ფოტო: Bloomberg / Getty Images
Nvidia-ს აქციების ფასი ორშაბათს დაახლოებით 2.5%-ით შემცირდა მას შემდეგ, რაც Financial Times-მა გაავრცელა ინფორმაცია, რომ ჩიპების მწარმოებელი კომპანია AI-ინფრასტრუქტურის დასაფინანსებლად უოლ-სტრიტის უმსხვილეს ფინანსურ ინსტიტუტებთან თანამშრომლობს. გავრცელებული ინფორმაციით, საუბარია დაახლოებით $500 მილიარდის მოცულობის დაფინანსების პაკეტზე, რამაც ინვესტორებში სექტორში რისკების შესახებ კითხვები გააჩინა.
ვაჭრობის მიმდინარეობისას Nvidia-ს აქციების ფასი დაახლოებით $218-მდე შემცირდა. კომპანიის საბაზრო კაპიტალიზაციამ კი $130 მილიარდით იკლო, ხოლო დღის განმავლობაში აქციების ვარდნამ გარკვეულ მომენტში 3%-საც მიაღწია. ამასთან, ისიც უნდა ითქვას, ბოლო ხუთ სავაჭრო დღეს Nvidia-ს აქციები 5.6%-ით იყო გაძვირებული.
Financial Times-ის ინფორმაციით, Nvidia AI-ინფრასტრუქტურაში ინვესტირებისთვის Apollo Global Management-თან, Blackstone-თან, BlackRock-თან, Brookfield Asset Management-თან, Goldman Sachs-თან და KKR-თან თანამშრომლობს. გამოცემა ინფორმაციას ექვს წყაროზე დაყრდნობით ავრცელებს.
Nvidia-ს სტრატეგიის ნაწილია AI-ს პარტნიორი კომპანიებისთვის ფინანსური მხარდაჭერის უზრუნველყოფა, რათა მათ ვალის მოზიდვა შეძლონ. ეს, თავის მხრივ, კომპანიებს Nvidia-ს ჩიპების შესყიდვების გაზრდის შესაძლებლობას აძლევს. თუმცა მსგავსი გარიგებების მასშტაბის ზრდამ ტექნოლოგიურ სექტორში რისკების შესახებ შეშფოთებაც გააძლიერა.
Nvidia-ს აქციების ვარდნასა და Oracle-ის დადებით დინამიკას კიდევ ერთი შედეგი მოჰყვა: Oracle-ის თანადამფუძნებელმა ლარი პეიჯმა Nvidia-ს აღმასრულებელ დირექტორს ჯენსენ ჰუანგს მსოფლიოს უმდიდრეს ადამიანთა რეიტინგში გადაასწრო. დღის მეორე ნახევარში ელისონის ქონება დაახლოებით $192 მილიარდად, ჰუანგის კი $188.6 მილიარდად იყო შეფასებული.
ინვესტორები Nvidia-ს კვარტალურ შედეგებს 26 აგვისტოს ელოდებიან. კომპანიის მეორე კვარტლის ფინანსური ანგარიშგება ბაზარს საშუალებას მისცემს შეაფასოს, რამდენად ამართლებს AI-ჩიპებზე არსებული მოთხოვნა იმ მასშტაბურ ინფრასტრუქტურულ ინვესტიციებს, რომლებსაც Nvidia და სხვა კომპანიები, მათ შორის Intel-ი და CoreWeave-ი, ახორციელებენ.
Nvidia ბოლო პერიოდში AI-ინფრასტრუქტურის ერთ-ერთ მთავარ კომპანიად ჩამოყალიბდა. კომპანიის მიერ პირველ კვარტალში მიღებულმა შემოსავალმა $81.6 მილიარდი შეადგინა, რაც წლიურად დაახლოებით 85%-ით გაზრდილი მაჩვენებელია, ხოლო წმინდა მოგებამ $58.3 მილიარდს მიაღწია.
