2025 წლის 19 დეკემბერს, „ავატარის“ მესამე ნაწილის დაგეგმილ პრემიერამდე რამდენიმე დღით ადრე, ფილმის რეჟისორმა, ჯეიმს კამერონმა მილიარდერის სტატუსი ოფიციალურად მოიპოვა. ამერიკული Forbes-ი 71 წლის კანადელი კინორეჟისორის ქონებას $1.1 მილიარდად აფასებს.
თითქმის 40-წლიანი კარიერის განმავლობაში, კამერონის ფილმებმა სალაროებში კოლექტიურად თითქმის $9 მილიარდი გამოიმუშავა. კინორეჟისორისთვის ერთ-ერთი პირველი ყველაზე მოგებიანი პროექტი კი „ტიტანიკი“ გამოდგა. 1997 წლის ფილმმა, $200-მილიონიანი ბიუჯეტით, მხოლოდ კინოგაქირავებიდან $1.8 მილიარდი გამოიმუშავა. დამატებით $800 მილიონი – სახლის ვიდეოფირების გაყიდვებიდან. თავდაპირველი ხელშეკრულებით, კამერონის ანაზღაურება $7 მილიონით იყო განსაზღვრული, თუმცა რეჟისორმა ფილმის მოგებიდან 10%-იც მიიღო.
კამერონის რეჟისორობითაა გადაღებული მსოფლიოს ყველაზე შემოსავლიანი ფილმიც, „ავატარი“. 2009 წელს გამოსულმა ფილმმა ჯამში 2.8 მილიარდ დოლარამდე შემოსავალი მიიღო. ხოლო ფილმის მეორე ნაწილი, 2022 წლის „ავატარი 2: წყლის გზა“, დაახლოებით $2.4 მილიარდით, მსოფლიოს მესამე ყველაზე შემოსავლიანი ფილმია, „შურისმაძიებლების“ ($2.8 მილიარდი) ბოლო ნაწილის შემდგომ. როგორც ცნობილია, „ავატარის“ მეორე ნაწილით კამერონმა, სულ მცირე, $250 მილიონი გამოიმუშავა.
მიუხედავად იმისა, რომ მსოფლიოში ყველაზე შემოსავლიანი ფილმის გაგრძელება „ოქროს გლობუსის“ მთავარი ჯილდოს წლევანდელ ნომინანტებში ვერ მოხვდა, კინოკრიტიკოსები მესამე ნაწილს სალაროებში $2 მილიარდის გამომუშავებას უწინასწარმეტყველებენ.
ამერიკული Forbes-ის $1.1-მილიარდიანი შეფასებით, კამერონი მილიარდერ კინორეჟისორთა მცირერიცხოვან სიაში მოხვდა. კანადელთან ერთად, ამ სტატუსისთვის სულ ოთხ კინორეჟისორს აქვს მიღწეული, ესენი არიან: სტივენ სპილბერგი ($7.1 მილიარდი), ჯორჯ ლუკასი ($5.3 მილიარდი), პიტერ ჯექსონი ($1.7 მილიარდი) და ტაილერ პერი ($1.4 მილიარდი).
