ევროპის ცენტრალური ბანკი მონეტარული პოლიტიკის გამკაცრებას გეგმავს

ევროპის ცენტრალური ბანკი მონეტარული პოლიტიკის გამკაცრებას გეგმავს

ევროპის ცენტრალური ბანკის პრეზიდენტის, კრისტინ ლაგარდის განცხადებით, მკვეთრად გაზრდილი ინფლაციის დონის საპასუხოდ, სავარაუდოდ, სექტემბერში მონეტარული პოლიტიკა გამკაცრდება და სადეპოზიტო განაკვეთი ნეგატიური, -0.5%-იანი ნიშნულიდან 0%-მდე გაიზრდება.

„ამჟამინდელი პერსპექტივიდან გამომდინარე, სავარაუდოდ, მესამე კვარტლის ბოლოსთვის ნეგატიური საპროცენტო განაკვეთის პოზიციიდან გამოსვლა მოგვიწევს“, – განაცხადა ლაგარდმა.

ნეგატიური საპროცენტო განაკვეთი, რომელიც ხელს უწყობს სესხის გაცემასა და ხარჯვას, ECB-მა 2014 წელს დააწესა, რაც რეგიონის წინაშე არსებული სუვერენული ვალის კრიზისით იყო განპირობებული.

გასულ თვეს ევროზონაში წლიური ინფლაციის დონემ 7.5%-იან ნიშნულს მიაღწია, რაც რეკორდულად მაღალი მაჩვენებელია.

ECB-ის პრეზიდენტის განმარტებით, თუკი საშუალოვადიან პერსპექტივაში ინფლაცია 2%-იანი ნიშნულის ფარგლებში დასტაბილურდება, საპროცენტო განაკვეთების ნეიტრალურ ზონაში დაბრუნება იქნება მიზანშეწონილი ქმედება, რომელსაც ცენტრალური ბანკი უზრუნველყოფს.

იმ შემთხვევაში, თუკი ევროზონის ეკონომიკის გადახურება და ფასების ზრდა კიდევ გაგრძელდება, მოსალოდნელია, რომ ECB-მა მონეტარული პოლიტიკა დაგეგმილზე უფრო მეტად გაამკაცროს.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *