ივანიშვილის ქონების შესახებ

ივანიშვილის ქონების შესახებ

Forbes-ის მილიარდერთა სიაში ბიძინა ივანიშვილის ქონების უახლესმა განახლებამ საზოგადოების ყურადღება მიიპყრო.

აღნიშნული განახლება ეფუძნება მხოლოდ და მხოლოდ იმ ინფორმაციას, რომელიც Forbes-ს უშუალოდ ივანიშვილის ქონების მმართველმა მიაწოდა. მცდელობის მიუხედავად, მოცემულ შემთხვევაში, Forbes-ს არ ჰქონია წვდომა დამოუკიდებელ წყაროებზე აღნიშნული რიცხვების დასტურისა ან უარყოფისთვის.

ინდივიდუალური ქონების შეფასებისას Forbes-ი მისდევს მკაცრ მეთოდოლოგიას. ჩვეულებრივ ამ პროცესში გამოიყენება საჯარო ფინანსური დოკუმენტაცია, საბაზრო მაჩვენებლები, მფლობელობაში არსებული წილების დეკლარაციები, ექსპერტული ანალიზი და აგრეთვე უშუალოდ გამოკვლეულ პირთაგან ან მათი წარმომადგენლებისგან მიღებული ინფორმაცია.

საქართველოში „გამჭვირვალობის” მიზნით მიღებული საკანონმდებლო ინიციატივები ზღუდავს მედიისა და არასამთავრობო სექტორის თავისუფლებას და, ამავე დროს, ქონებრივ დეკლარაციებში, სახელმწიფო კონტრაქტებსა და სასამართლო დოკუმენტაციაში ხშირად ვერ ხერხდება საჯარო ინტერესის მქონე ინფორმაციაზე წვდომა.

შესაბამისად, იმ შემთხვევებში, როდესაც ქონების შესახებ მონაცემთა გამჭვირვალობა და დამოუკიდებელი წყაროები შეზღუდულია, წინასწარი შეფასებები იმ მონაცემებზე დაყრდნობით კეთდება, რომლებიც ხელმისაწვდომია სიის გამოსვლის თარიღისთვის. ბიძინა ივანიშვილის აქტივების გაუმჭვირვალობის გამო, მისი ქონების შესახებ ერთადერთი წყარო თავად ბიძინა ივანიშვილია.

საზოგადოებისთვის ცნობილია, რომ სხვა გამოცემები ბიძინა ივანიშვილის ქონებას მნიშვნელოვნად უფრო მაღალ ნიშნულზე აფასებენ. თუმცა მათი მონაცემები ხშირად კომპანიების სავარაუდო ბენეფიციარებს მოიცავს, მაშინაც კი, როცა მფლობელის დადასტურება შეუძლებელია. ამასთან ხშირად ეს მაჩვენებლები ინდექსირებული და ექსტრაპოლირებულია შიდა- ან გარესაბაზრო დინამიკის მიხედვით.

Forbes-ი ასეთ შემთხვევებში უფრო კონსერვატიულია: ჩვენ ვთვლით, რომ დაუდასტურებელი აქტივები ვერ ჩაითვლება სარწმუნო შეფასების ნაწილად და მათ ანგარიშში არ ავსახავთ.

მნიშვნელოვანია ხაზგასმა, რომ ბოლო შეფასება არ უნდა ჩაითვალოს ბიძინა ივანიშვილის რეალური ფინანსური მდგომარეობის საბოლოო სურათად. იგი მხოლოდ იმას ასახავს, რისი მოპოვებაც Forbes-მა შეძლო, მაგრამ არა აუცილებლად მისი ქონების სრულ მასშტაბს.

მას შემდეგ, რაც გამოვლინდება ახალი, სანდო და დამოუკიდებლად დადასტურებული ინფორმაცია, შეფასებაც შესაბამისად განახლდება. ამაზე Forbes Georgia-ს გუნდში ინტენსიურად ვმუშაობთ.

აქვე ვისარგებლებ შემთხვევით და გავამხელ ამ საკითხთან დაკავშირებულ მთავარ სიახლეს: ჩვენ ვგეგმავთ, ივლისის ნომერში უმდიდრესი ქართველების პირველი სია წარვუდგინოთ საზოგადოებას. უმდიდრესი ქართველების პირველი სია არა მხოლოდ ინტერესს, არამედ საჯარო დისკუსიასაც აღძრავს საქართველოში ქონებისა და ეკონომიკური ძალის კონცენტრაციის გარშემო.

მანამდე გირჩევთ გაეცნოთ ჩვენს ბოლო ნომრებს, მათ შორის, ადგილობრივ რეიტინგებს, რომლებიც ასახავს ქვეყნის ყველაზე შემოსავლიან და ეფექტიანად მართულ კომპანიებს, და სიღრმისეულ მიმოხილვებს, რომლებიც საქართველოს ეკონომიკურ და საზოგადოებრივ ტენდენციებს მოიცავს. სანამ მედიის დამოუკიდებლობა წნეხის ქვეშაა, სიღრმისეული, ობიექტური და ფაქტებზე დაფუძნებული ანალიზის მნიშვნელობა კიდევ უფრო იზრდება.

Forbes-ი და მისი ქართული გამოცემა სწორედ ამას ემსახურებოდა, ემსახურება და მოემსახურება.