ფოტო: David Paul Morris / Bloomberg / Getty Images
ჩიპების დიზაინერი ბრიტანული Arm Holdings-ის აქციების ფასი დღეს, 25 მარტს, 18%-ზე მეტით გაიზარდა მას შემდეგ, რაც კომპანიის აღმასრულებელმა დირექტორმა რენე ჰაასმა ახალი AI-ჩიპისგან მილიარდობით დოლარის შემოსავლის მიღების პროგნოზი გააჟღერა.
Arm-ის აქციების ღირებულება 18.3%-ით გაიზარდა და თითქმის $160-ს მიაღწია. აღსანიშნავია, რომ ეს ყველაზე მაღალი მაჩვენებელია მას შემდეგ, რაც ნოემბერში კომპანიის აქციების ფასმა ამ ნიშნულს გადააჭარბა. ჰაასმა სამშაბათს გამართულ ღონისძიებაზე ისაუბრა და განაცხადა, რომ კომპანიის პირველი ჩიპი AGI CPU წლიურად დაახლოებით $15 მილიარდს გამოიმუშავებს და 2031 წლისთვის გაყიდვებს $25 მილიარდამდე გაზრდის, ხოლო მოგება თითო აქციაზე $9-ს მიაღწევს.
ეს პროგნოზი მნიშვნელოვნად აღემატება კომპანიის 2025 წლის $4-მილიარდიან შემოსავალს და ასევე 414%-ით მეტია იმ $1.75-თან შედარებით, რასაც მიმდინარე ფისკალურ წელს თითო აქციაზე ელოდებიან. კომპანიის ინფორმაციით, ახალი ჩიპის პირველი ოფიციალური მომხმარებელი Meta იქნება, რომელსაც მას OpenAI, Cloudflare და SAP შეუერთდებიან.
Citi-ის ანალიტიკოსების განცხადებით, Arm-ის გადაწყვეტილება, თავად აწარმოოს ჩიპები და კონკურენცია გაუწიოს ისეთ გიგანტებს, როგორებიცაა Nvidia, Microsoft, Google და Amazon, მისი ისტორიის ყველაზე მნიშვნელოვანი სტრატეგიული ცვლილებაა. Simon Leopold-ის შეფასებით, ჩიპების წარმოებაზე გადასვლა კომპანიას ძლიერ საოპერაციო მოგებას მოუტანს და ზრდას დამატებით იმპულსს მისცემს.
ოთხშაბათის რალიმ Arm-ის საბაზრო კაპიტალიზაციას $14.1 მილიარდი შემატა და ის $167.1 მილიარდამდე გაზარდა. შეგახსენებთ, კომპანიის კაპიტალიზაციამ 2024 წელს თითქმის $190 მილიარდს მიაღწია, თუმცა გასულ წელს $100 მილიარდზე ქვემოთ დაეცა.
