ქართულ ბაზარზე მოქმედი საავადმყოფოებიდან რომელია ყველაზე ძვირადღირებული?
Forbes Georgia-ს ივნისის ნომერში დაიბეჭდა 100 ყველაზე ძვირადღირებული ქართული კომპანიის რეიტინგი, რომელიც დაფუძნებულია მათი ფინანსური მაჩვენებლების დეტალურ ანალიზზე. ამჯერად რეიტინგიდან წარმოგიდგენთ ყველაზე ძვირადღირებული საავადმყოფოების ხუთეულს:
1. თოდუას კლინიკა (₾ 600 მლნ)
„თოდუას კლინიკა“, რომელიც თბილისის მასშტაბით სამ ფილიალს აერთიანებს, პაციენტებს სამედიცინო მომსახურების ფართო სპექტრს სთავაზობს. მათ შორის, გამორჩეულია რადიოლოგიის მიმართულება. „თოდუას კლინიკას“ გიორგი დიასამიძე ფლობს, ხოლო გენერალური დირექტორის პოზიციას გიორგი წივწივაძე იკავებს. კომპანიის მიერ მიღებული შემოსავლების 36.2% საყოველთაო ჯანდაცვის რესურსებია.
2. ავერსის კლინიკა (₾ 533.5 მლნ)
„ავერსის კლინიკა“ მრავალპროფილური სამედიცინო დაწესებულებაა, რომელიც თბილისში 6 და რეგიონებში 11 ფილიალს აერთიანებს. შპს „ავერსი ფარმას“ საშუალებით კომპანიას პაატა (67%) და ნიკოლოზ (33%) კურტანიძეები ფლობენ. „ავერსის კლინიკის“ მიერ მიღებული შემოსავლების 68.4% თბილისის ფილიალებიდან ამონაგებია, ხოლო მთლიანი შემოსავლების 17.8% – საყოველთაო ჯანდაცვის პროგრამიდან სახსრები.
3. ჩაჩავას კლინიკა (₾ 245 მლნ)
„ჩაჩავას კლინიკა“ სამშობიაროა, რომელიც თბილისში მდებარეობს. გარდა ამისა, „ჩაჩავას კლინიკა“ მომხმარებელს დამატებით ესთეტიკური მედიცინის, პლასტიკური ქირურგიისა და სტომატოლოგიის სერვისს სთავაზობს. კომპანიის ძირითადი წილის მფლობელი და მაკონტროლებელი ელგუჯა გოცირიძეა. საავადმყოფოს შემოსავლების 6.5% საყოველთაო ჯანდაცვიდან მიღებული რესურსებია.
4. ჰელსიკორი (₾ 228 მლნ)
ისრაელ-საქართველოს სამედიცინო კვლევითი კლინიკა „ჰელსიკორი“,რომელიც პაციენტს სხვადასხვა მიმართულებით სამედიცინო მომსახურებას სთავაზობს, თბილისში მდებარეობს. საავადმყოფოს ამონაგების 90.3% სტაციონარული მომსახურების მიწოდებიდან მიღებული შემოსავალია. კომპანიის ყველაზე დიდი, 36%-იანი წილის მფლობელი თამარ ემუხვარია.
5. კ. ერისთავის სახელობის ექსპერიმენტული და კლინიკური ქირურგიის ეროვნული ცენტრი (₾ 209 მლნ)
„ქირუგიის ეროვნული ცენტრი“ მრავალპროფილური საავადმყოფოა, რომელიც ძირითადად ორიენტირებულია ქირურგიულ და მაღალტექნოლოგიურ სერვისებზე. კომპანიის დირექტორი ლალი ივანიშვილია, ხოლო ცენტრს პაატა კურტანიძე (67%) და ნიკოლოზ კურტანიძე (33%) ფლობენ.
ასევე იხილეთ: ყველაზე მოგებიანი საავადმყოფები
შენიშვნა
ქართულ ბაზარზე წარმოდგენილ კომპანიებში იგულისხმება ისეთი იურდიული პირები, რომლებსაც დაფუძნებული/რეგისტრირებული და საწარმოო პროცესის ძირითადი ნაწილი საქართველოში აქვთ. კომპანიის მფლობელების შესახებ დეტალები წარმოდგენილია 15.05.2025-ისთვის საჯარო წყაროებზე არსებული ინფორმაციის მიხედვით.
მეთოდოლოგია
კომპანიის ღირებულების შეფასებისთვის გამოყენებულია EV/EBITDA-მიდგომა. კერძოდ, კომპანიის ღირებულება გამოთვლილია საოპერაციო მოგებას (ვალის მომსახურების ხარჯი, გადასახადები, ცვეთა და ამორტიზაცია) და განვითარებული ეკონომიკების ცალკეული ინდუსტრიებისთვის გაანგარიშებული მულტიპლიკატორის ნამრავლით, რომელსაც შემდეგ აკლდება კომპანიის წმინდა ვალი. საბოლოოდ მიღებული სიდიდე განხილულია, როგორც კომპანიის ღირებულება. იმ შემთხვევაში, როცა კომპანიას საოპერაციო ზარალი აქვს (უარყოფითი მაჩვენებელი) და შემოსავლების დინამიკა იძლევა მომავალში მოგების მიღების პერსპექტივას, ღირებულების შესაფასებლად ვიყენებთ EV/Sales-მიდგომას. კერძოდ, კომპანიის ამონაგებსა და მულტიპლიკატორს შორის ნამრავლს ვაკლებთ წმინდა ვალების მოცულობას.
კომპანიების ღირებულების შეფასება და რეიტინგის მომზადება ეფუძნება მათი 2023 წლის ფინანსურ ანგარიშებს, რომელთა წყარო ბუღალტრული აღრიცხვის, ანგარიშგებისა და აუდიტის ზედამხედველობის სამსახურის ანგარიშების პორტალში წარმოდგენილი ფინანსური და მმართველობითი ანგარიშგებებია. კომპანიის შესახებ დამატებითი ინფორმაცია მოპოვებულია საჯარო რეესტრიდან, საკუთარი ვებგვერდიდან და სხვა საჯარო წყაროებიდან.
"Forbes Georgia-ის სარედაქციო ბლოგპოსტების სერია "როგორ გამდიდრდა“ და "საქართველო რეიტინგებში".
