19 ოქტომბრის დილას, პარიზში მდებარე ლუვრის მუზეუმიდან ძვირფასი სამკაულები მოიპარეს. მოპარულ ნივთებს შორისაა დედოფალთა დიადემები, ყელსაბამები, საყურეები და გულსაბნევები. წყაროების ცნობით, ქურდები შემთხვევის ადგილზე მუზეუმის გახსნიდან დაახლოებით ოცდაათი წუთის შემდეგ, ადგილობრივი დროით დილის 9:30-9:40 საათზე მივიდნენ. მათივე ინფომაციით, მძარცველები სკუტერებით იყვნენ და ძარცვის დროს ამწე და ხელის პატარა ხერხები გამოიყენეს.
მედიასააგენტო Reuters-მა ლუვრის ბოლო გაძარცვამდე მომხდარი მასშტაბური და გახმაურებული ქურდობები გაიხსენა, რომელთა დროსაც ქურდებმა მუზეუმებიდან ძვირფასი ნივთები მოიპარეს:
2023 წლის აგვისტო, ლონდონი – ბრიტანეთის მუზეუმის განცხადებით, ხანგრძლივი პერიოდის განმავლობაში დაახლოებით 2000 არტეფაქტი, მათ შორის ოქროს სამკაულები და ძვირფასი ქვები მოიპარეს, რასაც მუზეუმი „შიდა საქმეს“ უწოდებს.
2020 წლის აგვისტო, უტრეხტის მახლობლად – კორონავირუსის პანდემიის გამო დაწესებული შეზღუდვის დროს ნიდერლანდების ქალაქის მახლობლად მდებარე Hofje van Mevrouw Van Aerden-ის მუზეუმიდან ფრანს ჰალსის Two Laughing Boys მოიპარეს. 1626 წლის ნამუშევარი, რომელიც ერთ-ერთი ექსპერტის მიერ 15 მილიონ ევროდ ფასდებოდა, მანამდე ორჯერ იყო მოპარული.
2020 წლის მარტი, ამსტერდამი – COVID-19-ის პანდემიის დროს, ღამით ვან გოგის ნახატი Spring Garden მოიპარეს Singer Laren Museum-დან, სადაც ის კომერციული შეთანხმებით დროებით იყო გამოფენილი.
2019 წლის ნოემბერი, დრეზდენი – აღმოსავლეთ გერმანიის საქსონიის მხარეში, Gruenes Gewoelbe-ის მუზეუმში ქურდებმა 4300-ზე მეტი ბრილიანტი მოიპარეს, რომელთა სავარაუდო ღირებულება 113 მილიონ ევროს აჭარბებს. ძვირფასი ქვების უმეტესობა ამოღებულია.
2015 წლის მაისი, მადრიდი – მადრიდის ერთ-ერთი სახლიდან ფრენსის ბეკონის ხუთი ნახატი მოიპარეს, რომელთა ღირებულება 25 მილიონ დოლარს შეადგენდა. ორი წლის შემდეგ სამი ნამუშევარი იპოვეს.
2012 წლის ოქტომბერი, როტერდამი – ქურდებმა როტერდამის Kunsthal-ის მუზეუმიდან პიკასოს, მატისის, მონესა და სხვათა შვიდი ნამუშევარი მოიპარეს, რომელთა ღირებულება ათობით მილიონი ევროა. 2013 წელს ქურდობაში დამნაშავედ რუმინელი მამაკაცი და მისი რამდენიმე თანამზრახველი ცნეს.
2010 წლის მაისი, პარიზი – პარიზის თანამედროვე ხელოვნების მუზეუმიდან 120 მილიონი ევროს ღირებულების ხუთი ნახატი მოიპარეს. მოპარულ ნამუშევრებს შორის იყო პიკასოს Dove with Green Peas და ანრი მატისის Pastorale.
2008 წლის თებერვალი, ციურიხი – პოლ სეზანის, ედგარ დეგას, ვან გოგის და კლოდ მონეს ოთხი ფერწერული ტილო, რომელთა ღირებულება 164 მილიონი დოლარი იყო, ციურიხში, ბიურლეს კოლექციიდან მოიპარეს. მონე და ვან გოგი მალევე იპოვეს, ხოლო სეზანის ნახატს 2012 წელს სერბეთში მიაკვლიეს.
2004 წლის დეკემბერი, სან-პაულუ – ბრაზილიაში ქურდებმა სან-პაულუს ხელოვნების მუზეუმიდან პიკასოს მიერ 1904 წელს შესრულებული სუზან ბლოხის პორტრეტი მოიპარეს, რომლის ღირებულება 50 მილიონ დოლარს შეადგენს. გარდა ამისა, მათ მუზეუმიდან წაიღეს ადგილობრივი მხატვრის კანდიდო პორტინარის 1939 წლის ნამუშევარი The Coffee Worker, რომლის ღირებულება დაახლოებით 5,5 მილიონ დოლარს შეადგენს. ორივე ნახატს მომდევნო თვეში მიაკვლიეს.
2004 წლის აგვისტო, ოსლო – შეიარაღებულმა მძარცველებმა ოსლოში, მუნკის მუზეუმიდან ედვარდ მუნკის The Scream მოიპარეს. ეს 10 წლის განმავლობაში მეორე შემთხვევა იყო, როდესაც ნახატის ვერსია მოიპარეს. ქურდებმა ასევე წაიღეს მუნკის Madonna. 1893 წლის ნამუშევრები 2006 წლის აგვისტოში ამოიღეს.
2003 წლის აგვისტო, დრამლანრიგის ციხე, შოტლანდია – ქურდებმა ლეონარდო და ვინჩის Madonna of the Yarnwinder მოიპარეს. მე-16 საუკუნის დასაწყისში შესრულებული ნამუშევარი დაახლოებით 53 მილიონ დოლარად იყო შეფასებული. ოთხი წლის შემდეგ ის შოტლანდიაშივე იპოვეს.
2002 წლის დეკემბერი, ამსტერდამი – ამსტერდამში, ვან გოგის მუზეუმში, ქურდებმა ვან გოგის მიერ ზეთის საღებავებით შესრულებული ორი ტილო მოიპარეს, რომელთაგან თითოეული დაახლოებით 56 მილიონი დოლარის ღირებულების იყო. ორივე ნახატი 2016 წელს ნეაპოლში, სავარაუდოდ, ნარკოტიკების კონტრაბანდისტის აგარაკზე იპოვეს.
2001 წლის დეკემბერი, სტოკჰოლმი – სტოკჰოლმის ეროვნული მუზეუმიდან ფრანგი იმპრესიონისტის, პიერ-ოგიუსტ რენუარის Conversation და A Young Parisienne, ასევე ნიდერლანდელი ოსტატის, რემბრანდტ ვან რეინის ავტოპორტრეტი მოიპარეს. Conversation მომდევნო წლის აპრილში იპოვეს, რემბრანდტის პორტრეტი კი – 2005 წელს.
1993 წლის ნოემბერი, სტოკჰოლმი – სტოკჰოლმის თანამედროვე ხელოვნების მუზეუმიდან პაბლო პიკასოსა და ფრანგი კუბისტის, ჟორჟ ბრაკის რვა ნამუშევარი მოიპარეს, რომელთა ღირებულება დაახლოებით 60 მილიონ დოლარს შეადგენდა. ზოგიერთი მათგანი მომდევნო თვეებში იპოვეს.
1991 წლის აპრილი, ამსტერდამი – ამსტერდამში, ვან გოგის მუზეუმიდან, 20 ნახატი მოიპარეს, რომელთა ღირებულება 500 მილიონ დოლარს შეადგენდა, მათ შორის ვინსენტ ვან გოგის The Potato Eaters. ისინი მალევე იპოვეს მიტოვებულ მანქანაში, რომელიც მუზეუმთან ახლოს იდგა.
