Merck FDA-სგან კოვიდის ანტივირუსული წამლის გადაუდებელი გამოყენებისათვის ავტორიზაციას ითხოვს

Merck FDA-სგან კოვიდის ანტივირუსული წამლის გადაუდებელი გამოყენებისათვის ავტორიზაციას ითხოვს

Merck-ის განცხადებით, მან სურსათისა და წამლის ადმინისტრაციას ექსპერიმენტული ანტივირუსული წამლის გადაუდებელი გამოყენებისათვის ავტორიზაცია სთხოვა მსუბუქი და საშუალო სიმძიმის კოვიდპაციენტების სამკურნალოდ.

ამერიკულმა ფარმაცევტულმა კომპანიამ აღნიშნული გადაწყვეტილება მას შემდეგ მიიღო, რაც მესამე ფაზის კლინიკურმა შემოწმებამ 1 ოქტომბერს საკმაოდ იმედის მომცემი შედეგები აჩვენა. მედიკამენტი, სახელად მოლნუპირავირი დაახლოებით 50%-ით ამცირებს კოვიდით ახალდაავადებული ადამიანის ჰოსპიტალიზაციის აუცილებლობას.

პრეპარატის მოქმედება სხეულის შიგნით ვირუსის რეპლიკაციის ინჰიბირებით გამოიხატება. განსხვავებით Gilead Sciences-ის მიერ წარმოებული ინტრავენური პრეპარატის, რემდესივირისაგან, Merck-ის მოლნუპირავირის მიღება ორალური გზითაა შესაძლებელი. თუკი შეერთებული შტატების მარეგულირებელი ორგანოები ფარმაცევტულ კომპანიას ავტორიზაციას მისცემს, მაშინ ეს გახდება კოვიდ-19-ის საწინააღმდეგო პირველი პრეპარატი, რომელიც აბის სახითაა მისაღები.

კომპანიის აღმასრულებელი დირექტორის განცხადებით, მედიკამენტი ამერიკელებისათვის წლის ბოლოსათვის იქნება ხელმისაწვდომი. პრეპარატი Merck-მა Ridgeback Biotherapeutics-სთან ერთად შექმნა. კომპანია სურსათისა და წამლის ადმინისტრაციისაგან გადაუდებელი გამოყენებისათვის ავტორიზაციას მომდევნო თვეების განმავლობაში ელოდება.

Merck-მა შეერთებული შტატების მთავრობასთან წლის დასაწყისში შეთანხმება დადო, რომლის მიხედვითაც ავტორიზაციის მიღების შემთხვევაში ამერიკელები მოლნუპირავირის 1.7 მილიონ კურსს მიიღებენ. New York Times-ის ინფორმაციით, მედიკამენტის ხუთდღიანი კურსი ერთ პაციენტზე შეერთებული შტატების მთავრობას დაახლოებით 700 აშშ დოლარი დაუჯდება, რაც ამჟამად არსებული მონოკლონური ანტისხეულების მკურნალობის მესამედს შეადგენს.

დატოვე კომენტარი

3 კომენტარი

  1. […] მოლნუპირავირის მსგავსი ანტივირუსული მედიკამენტების მთავარი მიზანი კოვიდვირუსისასთვის რეპლიკაციაში ხელშეშლაა, რაც საბოლოო ჯამში აფერხებს და ანელებს ვირუსის გავრცელების ტემპებსა და მასშტაბებს. აღნიშნული პრეპარატი კოვიდდადასტურებულ  პაციენტს რამდენიმე კურსად მიეწოდება და ის მნიშვნელოვნად ამცირებს პაციენტის ჰოსპიტალიზაციის რისკს. თუმცა, ჯერჯერობით მისი ღირებულება საკმაოდ მაღალია და ერთი პაციენტის მკურნალობა მოლნუპირავირით $700 ჯდება. […]

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *