები გვყავს და მათ დიდ ნაწილს აშკარად უშუალო კომუნიკაცია ურჩევნია, მედიუმით გაშუალებულ კომუნიკაციას. მაგრამ მეორე მხრივ, ზოგიერთი გადაწყვეტილება უკვე მიღებულია და არა ჩემ მიერ, ან ჩვენი ჯგუფის სათაო ოფისის მიერ ამსტერდამში ან ჩვენი ციფრული ოფისის მიერ ლონდონში – არა, ეს გადაწყვეტილებები თავად 21-ე საუკუნემ მიიღო: სულ ბოლო მონაცემებით, სხვადასხვა მობილურებზე ჩამოტვირთული აპლიკაციების რაოდენობამ მხოლოდ შარშან 150 მილიარდს გადააჭარბა. თუ გავითვალისწინებთ მთელი მსოფლიო მოსახლეობის რაოდენობას, მე მგონი, ამ ამბავს ზედმეტი სიტყვა არც სჭირდება, თავისით ამბობს ყველა სათქმელს.

მობილურის ეკრანი ჩვენი გადმოსახედიდან უძრავი ქონების ტოლფასია – უნდა იბრძოლო იმისთვის, რომ ამ მცირე ფართობზე შენი აპლიკაცია მოხვდეს და რაც უფრო მარტივია ის მოხმარებისთვის, მით უფრო მეტია იმის შანსი, რომ უშუალო კომუნიკაცია თვით-მომსახურებაზე ორიენტირებული მობილური აპლიკაციების გამოყენებით ჩანაცვლდება. ეს ერთი მხრივ, კარგია, მომხმარებლისთვის, რადგან მისი ცხოვრება მარტივდება და მეორე მხრივ, კომპანიის მესვეურებისთვის – რადგან კომპანიის ღირებულება მათ შორის იმითაც განისაზღვრება, რამდენად არის განვითარებული და ხელმისაწვდომი ამ კომპანიაში თვით-მომსახურებაზე ორიენტირებული მობილური აპლიკაციები.

ამდენად, ეს ის სფეროა, სადაც მუდმივად შეიძლება განვითარება და წინსვლა. და ეს განვითარება არ გულისხმობს, აპლიკაციების უბრალოდ დამატებას ან ისეთი აპლიკაციების დამატებას, რომლებიც მომხმარებლისთვის არ მუშაობს. აპლიკაციები უნდა იყოს მარტივი და გასაგები – კარგი ხუმრობასავით: თუ მისი ახსნა გახდა საჭირო, ე.ი. ვერ მუშაობს.

რამდენად ადვილია ტექნოლოგიური სიახლეების კომუნიკაცია მოსახლეობასთან?

ეს ძალიან სწორი და სამართლიანი შეკითხვაა. ერთ მაგალითზე აგიხსნით. წლების წინ უკრაინაში ვმუშაობდი – ონლაინ მაღაზიას ვმართავდი, რომელიც ფეხსაცმელებს და აქსესუარებს ყიდდა. ეს სერვისი უკრაინაში დასავლეთ ევროპასთან შედარებით, საკმაოდ გვიან გაჩნდა. ამ მაღაზიის ამუშავების საწყის ეტაპზე დამისვეს ზუსტად იგივე კითხვა. ჩემი პასუხი ასეთი იყო: დასავლეთ ევროპას თუ შეხედავთ, ნახავთ, რომ ადამიანები ინტერნეტს აკითხავენ იმისთვის, რომ მეორე ნახევარი იპოვონ; იმისთვის, რომ ცხოვრებისეული რჩევა მიიღონ – მაშინ ინლაინ ფეხსაცმლის ან ტანსაცმლის ყიდვა როგორ შეიძლება იყოს უფრო გადაუჭრელი პრობლემა – თუკი ონლაინ ყველაზე მთავარ საკითხებს ჭრი, რატომ ვერ გადაწყვეტ ფეხსაცმლის ყიდვას, რომელსაც თუ არ მოგეწონება, ძალიან მარტივად დააბრუნებ? თქვენს კითხვას რომ ვუპასუხო, ჩემი მიდგომა ასეთია: დაძალება, თავს მოხვევა, თუნდაც განვითარების, არ ვარგა, არ მუშაობს. ტექნოლოგიების მიღებას თავისი ბუნებრივი ევოლუცია ახასიათებს – ზოგისთვის ეს უფრო ადვილია, ზოგისთვის – რთული.

მაგრამ ეს ბუნებრივი ევოლუცია თქვენ ფული გიჯდებათ – ასე არ არის?

დიახ, ასეა. მაგრამ საბოლოოდ, ეს ის რისკია, რომლის გაწევაც ღირს. ეს ის გამოწვევაა, რომელსაც ღირს, რომ უპასუხო და არსებობს მისი კონკრეტული საზომიც – ამონაგები ინვესტიციაზე (ROI). რაც უნდა ვილაპარაკოთ ჩვენ კომპანიის ღირებულებებზე, მომხმარებლებთან ჩვენს დამოკიდებულებებზე და ა.შ. – ეს ყველაფერი არ იქნება, თუ ჩვენ შემოსავალს არ მოვუტანთ ჩვენს მფლობელებს. ამიტომ ჩვენ მუდმივად უნდა დავაბალანსოთ ის მოთხოვნები, რაც შეიძლება მომხმარებელს ჰქონდეს ჩვენს მიმართ და ის ინტერესები, რაც შეიძლება კომპანიას გააჩნდეს ფინანსური თვალსაზრისით.

საქართველო და ზოგადად, მთელი ეს რეგიონი უპირატესობას ანიჭებს ინდივიდებს შორის კომუნიკაციას, მაგრამ ნაკლებად ინდივიდი არ ხარ, თუ მაგალითად, ე.წ. ჩეთით სარგებლობ. იმიტომ რომ საბოლოო ჯამში, ვინც ეს სისტემა მოიგონა, ვინც მას მართავს – ადამიანია. ჩვენ აქ ვსაუბრობთ და სადღაც ხელოვნურ ინტელექტს ხვეწენ – ეს ახლა, ამ წუთებში ხდება – ამდენად, ჩვენ ისღა დაგვრჩენია, რომ მომხმარებელს ავუხსნათ, რატომ არის თვით-მომსახურებაზე ორიენტირებული ონლაინ პლატფორმები უფრო მომგებიანი, დროის დამზოგველი, მარტივი მოსახმარად და უბრალოდ – 21-ე საუკუნე.

ჩვენთვის მნიშვნელოვანია ის უკუკავშირი, რასაც მომხმარებლისგან ვიღებთ – სულ ამას ვამბობთ, თუ რამე არ მუშაობს, თუ საკმარისად მოსახერხებელი არ არის, თუ საკმარისად სასარგებლო არ არის – გაგვაგებინეთ. ჩვენ მოგისმენთ.

აი, სწორედ ეს არის საინტერესო – რამდენად იღებთ ამ უკუკავშირს? ვფიქრობ, კულტურა აქაც მნიშვნელოვან როლს ასრულებს – ზუსტად ისე, როგორც თქვენ თქვით, სულ ცოტა ხნის წინ, ტექნოლოგიების ათვისებასთან დაკავშირებით. ჩემი დაკვირვებით, საქართველოში ადამიანებს უჭირთ კონსტრუქციული კრიტიკის ფორმულირება.

პრინციპში, ეს საკითხიც შეგვიძლია მთავარ ჭრილში განვიხილოთ – უფრო გამოწვევაა თუ უფრო შესაძლებლობა. სიმართლე გითხრათ, ჩვენი დაკვირვებები თანხვდება: ადამიანებს ურჩევნიათ ქოლცენტრში დარეკვა და მოხმარების წესებში ხანგრძლივად გარკვევა, ვიდრე ღიად იმის თქმა, რომ რაღაც არც ისე მარტივია, უკეთ შეიძლება გაკეთება და ა.შ. ღიად ამ ტიპის რჩევებს იშვიათად ვიღებთ.

თუმცა, ჩვენ ვერგებით ჩვენს მომხმარებლებს, მათი კომუნიკაციის სტილს და ვიგონებთ ისეთ აპლიკაციებს, რომლებიც მათ კომფორტის ზონიდან ხელოვნურად კი არ გამოიყვანს, არამედ პირიქით, მეტ კომფორტს შესთავაზებს. ამის კარგი მაგალითია, ქოლ ცენტრში დარეკვის შემდეგ, ხაზზე ლოდინის დრო. ჩვენ ძალიან შევამცირეთ ეს დრო – 20 წამამდე დავიყვანეთ. მაგრამ ქოლ ცენტრის ყველა თანამშრომელმა იცის, რომ მომხმარებელს დახმარების აღმოჩენის შემდეგ, აუცილებლად უნდა აუხსნას, რომ ამ ტიპის კომუნიკაცია სხვაგვარადაც შეიძლება დამყარდეს – მაგალითად, სპეციალური აპლიკაციის მეშვეობით, რის შემთხვევაშიც ლოდინის დრო იქნება – 0. გინდათ, ბალანსი შეივსოთ? – 3 დაწკაპუნება; გინდათ, აპლიკაციის მეშვეობით ფული სხვას გადაურიცხოთ? – 4 დაწკაპუნება; გინდათ, შეამოწმოთ რა თანხა გიდევთ ანგარიშზე? – 1 დაწკაპუნება. ლოდინის დრო – 0. არ გჭირდებათ ლოდინი. დროს მართავთ თვითონ. ადამიანთან არ საუბრობ, „საუბრობ“ შენს მობილურთან – აპლიკაციების მეშვეობით.

ამ მიმართულების განვითარება აუცილებელია კონკურენციის დივერსიფიცირებისთვის – ჩვენ თუ არ განვავითარებთ, სხვა იზამს. ეს სულაც არ ნიშნავს იმას, რომ თვით-მომსახურების განვითარების ხარჯზე, უახლოეს მომავალში ქოლ ცენტრებს დავხურავთ – ეს არ გამოვა: ყოველთვის იარსებებენ მომხმარებლები, რომლებიც ვერ აუწყობენ თვით-მომსახურების განვითარების ტემპს ფეხს – ჩვენ მათთვისაც უნდა ვიმუშაოთ, თორემ სხვა იმუშავებს მათთვის.

ვიონიც ამ დივერსიფიკაციის ნაწილია? მაინტერესებს, რა როლი აქვს ამ სიახლეს ბილაინის უფრო ფართო ხედვაში.

მოკლე პასუხია – დიახ. თუმცა ვიონ-ის განვითარების პრეისტორია იმით იწყება, რომ შევამჩნიეთ: მომხმარებლებმა შეწყვიტეს ერთმანეთთან რეკვა. უფრო სწორად, კი ურეკავდნენ ერთმანეთს, მაგრამ ვიბერის ან ვოთსაპის მეშვეობით და ამისთვის, არ იყენებდნენ მობილურის ხმოვან კომუნიკაციას. რა გამოვიდა? ხმოვანი სისტემების განვითარება მილიარდების და არა მილიონების საქმეა, რადგან სერიოზულ ინვესტირებას ითხოვს ინფრასტრუქტურაში – ჩვენ, მაგალითად, სანამ 4G მომსახურებით მოსახლეობის 90%-ს დავფარავდით, ძალიან დიდი ძალისხმევა, სამუშაო და ინვესტიცია გავიღეთ. იცით, რომ გადამცემების დამონტაჟებაზე დიდ გავლენას ახდენს რელიეფი და მოსახლეობაც ყოველთვის დადებითად არ ხვდება ამ პროცესს, მაგრამ ჩვენი მიზანი იყო, რომ ადამიანებს ჰქონოდა ვიდეოს ნახვის, ფეისბუქ ლაივის გაშვების თუ სოციალურ ქსელში დაპოსტვის შესაძლებლობა.

მთელი ჯგუფის დონეზე, დღეს ჩვენ გვაქვს იმხელა ინფრასტრუქტურა, რომ მსოფლიო მოსახლეობის დაახლოებით 10%-ს ვფარავთ. აქედან გაჩნდა კითხვა: თუკი ეს ინფრასტრუქტურა გვაქვს, მაშინ რატომ არ შევქმნათ ჩვენი საკუთარი სერვისი, რომელიც ვიბერს და ვოთსაპს კონკურენციას გაუწევს და ჩვენს შემოსავლებს არ შეამცირებს? შემდეგი კითხვა იყო – რით შეიძლება ვაჯობოთ ბაზარზე უკვე არსებულ მოდელებს? და ეს მნიშვნელოვანი კითხვაა, როცა შედიხარ ბიზნესში, რომელიც განვითარების უკვე საკმაოდ მაღალ სტადიაზეა.

ვიონ-ის ინდივიდუალური ინტერნეტ პლატფორმა მულტიკულტურული პროექტი გამოდგა. ლონდონის და საქართველოს გუნდები; ასევე უკრაინაც, სადაც ვიონ-ი უკვე კომერციული პროექტია, ერთად მუშაობენ პლატფორმის დახვეწაზე, მუდმივად მიმდინარეობს ბრეინშტურმინგი და ახალი იდეების მოფიქრება. შემდეგ ამ იდეების დატესტვა. ჩვენი მიზანია, ჯერ ჩვენს მომხმარებლებს შევთავაზოთ ეს სერვისი და თუ გაამართლებს, უკვე მერე ვიფიქროთ მის კომერციალიზაციაზე.

ჯერჯერობით ფაქტები ასეთია:

ვიონი საქართველო პირველები ვართ, ვინც ხელი მოკიდა ამ ტიპის პლატფორმის განვითარებას

მოხმარების თვალსაზრისით საუკეთესო შედეგები გვაქვს როგორც თვიურ, ისე ყოველდღიურ ჭრილში

რა არის ის კითხვები, რომელსაც ყველაზე ხშირად გისვამენ, როგორც ამ კომპანიის პირველ პირს?

ყველაზე რთული კითხვები ყოველთვის ბაზარზე კონკურენციას უკავშირდება. თუმცა აქაც – ჩვენი მთავარი ხაზი რომ არ დავარღვიოთ, ისევ გამოწვევებსა და შესაძლებლობებზე გავამახვილებ ყურადღებას.

არ არსებობს ქვეყანა, კონკურენციის გარეშე. კონკურენტები გვაიძულებენ უფრო კრეატიულები, მოქნილები, სწრაფები და ეფექტიანები ვიყოთ. თუ ისინი ერთი ნაბიჯით წინ იყურებიან, ჩვენ სამი ნაბიჯით წინ უნდა გავიხედოთ. როდესაც არ ხარ კმაყოფილი მიღწეული შედეგებით და ამას პოზიტიურად უყურებ – სწორედ ეს გაიძულებს განვითარდე და უკეთესი გახდე.

მომხმარებელთა მოთხოვნები თუ იცვლება დროთა განმავლობაში?

ხალხი უკვე დარწმუნდა, რომ მობილურით შეუძლიათ პრაქტიკულად ყველაფერი აკეთონ. თან მათი გადასაწყვეტია, მხოლოდ დედასთან დასარეკად გამოიყენებენ, ნაბიჯებს დათვლიან, ბანკის ფუნქციებს დააკისრებენ, დილის სამოტივაციო ციტატებით გააჯერებენ თუ რას იზამენ.

ან იქნებ ხმის ჩამწერად გამოყენება უნდათ, როგორც მე ვიყენებ ჩემს მობილურს ახლა..

ან იქნებ ფოტო ალბომის ფუნქციაა მათთვის მთავარი ან ვიდეოზარი – როგორც მაგალითად ჩემს შემთხვევაში, რადგან ასე თუ ვხედავ ჩემს ოჯახს, რომელიც სულ მენატრება. მარტივია: ადამიანები თვითონ გიბიძგებენ, შექმნა ისეთი პროდუქტები, რომლებიც მათ მოთხოვნილებებს მოერგება.

მოთხოვნის შექმნა არასდროს გიცდიათ? იქნებ ჯერ არ იცის ადამიანმა, რა უნდა…

რა თქმა უნდა, თუ ისეთ რამეს შესთავაზებ მომხმარებელს, რაც ცუდი ხუმრობასავით არ იქნება და ათასი განმარტება, ვიდეო გაკვეთილი და მეცადინეობა არ დასჭირდება, ამ სიახლეს აუცილებლად აიტაცებს. შეიძლება ოდნავ აცდენილი ანალოგიაა, მაგრამ მსოფლიო ჩემპიონატში წელს, ხორვატიამ დაამარცხა ინგლისი; თუმცა, ინგლისმა ბოლოს რომ მოიგო მსოფლიო ჩემპიონატი, ხორვატია როგორც ქვეყანა საერთოდ არ არსებობდა. ამით იმის თქმა მინდა, რომ ჩვენ გარშემო ძალიან ბევრი შესაძლებლობაა და არა მხოლოდ სილიკონის ველზე, შეიძლება აქაც – სულ ახლოს, ტექნოპარკში.

შევაჯამოთ ჩვენი საუბარი: სად ხედავთ თქვენს კომპანიას 2-3 წელიწადში?

პირველი – მინდა, რომ მომხმარებლებს მოვწონდეთ. მათ მოვწონვართ დღესაც  -ეს ვიცი, რადგან კმაყოფილებას ვზომავთ. მაგრამ მინდა ამაზე მეტად მოვწონდეთ, უფრო კმაყოფილები იყვნენ ჩვენი სერვისებით და იმაზე კმაყოფილებიც, ვიდრე ჩვენს კონკურენტებთან იქნებოდნენ.

მეორე – მინდა, რომ იმაზე მეტი მომხმარებელი უერთდებოდეს ბილაინს, ვიდრე ტოვებდეს მას. პოზიტიური სალდო ჩვენთვის ძალიან მნიშვნელოვანია. არ მიყვარს ადამიანების ტექნიკური ტერმინებით მოხსენიება – მაგალითად, როგორიც არის ბაზის გაზრდა. ჩვენ ვსაუბრობთ კონკრეტულ ცოცხალ ადამიანებზე, რომლებსაც თავიანთი მოთხოვნილებები აქვთ. მაგალითად, ჩემი მეუღლე სარგებლობს მობილურით – პოლონური კომპანიისთვის, ის ბაზის ნაწილია, ჩემთვის – ყველაზე მნიშვნელოვანი ადამიანი ჩემს ცხოვრებაში. სულ უნდა გვახსოვდეს, რომ ადამიანებთან გვაქვს საქმე, რომლებიც ვიღაცისთვის ყველაზე მნიშვნელოვანი ადამიანები არიან. ისინი მნიშვნელოვანნი არიან ჩვენთვისაც.

მესამე – მინდა, ჩემი გუნდი იყოს მოტივირებული და ესმოდეს, რომ მნიშვნელოვან საქმეს აკეთებს. მუდმივად ჰქონდეს იმის სურვილი, რომ თუნდაც, კვირა დღეს დამირეკოს და მითხრას, ახალი იდეა მაქვს, ხომ არ განვიხილოთ.

რომ შევაჯამო – მინდა, ეს კომპანია იყოს 350-ზე მეტი ბედნიერი თანამშრომლის კომპანია, რომლებიც ძალას არ იშურებენ, რომ 1.3 მილიონ მომხმარებელს კიდევ უფრო მეტად ბედნიერად აგრძნობინონ თავი.

ჩვენი საუბარი გამოწვევების და შესაძლებლობების იდენტიფიცირებით დავიწყეთ და ამითვე მინდა დავასრულო – ყველაზე დიდი გამოწვევა მაინც ის არის, რომ არსებობს მთელი რიგი შესაძლებლობები, რომლებიც ჯერ არავის შეუმჩნევია.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *