2020 წლის 50 ბესტსელერი საქართველოდან

საგამომცემლო ინდუსტრია მნიშვნელოვანი გამოწვევების წინაშეა, თუმცა ბეჭდური პროდუქცია, განსაკუთრებით კი წიგნები, დღემდე მკითხველების ფავორიტ მედიუმად რჩება. მიუხედავად იმისა, რომ ელექტრონული და აუდიოწიგნების მიმართულება სწრაფად ვითარდება, მთელი მსოფლიოს მასშტაბით, ადამიანები არჩევანს კვლავ მაღაზიაში მისვლისა და ფურცვლის სასარგებლოდ აკეთებენ.

ყოველწლიურად მსოფლიოში წიგნების ბეჭდვითა და რეალიზაციით კომპანიები 122 მილიარდი აშშ დოლარის შემოსავალს იღებენ. ციფრული გამოცემები კი მხოლოდ 22.05 მილიარდი აშშ დოლარის გენერირებას ახერხებენ შემოსავლის სახით.

აღნიშნულ ტენდენციას საქართველოც მიჰყვება და მიუხედავად პოპულარული ელექტრონული საკითხავი აპლიკაციებისა და აუდიოწიგნებისა, ძირითადი მოთხოვნა მაინც ბეჭდურ წიგნებზეა.

Forbes Georgia და საქართველოს წიგნის გამომცემელთა და გამავრცელებელთა ასოციაცია წარმოგიდგენთ 2020 წლის ყველაზე გაყიდვად 50 წიგნს საქართველოდან.

ფეხებზე დაკიდების ნატიფი ხელოვნება

ავტორი: მარკ მენსონი
გამომცემლობა: პალიტრა L

„მარკ მენსონის წიგნი „ფეხებზე დაკიდების ნატიფი ხელოვნება“ შემთხვევით აღმოვაჩინე. 2018 წლის დასაწყისი იყო. უბრალოდ, „გუგლში“ ჩავწერე ყველაზე პოპულარული წიგნები. ეს წიგნი ათეულში შედიოდა. ჩემი ყურადღება სათაურმა მიიქცია. წიგნის შეძენამდე სარჩევს გადავავლე თვალი. წიგნი ხუთ დღეში წავიკითხე. საკმაოდ რთული პერიოდი მქონდა, ეგზისტენციურ კრიზისს რომ ეძახიან. წიგნში წაკითხული თითოეული წინადადება იმდენად მნიშვნელოვანი და გადამწყვეტი იყო, რომ ერთ ადგილზე ვეღარ ვისვენებდი. ეს არის წიგნი ცხოვრების შესახებ, დაწერილი ერთი ჩვეულებრივი ადამიანის მიერ, რომელსაც არც სადოქტორო აქვს დაცული და არც ძეგლი უდგას სადმე. უბრალოდ, ადგა, ძალიან ბევრი იფიქრა, იწვალა და არასრულფასოვნების კომპლექსიც დაძლია. შემდეგ გადაწყვიტა, თავისი ცხოვრებისეული მიგნებებითა და გამოცდილებით მილიონობით ადამიანს დახმარებოდა და ეს წიგნი დაწერა. ჩემი აზრით, ძალიან კარგად გამოუვიდა“, – დავით ჩიკვაიძე, კონსულტანტი.

სრული რეიტინგი