ბათუმის „ცენტროპოლისი“

აქ ამბობენ, რომ წარმატების ისტორია თამამი იდეებით იწყება. ასე დაიწყო მათი ისტორიაც და ასევე გრძელდება. „ალიანს ჯგუფს“, რომელიც დეველოპერულ ბაზარზე 2005 წლიდან გამოჩნდა, ბათუმის უძრავი ქონების რევოლუციაში დიდი წვლილი აქვს. ჯერ იყო პირველი თანამედროვე საცხოვრებელი სახლების მშენებლობა, ასევე საქართველოში პირველი აპარტოტელის მშენებლობა, შემდეგ არაერთი მსოფლიო დონის ბრენდული სასტუმროს ამ ზღვისპირა ქალაქში შემოყვანა, ახლა კი კომპანიას განზრახული აქვს, ბათუმი საქმიანი ტურიზმისა და ბიზნესების განვითარების ცენტრად აქციოს. იდეას, რომელიც პანდემიამდე გაჩნდა, ხოლო მისი განხორციელება პანდემიის დროს დაიწყო, „ალიანს ცენტროპოლისი“ ჰქვია. პროექტის საწყისი საინვესტიციო ღირებულება $420 მლნ-ია, დასრულების ვადა კი 2028 წელი. პროექტი აერთიანებს ბიზნესცენტრს, სავაჭრო ცენტრს, აპარტამენტებს, „ჰაიატის“ ბრენდის სასტუმროს, კაზინოს და „მსოფლიო სავაჭრო ცენტრს“ – „WTC“, რომელიც ნიუ-იორკის, პარიზის, ლონდონის, დუბაის, ჰონკონგის, ტოკიოს, სიდნეის და კიდევ ათზე მეტი მსოფლიოს უმსხვილესი ქალაქის შემდეგ ბათუმშიც დაიდებს ბინას. როგორც პროექტის ავტორები ამბობენ, აჭარის ცენტრში თავს მოიყრის არაერთი საერთაშორისო კომპანია, ბიზნესი და საქმიანი ტურისტი. თუ როგორ აპირებენ ამ იდეის რეალობად ქცევას, ამის შესახებ „ალიანს ჯგუფის“ ბიზნესის განვითარების ხელმძღვანელი, თემურ ბიწაძე გვიყვება.

ბატონო თემურ, დავიწყოთ ბიზნესცენტრით, რომელიც, როგორც თქვენ ამბობთ, საქმიანი ტურიზმის სექტორში პრემიუმ-კლასის ერთ-ერთი პირველი პროექტი იქნება არა მხოლოდ საქართველოში, არამედ მთელ რეგიონში. რატომ აირჩიეთ ამ პროექტისთვის ბათუმი?

საქართველოში იურიდიული პირების რაოდენობა ბოლო მონაცემებით 177,000-ია, რაც მოსახლეობის რიცხოვნობასთან შედარებით საკმაოდ მაღალი მაჩვენებელია. თბილისში ძალიან ბევრი ბიზნესცენტრი აშენდა და შენდება. დედაქალაქი საოფისე სივრცეების მხრივ თითქმის გაჯერებულია, ბათუმი კი ამ მიმართულებით ფაქტობრივად აუთვისებელია. ვიცით, რომ უახლოეს მომავალში ამ ზღვისპირა ქალაქში ბიზნესცენტრების კუთხით თითქმის არაფერი იგეგმება. სწორედ ეს იყო უპირველესი ფაქტორი, რის გამოც ჩვენ ბიზნესცენტრის აშენება ბათუმში გადავწყვიტეთ. გარდა ამისა, ბათუმში ბიზნესოფისები სხვადასხვა ქუჩაზეა განთავსებული და შეიმჩნევა მათი ბიზნესცენტრებში მიგრაციის პოტენციალი, რაც კარგი ტენდენციაა და ჩვენთვისაც არგუმენტია იმისა, რომ ბათუმში ბიზნესცენტრის საჭიროება დგას. ჩვენ გადავწყვიტეთ, რომ უცხოურ კომპანიებზეც გაგვეკეთებინა აქცენტი, რა კუთხითაც ბათუმის საოფისე ბაზრის განვითარება განსაკუთრებით მოგებიანია. ეს არა მხოლოდ ბათუმისთვის, არამედ მთელი ქვეყნისთვისაც მნიშვნელოვანი იქნება, ვინაიდან სწორედ აქ დაიწყება საერთაშორისო კომპანიების კონცენტრაცია.

„ალიანს ცენტროპოლისში“ განთავსდება „მსოფლიო სავაჭრო ცენტრიც“, რომელიც საქმიანი ტურიზმის ეპიცენტრად გინდათ, აქციოთ. გამომდინარე იქიდან, რომ ე.წ. MICE-ტურიზმი საქართველოში ახლა იკიდებს ფეხს, რას ელით ამ პროექტისგან?

მნიშვნელოვანია, რომ ეს არ იქნება ჩვეულებრივი სავაჭრო ცენტრი, სადაც სავაჭრო ობიექტებია განთავსებული, რასთანაც მას, მსგავსი სიტყვათა შეთანხმებიდან გამომდინარე, საქართველოში აიგივებენ. ამიტომ უკეთესია, ვუწოდოთ „მსოფლიო ვაჭრობის ცენტრი“. ეს იქნება World Trade Centers Association-ის წარმომადგენლობა საქართველოში, რომელიც მსოფლიოში ვაჭრობის ერთ-ერთი უმსხვილესი ასოციაციაა. იგი 300-ზე მეტ ორგანიზაციას აერთიანებს და 100-ზე მეტ ქვეყანაშია წარმოდგენილი, მათ შორის ვიქნებით ჩვენც. „მსოფლიო ვაჭრობის ცენტრის“ საქართველოში შემოსვლა აქაური ბიზნესებისთვის ერთგვარი მედიატორის როლს შეასრულებს საერთაშორისო ბაზარზე. აქ მოხდება ვაჭრობის მსოფლიო გამოცდილების გაზიარება. მაგალითად, ბიზნესს, რომელიც საქართველოში ოპერირებს და გლობალურ ბაზარზე გასვლა სურს, „მსოფლიო ვაჭრობის ცენტრი“ ამ პროცესში დაეხმარება. „მსოფლიო ვაჭრობის ცენტრში“, როგორც წესი, თავმოყრილი არიან პროფესიონალები, ექსპერტები, მათი ცოდნა და გამოცდილება გამოადგება როგორც ადგილობრივ ბაზარს, ასევე უცხოურ ბიზნესებს აქაური ბაზრის გაცნობაში.

ვიცით, რომ ბათუმი ცნობილია საზაფხულო ტურიზმით და მხოლოდ დაახლოებით ექვსი თვის განმავლობაშია ტურისტულად მიმზიდველი. დანარჩენი ექვსი თვე კი ტურისტების ნაკლებობას განიცდის, მიუხედავად იმისა, რომ ყველანაირი ინფრასტრუქტურაა შექმნილი კარგი დასვენებისთვის, მათ შორის: სავაჭრო ობიექტები, მოწესრიგებული სასეირნო ზღვისპირა ზოლი და ბულვარი, რესტორნები, გასართობი სივრცეები, კლუბები, კაზინოები… როგორ შეიძლება მოიზიდოს ამ ქალაქმა ტურისტი დანარჩენი ექვსი თვის განმავლობაში? სწორედ ამ კონტექსტშია მნიშვნელოვანი საქმიანი ტურიზმი. თუ ბათუმს წინ წამოვწევთ, როგორც საქმიანი ტურიზმის ერთ-ერთ ლოკაციას, ეს მნიშვნელოვანი შედეგების მომტანი იქნება როგორც თავად ამ ქალაქისთვის, ისე მთელი საქართველოსთვის. „მსოფლიო ვაჭრობის ცენტრი“ კი ამაში დაგვეხმარება. როდესაც მსგავსი ასოციაცია შემოდის ქვეყანაში, უნდა ელოდო, რომ, თავისი კონტაქტების წყალობით, მარტივად მოიზიდავს საერთაშორისო კონფერენციებს, გამოფენებს, შეხვედრებს. ჩვენ განზრახული გვაქვს, ბათუმი MICE-ტურიზმის რეგიონულ ჰაბად ვაქციოთ.

როგორ გეგმავთ ამის მიღწევას? რა გაძლევთ იმის იმედს, რომ ისინი ნამდვილად შემოვლენ საქართველოში?

მსოფლიო პრაქტიკა გვიჩვენებს: როდესაც საერთაშორისო კომპანიები ხედავენ, რომ რომელიღაც ქვეყანაში „მსოფლიო ვაჭრობის ცენტრი“ შევიდა, მათ აუცილებლად უჩნდებათ იმ ბაზარზე შესვლის სურვილი.

გარდა ამისა, საქართველო სტრატეგიულ ადგილას მდებარეობს – აბრეშუმის გზას თუ გავითვალისწინებთ. „ალიანსი“ აპირებს ამ შესაძლებლობის გამოყენებას, ჩვენ ორგანიზაციაში ვგეგმავთ სპეციალური გუნდის შექმნას, რომელიც უცხოელი საქმიანი ადამიანების, კონფერენციების, გამოფენების მოზიდვაზე იზრუნებს. საქართველოს საკვანძო მდებარეობიდან გამომდინარე, მოლოდინი გვაქვს, რომ ბევრი მსხვილი საერთაშორისო ორგანიზაციის წარმომადგენლობა, ასევე საბროკერო, სადაზღვევო, ლოგისტიკური თუ სატრანსპორტო კომპანია დაიწყებს საქართველოში ოპერირებას, რათა ევროპისა და აზიის დაკავშირება მოხდეს, ეს პროცესი გარდაუვალია. ჩვენი გუნდი კი მათთან დაამყარებს ურთიერთობას, რომ ხელსაყრელი პირობებით მოხდეს მათი ოფისების განთავსება ჩვენს ბიზნესცენტრში, რომელიც დაახლოებით 10 000 კვ/მ იქნება. ასევე ყველა მსგავსი კომპანია აუცილებლად მოისურვებს „მსოფლიო ვაჭრობის ცენტრში“ ერთი ოფისის ქონას, რაც ამ პროექტს მიზნის მიღწევაში დაეხმარება.

ყველა პროექტს, მათ შორის მსგავსი მასშტაბური პროექტების განხორციელებას, ყოველთვის თან ახლავს რისკები. თქვენ რა დაბრკოლებებს ხედავთ იმ ფონზე, რომ მსოფლიო ტურიზმის აღდგენას, სხვადასხვა გათვლით, 2-4 წელი დასჭირდება?

პანდემია ერთ-ერთი ყველაზე დიდი რისკია, რომელიც დღევანდელ სამყაროში შეიძლება ნებისმიერ ბიზნესს ჰქონდეს. ჩვენი ერთადერთი რისკიც სწორედ ამას უკავშირდება. ჩვენთვის დღეს სავარაუდო და შესაძლო დაბრკოლება პანდემიის შედეგად გამოწვეული შეზღუდვებია, რამაც შესაძლოა, მუშაობაში ხელი შეგვიშალოს. მაგრამ გამომდინარე იქიდან, რომ, პროგნოზების მიხედვით, გლობალური ტურიზმის აღდგენას მაქსიმუმ ოთხი წელი დასჭირდება და ჩვენი პროექტის დასრულებაც სწორედ ამ ვადაში იგეგმება, ვფიქრობთ, რისკები, რომელთაც ვხედავთ, ფაქტობრივად ნულამდე შემცირდება.

„ალიანს ჯგუფმა“ საქართველოში მსოფლიო დონის ისეთი არაერთი სასტუმრო ბრენდი შემოიყვანა, როგორიცაა „მერიოტი“, „ვინდემი“, „ჰილტონი“. ახლა კი „ჰაიატის“ შემოყვანასაც გეგმავთ. რა ეტაპებს და პროცედურებს გადიხართ იმისათვის, რომ მსგავსი დონის ბრენდები ამ პატარა ბაზარზე შემოიყვანოთ? და რა დაბრკოლებები შეგხვდათ „ჰაიატის“ დათანხმების პროცესში?

საქართველო მცირე ზომის ბაზრად აღიქმება, რის გამოც ბევრ ბრენდთან მოლაპარაკებებისას წინაღობას ვაწყდებით ხოლმე. ყველაზე რთული იყო 2015 წელს „მერიოტის“ შემოყვანის პროცესი, ვინაიდან ამ მხრივ ეს ჩვენი პირველი ნაბიჯი გახლდათ. როდესაც კომპანია, რომელსაც მსგავს ბრენდებთან თანამშრომლობის გამოცდილება არ გააჩნია, იწყებს საერთაშორისო დონის სასტუმროს შემოყვანას, თანაც მაღალი ამბიციებიდან გამომდინარე იწყებს „მერიოტით“, რთულია, წარმატებას მიაღწიოს. ამიტომ წელიწადზე მეტი დაგვჭირდა მოლაპარაკებებისთვის, ვიდრე „მერიოტმა“ არ შეისწავლა „ალიანსის“ პრეისტორია, პროექტები, მასთან დაკავშირებული პერსონებიც კი. შემდეგ კი „ვინდამთან“ მარტივი იყო მოლაპარაკება, ისევე როგორც „ჰილტონთან“, ვინაიდან უკვე გვქონდა გამოცდილება. გარდა ამისა, მსგავსი ბრენდების შემოსვლას ეხმარება ტურიზმის კარგი მაჩვენებლებიც, რაც პანდემიამდე საქართველოში საკმაოდ მზარდი იყო.

რაც შეეხება „ჰაიატს“, მასთან მოლაპარაკება 2019 წელს დავიწყეთ, თუმცა იმ წელსვე უარი მივიღეთ. ამის მიზეზი ამ ბრენდის საქართველოსთან დაკავშირებით რამდენიმე წარუმატებელი ისტორია გახდა. თუმცა მას შემდეგ, რაც 2020 წლის იანვრის ბოლოს გავაფორმეთ ხელშეკრულება „მსოფლიო ვაჭრობის ცენტრთან“, რომელიც საერთაშორისო ბრენდებთან თანამშრომლობის კუთხით ზურგს გვიმაგრებდა, გადავწყვიტეთ, კიდევ ერთხელ მიგვემართა „ჰაიატისთვის“. მართლაც, 2020 წლის ოქტომბერში მოგვცეს თანხმობა. ეს მოხდა პანდემიის მეორე ტალღის დროს, რაც დიდი წარმატება იყო. ეს იმაზე მეტყველებს, რომ ჩვენი კომპანიის სანდოობა და რეპუტაცია საერთაშორისო ბაზარზე კიდევ უფრო გაიზარდა.

„ალიანს ცენტროპოლისი“ აპარტამენტების სივრცეებსაც მოიცავს. ვინ არიან თქვენი ძირითადი მომხმარებლები და რა შედეგები გაქვთ გაყიდვებში?

ბათუმში აპარტამენტების გაყიდვების ყველაზე დიდი წილი რუსეთის მოქალაქეებზე მოდიოდა. თუმცა 2019 წელს რუსეთის მიერ პირდაპირი ფრენების შეწყვეტის შემდეგ მათი წილი შემცირდა. ასევე სომხეთისა და აზერბაიჯანის მოქალაქეების მხრიდანაც დაეცა მოთხოვნა მათი გასული წლის კონფლიქტიდან გამომდინარე და ბოლოს უკვე, ასევე კონფლიქტის გამო, ისრაელის მოქალაქეების მხრიდანაც შემცირდა გაყიდვების წილი. ამ ყველაფრის გათვალისწინებით, რაც ეტაპობრივად ჩვენს გაყიდვებზე აისახებოდა, დიდი გამოწვევის წინაშე დავდექით. მხოლოდ ქართულ ბაზარზე ვერ ვიქნებოდით დამოკიდებული. პრემიუმ-სეგმენტი მხოლოდ ადგილობრივ ბაზარზე ვერ იმუშავებს, ვინაიდან ადგილობრივებზე გაყიდვების მხოლოდ მესამედი მოდის. აქედან გამომდინარე, დავიწყეთ სხვა ბაზრების მოძიება და მოზიდვა, მათ შორის არაბული ქვეყნების, ცენტრალური აზიის ქვეყნების, ასევე იაპონიის მოქალაქეების. შედეგსაც მივაღწიეთ. ჩვენმა გუნდმა გაყიდვების გაფართოება ამ ბაზრებზე საკმაო წარმატებით განახორციელა და დააკომპენსირა იმ ქვეყნების წილი, საიდანაც გაყიდვები შემცირებული გვქონდა. ამიტომაც მნიშვნელოვანია, რომ, როდესაც გამოწვევას დაბრკოლება ხვდება, ადეკვატურად უპასუხო, შესაბამისი ნაბიჯები გადადგა.

ბათუმში უძრავი ქონების ბაზარი მიმდინარე წლის ივნისში 2019 წლის ანალოგიურ პერიოდთან შედარებით 47%-ით გაიზარდა. რა მოლოდინი გაქვთ ამ კუთხით? გამომდინარე იქიდან, რომ თქვენი მიმდინარე პროექტების დიდი ნაწილი სწორედ ამ ქალაქშია კონცენტრირებული, რამდენად გრძნობთ მზარდ კონკურენციას?

ბათუმის ბაზარზე ძალიან ბევრი პრემიუმ-კლასის პროექტი გაჩნდა, თუმცა ჩვენ პირველი კომპანია ვიყავით, რომელმაც აპარტოტელის ნაწილში საერთაშორისო ბრენდი შემოიყვანა. ამის შემდეგ ბევრმა დეველოპერმა დაიწყო მსგავსი კონცეფციის შეთავაზება ბაზრისთვის. თუმცა მათი საფასო კატეგორია, კონცეფცია, ხარისხი და ინფრასტრუქტურა, ჩვენგან მნიშვნელოვნად განსხვავდება. შეიძლება თამამად ვთქვა, რომ ჩვენს სეგმენტში მოწინავე ადგილი გვიჭირავს, ამიტომაც ბათუმის ბაზარზე, ვფიქრობ, „ალიანს ჯგუფი“ უკონკურენტოა.

ბათუმში ახალაშენებული ბინების პრემიუმ-სეგმენტშია ყველაზე მაღალი ზრდა. კერძოდ, წელს, ივნისში, სამჯერ მეტი ტრანზაქცია დარეგისტრირდა, ვიდრე 2019 წლის ანალოგიურ პერიოდში. თქვენი დაკვირვებით, რა განაპირობებს ამას მაშინ, როდესაც პანდემიური მდგომარეობიდან ჯერ არ გამოვსულვართ? ეს ზრდა რას ნიშნავს ბიზნესისთვის და რა ტენდენციის მაჩვენებელია?

ამის რამდენიმე მიზეზი შეიძლება იყოს. პირველ რიგში, 2020 წელს 2019 წელთან შედარებით იყო ჩავარდნა, პანდემიისას იყო სურვილი, რომ შეეძინათ ბინები, განეხორციელებინათ ინვესტიცია, მაგრამ არასტაბილურობისა და ბუნდოვანი მომავლის გამო თავს იკავებდნენ. შესაბამისად, 2021 წელს შევხვდით დაგროვილი მოთხოვნით. ასევე, მიმდინარე წელს პოზიტიური მოლოდინები შეიქმნა, გარდა ამისა, ხალხი კრიზისს შეეგუა და პანდემიასთან ადაპტაცია განიცადა. შესაბამისად, მყიდველმა უფრო თამამი ქცევა გამოავლინა. ამიტომაც ეს სტატისტიკა ნაწილობრივ შესაძლოა სწორედ დაგროვილი მოთხოვნის შედეგი იყო. გარდა ამისა, მეორე მიზეზი ალბათ ისიცაა, რომ უძრავი ქონების, როგორც კაპიტალის მიმართ სანდოობა გაიზარდა. 2020-2021 წლებში არასტაბილური ვალუტის კურსის გამო, ხალხმა დაიწყო რესურსების სწორად დაზოგვა და უძრავ ქონებაში ინვესტიცია. ეს ტენდენცია, რა თქმა უნდა, დადებითად აისახება პრემიუმ-სეგმენტში მომუშავე დეველოპერებზე, მათ შორის – ჩვენზეც.

როგორ ფიქრობთ, შენარჩუნდება თუ არა ეს ტენდენცია?

გამომდინარე იქიდან, რომ 2020 წელთან შედარებით შესაძლოა ადამიანები უფრო პოზიტიურად არიან განწყობილები მომავლის მიმართ, შეიძლება ეს ტენდენცია შენარჩუნდეს. არის ამის შანსი. ჩვენ მხოლოდ ზაფხულის მაჩვენებლებით ვერ ვიმსჯელებთ, დაველოდოთ შემოდგომას და შემდეგ უკვე უფრო ზუსტი დასკვნის გაკეთება იქნება შესაძლებელი.

თქვენი აზრით, რა შედეგი გამოიღო მთავრობის მიერ დეველოპერული ბიზნესის წახალისების ინიციატივებმა? ვგულისხმობ გასულ წელს ამოქმედებული იპოთეკური სესხის პროცენტის სუბსიდირებას. ასევე, სჭირდება თუ არა 10-წლიანი გეგმის ფარგლებში მრავალშვილიანი ოჯახებისთვის სუბსიდირების პროგრამა ბიზნესს, რომელიც სექტემბრიდან ამოქმედდება?

ზოგადად ნებისმიერი სახის წახალისება ჩვენი სექტორისთვის სასიკეთოა, თუმცა მნიშვნელოვანია, რომ ინიციატივა იყოს უფრო მეტად მიზნობრივი, რა შემთხვევაშიც ის უფრო ეფექტიანი იქნება. 2020 წელს ამოქმედებული სუბსიდირების პროგრამა ძალიან ბევრ დეველოპერს და ოჯახს დაეხმარა, რაც მისასალმებელია. ამან გაყიდვებზეც იმოქმედა, თუმცა, გამომდინარე იქიდან, რომ ჩვენ უფრო მეტად საერთაშორისო ბაზარზე ვკონცენტრირდებით, ნაკლებად ვიგრძენით ეს ეფექტი. ქვეყანაში პირდაპირი უცხოური ინვესტიციების შემცირება საკმაოდ ნეგატიურად აისახა ჩვენს გაყიდვებზეც. ამიტომაც კარგი იქნებოდა, რომ მთავრობის სუბსიდირების ინიციატივა უცხო ქვეყნის მოქალაქეებზეც გავრცელებულიყო.

რაც შეეხება სუბსიდირების მორიგ პროგრამას, მის შესახებ დასკვნების გაკეთება ჯერ ადრეა, ვინაიდან ჯერ არ ამოქმედებულა. თუმცა, თუ ეს სექტორს დაეხმარება, რა თქმა უნდა, მისასალმებელია.

როგორ ფიქრობთ, არ გამოიწვევს ეს პროგრამა ჭარბ მიწოდებას?

გამომდინარე იქიდან, რომ ის ხუთი წლის ვადით იმოქმედებს, არ არის გამორიცხული, რომ ამ პროგრამამ მოთხოვნა გაზარდოს. თუ მოთხოვნა მნიშვნელოვნად გაიზრდება – მიწოდებაც გაიზრდება. მაგრამ ვიდრე უახლოესი ერთი წლის განმავლობაში არ გამოჩნდება, როგორ მუშაობს ეს პროგრამა, მეეჭვება, რომ დეველოპერებმა ეს მიმართულება აიტაცონ.

ლარის კურსის მერყეობის გამო ფასი იზრდება, თქვენ ძირითადად პრემიუმ-სეგმენტში მუშაობთ, რამდენად გიშლით ხელს მერყევი ლარი ბიზნესის პროგნოზირებადობაში?

ვალუტის არასტაბილურობა ბაზრისთვის დიდი დარტყმაა. ერთი მხრივ, ლარში უძრავი ქონება ძვირდება, მეორე მხრივ კი ჩვენ ვერ ვამცირებთ ღირებულებას გამომდინარე იქიდან, რომ სამშენებლო მასალების ფასი ბოლო თვეებში კიდევ უფრო გაიზარდა. საბოლოო ჯამში, ეს ხელს უშლის ადგილობრივ მყიდველებს პროდუქტის შეძენაში. თუმცა, რადგან ჩვენ 60- 70%-ით უცხოელებზე გვაქვს გათვლა, ამიტომ ჩვენს ბიზნესზე ლარის არასტაბილურობა შედარებით უფრო ნაკლებად მოქმედებს, რასაც ადგილობრივ სეგმენტზე მომუშავე დეველოპერებზე ნამდვილად ვერ ვიტყვით.

სტატისტიკის მიხედვით, წლიურად 6-7 მლნ კვ/მ ფართობის მშენებლობის ახალი ნებართვები გაიცემა. შედარებისთვის, დასრულებული უძრავი ქონების მოცულობა ამაზე სამჯერ ნაკლებია და 2-2.5 მლნ კვ/მ-ის ფარგლებშია. თქვენი აზრით, რა განაპირობებს ამას და არის თუ არა ეს დეველოპერებისთვის ფინანსურ რესურსებზე არასაკმარისი წვდომის პრობლემასთან დაკავშირებული?

ამხელა სხვაობა რეალურად დიდი პრობლემაა, ამის მიზეზი შეიძლება გარკვეულწილად იყოს ფინანსურ რესურსებზე არასაკმარისი წვდომა, ასევე შეიძლება იყოს პანდემია, ან კიდევ ის ფაქტი, რომ ეს უარყოფითი სტატისტიკური მაჩვენებელი ბოლო წლებისაა, როდესაც საგრძნობლად იმატა გაცემული ახალი ნებართვების რაოდენობამ და ეს პროექტები ჯერ კიდევ მშენებლობის პროცესშია, ანუ მშენებლობის დასრულების ვადები უმეტეს შემთხვევაში არ ამოწურულა. შესაბამისად, ვფიქრობ, რომ ამ ორ მაჩვენებელს შორის დროთა განმავლობაში შემცირდება სხვაობა. თუმცა ცხადია, რომ დღეს მშენებლობის უმრავლესობა მცირედი ინვესტიციით იწყება და სრულად დამოკიდებული ხდება უძრავი ქონების რეალიზებაზე. თუ რეალიზება არ მოხდა, მაშინ დეველოპერული კომპანია ურესურსოდ რჩება – არა აქვს ფინანსური რესურსი, რომ მშენებლობა ბოლომდე მიიყვანოს, რაც შემდეგ იწვევს გადავადებას ან მშენებლობის შეჩერებას, დაკონსერვებას და ა.შ.

დაბოლოს, „ალიანს ცენტროპოლისის“ გარდა, თქვენს მიმდინარე პროექტებს შორისაა ბათუმში “ალიანს პალასი” და “ალიანს ფრივილიჯი”, ქობულეთში გამაჯანსაღებელი კომპლექსი და თბილისში “ალიანს ჰაილაინი”. რა ეტაპზეა ისინი და კიდევ რა სიახლეებს უნდა ველოდოთ თქვენგან?

„ალიანს პალასის“ აპარტამენტების ნაწილი და მისი შემადგენელი მაღალი დონის საავტორო რესტორანი უკვე ფუნქციონირებს. „ალიანს ფრივილიჯი“, რომელშიც „მერიოტია“ განთავსებული, თითქმის დასრულებულია, ამჟამად გარე ფასადის სამუშაოები მიმდინარეობს და წლის ბოლოს დასრულდება. თბილისის „ალიანს ჰაილაინის“ პროექტიც თითქმის იმავე დონეზეა. ქობულეთში კი, სადაც „ჰილტონ გარდენ ინნი“ და აპარტამენტები იქნება განთავსებული, სამუშაოები ჯერ არ დაწყებულა. გამომდინარე იქიდან, რომ აქტიურად მიმდინარეობს „ალიანს ცენტროპოლისის“ მშენებლობა, არსებული ვითარების გათვალისწინებით, ქობულეთის პროექტის დაწყების ვადა გადავწიეთ, მდგომარეობის დასტაბილურებას ველოდებით.

გარდა იმისა, რომ დავასრულებთ ჩვენს მიმდინარე მასშტაბურ პროექტებს, გვაქვს სხვა გეგმებიც არა მხოლოდ საინვესტიციო მიმართულებით, არამედ საქართველოში ახალი ტურისტული სერვისების შეთავაზების კუთხითაც, რაც აქაური ბაზრისთვის ინოვაცია იქნება. ამის შესახებ მომავალში უფრო მეტს მოგიყვებით.