Forbes-ი 2022 წლის ტოპ-2000 კომპანიის რეიტინგს აქვეყნებს

Forbes-ი 2022 წლის ტოპ-2000 კომპანიის რეიტინგს აქვეყნებს

Forbes-ი 2022 წლის Global 2000-ის სიას აქვეყნებს. Global 2000 არის ტოპ-2000 საერთაშორისო კომპანიის რეიტინგი, რომელიც 2003 წლიდან ყოველწლიურად ქვეყნდება. კომპანიების შესაფასებლად Forbes-ი ოთხ ძირითად კრიტერიუმს იყენებს: შემოსავალი, მოგება, აქტივების მოცულობა და საბაზრო ღირებულება.

რეიტინგის სათავეში, ისტორიაში პირველად, ამერიკული საინვესტიციო ჰოლდინგი Berkshire Hathaway აღმოჩნდა, რომელსაც 91 წლის ლეგენდარული ინვესტორი, უორენ ბაფეტი ხელმძღვანელობს. Berkshire-ის საბაზრო კაპიტალიზაცია 741 მილიარდ აშშ დოლარს შეადგენს და მისი აქტივების მოცულობა $960 მილიარდს აღწევს. ერთი წლის განმავლობაში კომპანიამ 276 მილიარდი აშშ დოლარის შემოსავლის მიღება შეძლო, აქედან თითქმის $90 მილიარდი კი მოგება იყო.

მეორე ადგილზე გადაინაცვლა 2021 წლის რეიტინგის ლიდერმა, ჩინურმა ICBC-მა (Industrial and Commercial Bank of China), რომლის აქტივების საერთო მოცულობა 5.5 ტრილიონ აშშ დოლარს შეადგენს, საბაზრო კაპიტალიზაცია კი – $215 მილიარდს. ჩინეთის უმსხვილესმა ბანკმა 208 მილიარდი აშშ დოლარის შემოსავალი მიიღო, მოგება კი $54 მილიარდს შეადგენდა.

Global 2000-ის რეიტინგის მესამე ადგილს ენერგოგიგანტი Saudi Aramco იკავებს, რომელიც ამჟამად მსოფლიოს ყველაზე ძვირად ღირებული კომპანიაა. მისი საბაზრო კაპიტალიზაცია 2.3 ტრილიონ აშშ დოლარს აჭარბებს, აქტივების საერთო მოცულობა კი – $576 მილიარდს.

Forbes-ის რეიტინგში წარმოდგენილი კომპანიების საერთო საბაზრო ღირებულება 76 ტრილიონ აშშ დოლარს აღემატება – ისინი თითქმის $233 ტრილიონის აქტივებს ფლობენ, ყოველწლიურად კი დაახლოებით $47 ტრილიონის შემოსავლის მიღებას ახერხებენ, საიდანაც დაახლოებით 5 ტრილიონი აშშ დოლარი მოგებაა.

Global 2000-ის სიაში 58 ქვეყანაა წარმოდგენილი. რეიტინგიდან ყველაზე მეტი კომპანია აშშ-შია დაფუძნებული (590), მეორე ადგილზე 351 კომპანიით ჩინეთია, ხოლო მესამე ადგილს იაპონია იკავებს. იქ რეიტინგში წარმოდგენილი 196 კომპანიაა დაფუძნებული.

 

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *