FDA-მ პნევმოკოკით გამოწვეულ დაავადებასთან საბრძოლველად ახალი ვაქცინა დაამტკიცა

FDA-მ პნევმოკოკით გამოწვეულ დაავადებასთან საბრძოლველად ახალი ვაქცინა დაამტკიცა

აშშ-ის სურსათისა და მედიკამენტების ხარისხის კონტროლის სააგენტომ (FDA) კომპანია Pfizer-ის ვაქცინა დაამტკიცა, რომელიც  პნევმოკოკით გამოწვეული დაავადების წინააღმდეგ არის მიმართული. მწარმოებლის განცხადებით, პრეპარატი ექვსი კვირიდან 17 წლამდე ასაკის ბავშვების ვაქცინაციისთვის შეიქმნა.

Pfizer-ის ინფორმაციით, ახალი ვაქცინა, სახელწოდებით Prevnar 20, უფრო ეფექტიან დაცვას გვთავაზობს, ვიდრე კომპანიის ფართოდ გამოყენებული პრეპარატი Prevnar 13. გარდა ამისა, როგორც ირკვევა, Prevnar 20 პნევმოკოკის ბაქტერიის დამატებით შვიდი სეროტიპის წინააღმდეგ ბრძოლას უზრუნველყოფს.

ცნობისთვის, პნევმოკოკურმა დაავადებამ შესაძლოა გამოიწვიოს ინფექცია სხეულის რამდენიმე ნაწილში, მათ შორის ფილტვებში, რაც ხშირად პნევმონიის განვითარების მიზეზი ხდება.

აშშ-ის დაავადებათა კონტროლისა და პრევენციის ცენტრის მონაცემებით, ამერიკის შეერთებულ შტატებში ყოველწლიურად პნევმოკოკით გამოწვეული დაავადების დაახლოებით 2000 შემთხვევა ფიქსირდება 5 წლამდე ასაკის ბავშვებში.

აღსანიშნავია, რომ Prevnar 20 ასევე დამტკიცებულია ყურის ინფექციის ერთ-ერთი ტიპის პრევენციისთვის.