სტატისტიკის ეროვნული სამსახურის ექსპრეს-მონაცემების თანახმად, 2025 წლის იანვარ-აპრილში საქართველოში საქონლით საგარეო სავაჭრო ბრუნვამ, არადეკლარირებული ვაჭრობის გარეშე, 7.75 მილიარდ აშშ დოლარს გადააჭარბა. ეს წინა წლის შესაბამისი პერიოდის მაჩვენებელზე 15.3%-ით მეტია.
საქსტატის ინფორმაციით, საქონლით საგარეო სავაჭრო ბრუნვაში ექსპორტი 2.01 მილიარდი აშშ დოლარი იყო, რაც 2024 წლის მონაცემს 14.2%-ით აღემატება. იმპორტმა კი 5.74 მილიარდ აშშ დოლარს გადააჭარბა, რაც ნიშნავს, რომ წინა წელთან შედარებით მაჩვენებელი 15.7%-ით გაიზარდა.
შედეგად, 2025 წლის იანვარ-აპრილში უარყოფითმა სავაჭრო ბალანსმა თითქმის 3.73 მილიარდი აშშ დოლარი შეადგინა, რაც საგარეო სავაჭრო ბრუნვის 48.1%-ია.
რაც შეეხება უშუალოდ აპრილის თვეს, სტატისტიკის ეროვნული სამსახურის მონაცემებით, გასულ თვეში საგარეო სავაჭრო ბრუნვამ 2 მილიარდ აშშ დოლარს გადააჭარბა. აქედან ექსპორტი 616.8 მილიონი აშშ დოლარი, იმპორტი კი თითქმის 1.4 მილიარდი აშშ დოლარი იყო.
როგორც ცნობილია, საქართველოს საგარეო ვაჭრობის დეტალური მონაცემები მიმდინარე წლის 19 მაისს გამოქვეყნდება.
Forbes Georgia-ს აღმასრულებელი რედაქტორი
