2024 წელს საქართველოს ადგილობრივმა ექსპორტმა 3 მილიარდი დოლარი შეადგინა, რაც 2023 წლის მაჩვენებელზე 5%-ით მეტია. ადგილობრივი ექსპორტი ნიშნავს საქართველოში წარმოებული საქონლის ექსპორტს, ანუ მასში არ შედის რეექსპორტი.
3 მილიარდი დოლარის ექსპორტიდან 1.3 მილიარდ დოლარამდე დამოუკიდებელ ქვეყანათა თანამეგობრობაზე (დსთ) მოდის, ხოლო 477 მლნ დოლარი – ევროკავშირის ქვეყნებზე. დსთ პოსტსაბჭოთა ქვეყნებს მოიცავს საქართველოს, უკრაინის, ესტონეთის, ლატვიისა და ლიეტუვის გამოკლებით. დსთ-ში შემავალ ქვეყნებს შორის საქართველოს ექსპორტში ყველაზე დიდი წილი რუსეთს, სომხეთსა და აზერბაიჯანს უჭირავს. მათზე მოდის დსთ-ში ექსპორტის 80%.
ექსპორტის ანალიზი ცალსახად მოწმობს, რომ დსთ-ის ქვეყნები ევროკავშირის ქვეყნებს მნიშვნელოვნად უსწრებენ ქართული სოფლის მეურნეობის ნაწარმის და სასმელების იმპორტით, ხოლო ევროკავშირში მეტი ღირებულების ბუნებრივი რესურსები და მრეწველობის ნაწარმი შედის. გაგაცნობთ ევროკავშირსა და დსთ-ში ექსპორტის უმსხვილეს 10 სასაქონლო ჯგუფს. ინფორმაციის წყარო საქართველოს სტატისტიკის ეროვნული სამსახურია (საქსტატი).
სასუქები – 32.1 მლნ დოლარი
2024 წელს საქართველომ ექსპორტზე 119 მლნ დოლარის სასუქები გაიტანა. აქედან, ევროკავშირსა და დსთ-ში 32.1 მლნ დოლარის სასუქები შევიდა. კერძოდ, ევროკავშირში 28.6 მლნ დოლარის, ხოლო დსთ-ში 3.5 მლნ დოლარის. ევროკავშირის ქვეყნებიდან ყველაზე მეტი ღირებულების სასუქები რუმინეთსა (18 მლნ) და ესპანეთში (7 მლნ) შევიდა, დსთ-ის ქვეყნებიდან სომხეთში – 2.7 მლნ დოლარის.
2023 წელთან შედარებით სასუქების ექსპორტი 25%-ით შემცირდა. ქართული სასუქის უმსხვილესი იმპორტიორები პერუ (39 მლნ) და ინდოეთი (22 მლნ) არიან. სასუქი ექსპორტზე სულ 21 ქვეყანაში გავიდა.
ფარმაცევტული პროდუქცია – 32.5 მლნ დოლარი
2024 წელს საქართველომ ექსპორტზე 34 მლნ დოლარის ფარმაცევტული პროდუქცია გაიტანა. აქედან ევროკავშირსა და დსთ-ში 32.5 მლნ დოლარის შევიდა. კერძოდ, ევროკავშირში – 1.5 მლნ დოლარის, ხოლო დსთ-ში – 31 მლნ დოლარის. ევროკავშირის ქვეყნებიდან ყველაზე მეტი ღირებულების მედიკამენტები ლატვიაში (1.2 მლნ) შევიდა, დსთ-ის ქვეყნებიდან უზბეკეთში (14 მლნ), სომხეთში (4.1 მლნ) და აზერბაიჯანში (3.5 მლნ).
2023 წელთან შედარებით ფარმაცევტული პროდუქციის ექსპორტი 6%-ით გაიზარდა. აღნიშნული საქონელი ექსპორტზე სულ 33 ქვეყანაში გავიდა.
ტანსაცმელი – 44.4 მლნ დოლარი
გასულ წელს საქართველომ ექსპორტზე 169 მლნ დოლარის ტანსაცმელი გაიტანა. აქედან ევროკავშირსა და დსთ-ში 44.4 მლნ დოლარის შევიდა. კერძოდ, ევროკავშირში – 35.5 მლნ დოლარის, ხოლო დსთ-ში – 8.9 მლნ დოლარის. ევროკავშირის ქვეყნებიდან ყველაზე მეტი ღირებულების ტანსაცმელი პოლონეთსა (12 მლნ) და ჩეხეთში (7 მლნ) შევიდა, დსთ-ის ქვეყნებიდან აზერბაიჯანსა (5 მლნ) და რუსეთში (3 მლნ).
2023 წელთან შედარებით ტანსაცმლის ექსპორტი 1.4%-ით გაიზარდა. ქართული ტანსაცმლის უმსხვილესი იმპორტიორი თურქეთია (118 მლნ). ტანსაცმელი ექსპორტზე სულ 76 ქვეყანაში გავიდა.
ბოსტნეულისა და ხილის ნაწარმი – 48 მლნ დოლარი
2024 წელს საქართველომ ექსპორტზე 66 მლნ დოლარის ბოსტნეული და ხილის ნაწარმი (მურაბა, ჯემი, კონსერვი და ა.შ) გაიტანა. აქედან, ევროკავშირსა და დსთ-ში 48 მლნ დოლარის შევიდა. კერძოდ, ევროკავშირში – 16.4 მლნ დოლარის, ხოლო დსთ-ში – 31.6 მლნ დოლარის. დსთ-ის ქვეყნებიდან ყველაზე მეტი ღირებულების რუსეთში (28 მლნ) შევიდა, ევროკავშირის ქვეყნებიდან გერმანიასა (9 მლნ) და საფრანგეთში (2 მლნ).
2023 წელთან შედარებით ბოსტნეულისა და ხილის ნაწარმის ექსპორტი 161%-ით გაიზარდა. აღნიშნული საქონელი ექსპორტზე სულ 53 ქვეყანაში გავიდა.
თხილი – 79 მლნ დოლარი
2024 წელს საქართველომ ექსპორტზე 104 მლნ დოლარის თხილი გაიტანა. აქედან ევროკავშირსა და დსთ-ში 79 მლნ დოლარის შევიდა. კერძოდ, ევროკავშირში – 65 მლნ დოლარის, ხოლო დსთ-ში – 14 მლნ დოლარის. ევროკავშირის ქვეყნებიდან ყველაზე მეტი ღირებულების თხილი იტალიაში (18 მლნ), ესპანეთში (15 მლნ) და გერმანიაში (9 მლნ) შევიდა, დსთ-ის ქვეყნებიდან სომხეთსა (5 მლნ) და რუსეთში (4.7 მლნ).
2023 წელთან შედარებით თხილის ექსპორტი 21%-ით გაიზარდა. ქართული თხილი ექსპორტზე სულ 47 ქვეყანაში გავიდა.
შავი ლითონები – 86 მლნ დოლარი
გასულ წელს საქართველომ ექსპორტზე 370 მლნ დოლარის შავი ლითონები გაიტანა. აქედან ევროკავშირსა და დსთ-ში 86 მლნ დოლარის შევიდა. კერძოდ, ევროკავშირში – 47 მლნ დოლარის, ხოლო დსთ-ში – 39 მლნ დოლარის. ევროკავშირის ქვეყნებიდან ყველაზე მეტი ღირებულების შავი ლითონები იტალიაში (23 მლნ), ესპანეთში (7 მლნ) და ნიდერლანდებში (6 მლნ) შევიდა, დსთ-ის ქვეყნებიდან სომხეთსა (12 მლნ) და აზერბაიჯანში (10 მლნ).
2023 წელთან შედარებით შავი ლითონების ექსპორტი 79%-ით გაიზარდა. ქართული შავი ლითონების უმსხვილესი იმპორტიორები თურქეთი (147 მლნ) და აშშ (99 მლნ) არიან. აღნიშნული საქონელი ექსპორტზე სულ 64 ქვეყანაში გავიდა.
ლითონის მადნები- 114 მლნ დოლარი
2024 წელს საქართველომ ექსპორტზე 335 მლნ დოლარის მადნები და წიდა გაიტანა. აქედან ევროკავშირსა და დსთ-ში 114 მლნ დოლარის შევიდა. კერძოდ, ევროკავშირში – 111 მლნ დოლარის, ხოლო დსთ-ში – 3 მლნ დოლარის. ევროკავშირის ქვეყნებიდან მადნები მხოლოდ ბულგარეთში შევიდა, დსთ-ის ქვეყნებიდან კი ყაზახეთსა (2.5 მლნ) და რუსეთში (0.6 მლნ).
2023 წელთან შედარებით მადნების ექსპორტი 38%-ით შემცირდა. ქართული ლითონის მადნების უმსხვილესი იმპორტიორი ჩინეთია (220 მლნ). მადნები ექსპორტზე სულ 9 ქვეყანაში გავიდა.
სპირტი და სპირტიანი სასმელები – 247 მლნ დოლარი
გასულ წელს საქართველომ ექსპორტზე 250 მლნ დოლარის სპირტი და სპირტიანი სასმელები გაიტანა. აქედან ევროკავშირსა და დსთ-ში 247 მლნ დოლარის შევიდა. კერძოდ, ევროკავშირში – 16 მლნ დოლარის, ხოლო დსთ-ში – 231 მლნ დოლარის. დსთ-ის ქვეყნებიდან ყველაზე მეტი სპირტიანი სასმელები რუსეთში (154 მლნ), სომხეთსა (40 მლნ) და ბელარუსში (12 მლნ) შევიდა, ევროკავშირის ქვეყნებიდან საფრანგეთსა (10 მლნ) და ლატვიაში (2 მლნ).
2023 წელთან შედარებით სპირტისა და სპირტიანი სასმელების ექსპორტი 55%-ით გაიზარდა. აღნიშნული საქონელი ექსპორტზე სულ 49 ქვეყანაში გავიდა.
ღვინო – 249 მლნ დოლარი
გასულ წელს საქართველომ ექსპორტზე 275 მლნ დოლარის ღვინო გაიტანა. აქედან ევროკავშირსა და დსთ-ში 249 მლნ დოლარის შევიდა. კერძოდ, ევროკავშირში – 34 მლნ დოლარის, ხოლო დსთ-ში – 215 მლნ დოლარის. დსთ-ის ქვეყნებიდან ყველაზე მეტი ღვინო რუსეთში (183 მლნ), ყაზახეთსა (10 მლნ) და ბელარუსში (7 მლნ) შევიდა, ევროკავშირის ქვეყნებიდან პოლონეთსა (17 მლნ) და გერმანიაში (6 მლნ).
2023 წელთან შედარებით ღვინის ექსპორტი 7%-ით გაიზარდა. ქართული ღვინო ექსპორტზე სულ 49 ქვეყანაში გავიდა.
უალკოჰოლო სასმელები – 293 მლნ დოლარი
გასულ წელს საქართველომ ექსპორტზე 302 მლნ დოლარის უალკოჰოლო სასმელები გაიტანა. აქედან ევროკავშირსა და დსთ-ში 293 მლნ დოლარის შევიდა. კერძოდ, ევროკავშირში – 18 მლნ დოლარის, ხოლო დსთ-ში – 275 მლნ დოლარის. დსთ-ის ქვეყნებიდან ყველაზე მეტი უალკოჰოლო სასმელები რუსეთში (139 მლნ), ყაზახეთსა (47 მლნ) და უზბეკეთში (18 მლნ) შევიდა, ევროკავშირის ქვეყნებიდან ლიეტუვასა (10 მლნ) და გერმანიაში (3 მლნ).
2023 წელთან შედარებით უალკოჰოლო სასმელების ექსპორტი 26%-ით გაიზარდა. აღნიშნული ქართული ნაწარმი ექსპორტზე სულ 64 ქვეყანაში გავიდა. უალკოჰოლო სასმელები მტკნარ წყალს, მინერალურ წყალსა და შაქრიან სასმელებს მოიცავს.
