სტატისტიკის ეროვნული სამსახურის მონაცემებით, 2025 წლის III კვარტალში საქართველოში საშუალო თვიური ნომინალური ხელფასი 2 271.6 ლარს გაუტოლდა, რაც გასული წლის შესაბამის პერიოდთან შედარებით 10.4%-ით, 214.9 ლარით მეტია.
საქსტატის ცნობით, საქმიანობის სახეების მიხედვით შედარებით მაღალი ხელფასი ფიქსირდება ქვემოთ მოცემულ დარგებში:
| დარგი | საშუალო თვიური ხელფასი (ლარი) | წლიური ცვლილება |
|---|---|---|
| ინფორმაცია და კომუნიკაცია | 4 212.9 | +5.9% |
| მშენებლობა | 3 682.9 | +15.2% |
| საფინანსო და სადაზღვევო საქმიანობები | 3 526.0 | +10.7% |
| სამთომოპოვებითი მრეწველობა და კარიერების დამუშავება | 3 154.3 | +30.6% |
ქალების საშუალო თვიური ნომინალური ხელფასი კვლავ მნიშვნელოვნად ჩამოუვარდებოდა კაცებისას – 1 797.4 ლარი შეადგინა, ხოლო კაცების ხელფასმა – 2 738.1 ლარი. განსხვავებულია ზრდის მაჩვენებლებიც და ამ შემთხვევაშიც ქალებთან შედარებით დაბალი მატება ფიქსირდება. კერძოდ, ქალების შემთხვევაში ხელფასების წლიურმა ზრდამ 146.8 ლარი (8.9%) შეადგინა, ხოლო კაცებში – 287.1 ლარი (11.7%). საქმიანობის სახეების მიხედვით კაცების ხელფასი ყველა სექტორში აღემატებოდა ქალების ხელფასს.
სტატისტიკის ეროვნული სამსახურის მონაცემებით, ბიზნესსექტორში დაქირავებით დასაქმებულთა საშუალო თვიური ხელფასი 10.5%-ით, 230.8 ლარით გაიზარდა და 2 420.9 ლარი შეადგინა. საქმიანობის სახეების მიხედვით ყველაზე მაღალი ხელფასი დაფიქსირდა ინფორმაციის და კომუნიკაციის სფეროში და 4 277.5 ლარს გაუტოლდა, რაც წინა წლის შესაბამის პერიოდთან შედარებით 5.2%-იან ზრდას გულისხმობს. მშენებლობის სფეროში ხელფასმა 3 687.6 ლარი შეადგინა, რაც წლიურ ჭრილში 15.1%-ით გაზრდილი მაჩვენებელია.
ანგარიშის თანახმად, არასამეწარმეო და საფინანსო სექტორში საშუალო თვიური ხელფასი გასული წლის შესაბამის პერიოდთან შედარებით 10.3%-ით, 187.4 ლარით გაიზარდა და 2 000.9 ლარი შეადგინა. ამ შემთხვევაში შედარებით მაღალი ხელფასი აქვთ საფინანსო და სადაზღვევო მიმართულებით დასაქმებულებს.
