სტატისტიკის ეროვნული სამსახურის მონაცემებით, 2025 წლის ოქტომბერში სამრეწველო პროდუქციის მწარმოებელთა ფასების ინდექსი წინა თვესთან შედარებით 1.1%-ით გაიზარდა, ხოლო წინა წლის შესაბამის თვესთან შედარებით – 5.6%-ით.
2025 წლის სექტემბერთან შედარებით, საქართველოში სამთო-მოპოვებითი მრეწველობისა და კარიერების დამუშავების ჯგუფში ფასები 8%-ით გაიზარდა, რაც 0.56 პროცენტული პუნქტით აისახა ჯამური ინდექსის ზრდაზე.
ამავე პერიოდში, დამამუშავებელი მრეწველობის პროდუქციის ჯგუფის ფასები გაიზარდა 0.5%-ით, რამაც 0.42 პროცენტული პუნქტით მოახდინა გავლენა მთლიანი ინდექსის ცვლილებას. ამ კატეგორიაში განსაკუთრებულია კვების პროდუქტების ფასების 0.8%-იანი და ძირითად ლითონებზე ფასების 2.9%-იანი ზრდა, რომელიც ინდექსზე მნიშვნელოვან გავლენას ახდენს.
ზრდის ტენდენცია დაფიქსირდა ელექტროენერგიის, აირის, ორთქლისა და კონდიცირებული ჰაერის ჯგუფში — ფასები აქ 0.6%-ით გაიზარდა, რის შედეგადაც აღნიშნულმა კატეგორიამ უმნიშვნელოდ, 0.07 პროცენტული პუნქტით გაზარდა თვის ჯამური ინდექსი.
ბოლო 12 თვის განმავლობაში ინდექსის ფორმირებაზე ძირითადი გავლენა ფასების ცვლილებამ იქონია სამთო-მოპოვებით, დამამუშავებელ და ენერგეტიკულ სექტორებში.
სამთო-მოპოვებითი მრეწველობისა და კარიერების დამუშავების ჯგუფში ფასები 21.7%-ით გაიზარდა, რაც მთლიანი ინდექსის წლიურ ცვლილებაზე 1.41 პროცენტული პუნქტით აისახა. განსაკუთრებით გაიზარდა ლითონის მადნების ფასები — 30.1%-ით.
დამამუშავებელი მრეწველობის პროდუქციის ჯგუფში ფასები გაიზარდა 3.9%-ით, რაც ინდექსის ზრდაზე 3.13 პროცენტული პუნქტით აისახა. აღნიშნულ კატეგორიაში ზრდა დაფიქსირდა კვების პროდუქტებსა (9.7%) და სასმელებზე (5.2%).
ელექტროენერგიის, აირის, ორთქლისა და კონდიცირებული ჰაერის ჯგუფში ფასები ბოლო 12 თვეში გაიზარდა 10%-ით, რაც ინდექსის წლიურ ცვლილებაზე 1.04 პროცენტული პუნქტით აისახა.
