ფოტო: newsbytesapp.com
IMAX-მა 2026 წლის ზაფხულის პერიოდში გლობალურ სალაროებში $728 მილიონი გამოიმუშავა, რაც კომპანიის წინა ზაფხულის რეკორდს 73%-ით აღემატება. რეკორდულ შედეგში მნიშვნელოვანი წვლილი კრისტოფერ ნოლანის ფილმმა „The Odyssey“ შეიტანა.
კომპანიის მონაცემებით, რომელიც Memorial Day-დან Labor Day-ის უქმეებამდე პერიოდს მოიცავს, „The Odyssey“-მ IMAX-ის კინოთეატრებში რვა კვირის განმავლობაში $485 მილიონი გამოიმუშავა. ეს მაჩვენებელი თითქმის ორჯერ აღემატება კომპანიის მეორე ყველაზე შემოსავლიანი ფილმის, ჯეიმს კამერონის 2009 წლის „Avatar“-ის შედეგს. ამასთან, აღსანიშნავია, რომ „The Odyssey“-ის კინოგაქირავების პერიოდი ჯერ არ დასრულებულა.
IMAX-ის დაახლოებით 1 800 ეკრანმა, რაც მსოფლიოში არსებული კინოთეატრების 1%-ზე ნაკლებია, სალაროებიდან ზაფხულის გლობალური შემოსავლების 5.8% მიიზიდა.
განსაკუთრებით მაღალი იყო IMAX-ის წილი თავად „The Odyssey“-ის შემოსავალში. ფილმის გლობალური შემოსავალი ამ დროისთვის დაახლოებით $1.6 მილიარდია, საიდანაც 30% IMAX-ის ჩვენებებზე მოდის.
IMAX წლის განმავლობაში გლობალური სალაროებიდან შემოსავლების $1.4 მილიარდამდე გაზრდას ელოდება. კომპანიის პროგნოზში მნიშვნელოვანი როლი მომავალ ფილმებს, მათ შორის „Resident Evil“-ს, „Digger“-ს, „Street Fighter“-ს, „Godzilla Minus Zero“-ს, „The Further Mis-Adventures of Cliff Booth“-სა და „Dune: Part Three“-ს ენიჭება. ამ უკანასკნელმა, რომლის პრემიერაც დეკემბერშია დაგეგმილი, IMAX-ის ისტორიაში ერთ-ერთი ყველაზე მაღალი წინასწარი გაყიდვების მაჩვენებელი უკვე დააფიქსირა.
IMAX-ის წარმატება კომპანიის აქციების ფასზეც აისახა. ბოლო 12 თვეში მისი აქციები თითქმის 70%-ით გაძვირდა, ხოლო 2021 წლის სექტემბრიდან მათი ღირებულება დაახლოებით 250%-ით არის გაზრდილი.
