Caucasus Research Resource Center-ის (CRRC) სოციალური კვლევის თანახმად, მოსახლეობის უმრავლესობა (80%) ომის დაწყებაზე პასუხისმგებლობას რუსეთის ფედერაციას და პრეზიდენტ ვლადიმირ პუტინს აკისრებს.
საზოგადოებრივი აზრის კვლევა ცხადყოფს, რომ მოქალაქეების მხარდაჭერა უკრაინელი ხალხის მიმართ საკმაოდ მაღალია. გამოკითხულთა უდიდესი ნაწილი (61%) მიიჩნევს, რომ საქართველოს მთავრობამ უკრაინის მიმართ მხარდაჭერა უნდა გაზარდოს. მოსახლეობის 32% თვლის, რომ მთავრობა უკრაინას საკმარისად უჭერს მხარს, გამოკითხულთა უკიდურესად მცირე ნაწილი (2%) კი ფიქრობს, რომ საქართველოს მთავრობამ უკრაინას მხარი საერთოდ არ უნდა დაუჭიროს.
რაც შეეხება საქართველოს შეერთებას დასავლეთის მიერ დაწესებულ სანქციებთან, მოსახლეობის 39% მიიჩნევს, რომ საქართველო რუსეთის წინააღმდეგ დაწესებულ ყველა სანქციას უნდა შეუერთდეს, გამოკითხულთა 27% ფიქრობს, რომ ქვეყანა ზოგიერთ სანქციას უნდა შეუერთდეს, მოსახლეობის მხოლოდ 19% კი თვლის, რომ საქართველო საერთოდ არ უნდა შეუერთდეს სანქციებს.
![](https://scontent.ftbs5-2.fna.fbcdn.net/v/t1.15752-9/275334996_1378563249275366_7257078594861218354_n.jpg?_nc_cat=110&ccb=1-5&_nc_sid=ae9488&_nc_eui2=AeHCpqHT2kefdc-kdKCZR1f2YdY-fq-gpTBh1j5-r6ClMBHbkmS4LTwe_Q5nOdt6k4aB-Fa70FJ6XnzG-pKTZEKi&_nc_ohc=ZfqVlgL_hwcAX8TUWjq&_nc_oc=AQlqJ0N4oeRWeeyGRNjEtDJQQtZ8-RkhGxEzovjqlPt9BEk0kalEeshfCuKF5kpf0bk&_nc_ht=scontent.ftbs5-2.fna&oh=03_AVKNni738knT-_-JlnJZW9inZXFDUjY_L7RtmkUYEeiScQ&oe=6257BDC4)
კვლევის თანახმად, მოსახლეობის უმრავლესობა (64%) პრეზიდენტ სალომე ზურაბიშვილის ბოლოდროინდელ ქმედებებს რუსეთ-უკრაინის ომთან დაკავშირებით დადებითად აფასებს. პრეზიდენტის ქმედებებთან დაკავშირებით ნეგატიური დამოკიდებულება კი გამოკითხულთა მხოლოდ 15 პროცენტს აქვს.
შედარებისთვის, გამოკითხულთა უმეტესობა (42%) საქართველოს პარლამენტის ბოლოდროინდელ ქმედებებს უარყოფითად აფასებს. პარლამენტის ქმედებების მიმართ დადებითად მოსახლეობის მხოლოდ 34%-ია განწყობილი.
პრემიერ-მინისტრ ირაკლი ღარიბაშვილის ქმედებებს რუსეთ-უკრაინის ომთან დაკავშირებით დადებითად გამოკითხულთა 41% აფასებს, ცუდად და ძალიან ცუდად კი – მოსახლეობის 39 პროცენტი.
აღსანიშნავია, რომ პრეზიდენტ ზურაბიშვილის ქმედებებს დადებითად აფასებენ როგორც მმართველი პარტიის, ასევე ოპოზიციური პარტიების მხარდამჭერებიც. პრემიერ-მინისტრის შემთხვევაში კი, დადებითი შეფასებები ძირითადად „ქართული ოცნების“ მხარდამჭერების მხრიდანაა.
![](https://scontent.ftbs5-3.fna.fbcdn.net/v/t1.15752-9/275474639_1000922020570345_4607897916912713822_n.jpg?_nc_cat=107&ccb=1-5&_nc_sid=ae9488&_nc_eui2=AeHtIn0B9_zC-wnq-evsIJIfD1PdI-PyRnMPU90j4_JGc9JwAeOzN8hKquT1MK5TUDdXzqw2J6a73xWiTQVqQLGV&_nc_ohc=8VhGV5Xwp98AX-7Ll5e&tn=3ySnZP7XGnOEndk-&_nc_ht=scontent.ftbs5-3.fna&oh=03_AVKDcMK7epjhM8Dwvf5jM0LRy-X1-tOsbwE-Gb7IEofSwA&oe=62567EF6)
მოსახლეობის 75% მხარს უჭერს საქართველოს ევროკავშირში გაწევრიანებას, 70% – NATO-ში გაწევრიანებას, მოქალაქეთა 75 პროცენტი კი ნაწილობრივ ან სრულად ეწინააღმდეგება ქვეყნის ევრაზიულ ეკონომიკურ კავშირში შესვლას.
![](https://scontent.ftbs5-3.fna.fbcdn.net/v/t1.15752-9/275404010_310789571151609_2133897513384604601_n.jpg?_nc_cat=105&ccb=1-5&_nc_sid=ae9488&_nc_eui2=AeF47BmVFPv3SVLln-HhFVzPBF9JTMdgoYYEX0lMx2Chhq1OnQAA6trYz5_EZK5SiMN5wb_7WuPD5G1pexIlNyZi&_nc_ohc=qJll9oaAmP4AX_vZtGf&_nc_ht=scontent.ftbs5-3.fna&oh=03_AVJYsFZi8BpaHxXagCmJ-04IosHp3tZOo62_CTjNCpYQIA&oe=6255060E)
სატელეფონო გამოკითხვა 7-10 მარტს ჩატარდა და მასში 1,092 სრულწლოვანი მოქალაქე მონაწილეობდა. ცდომილების მაჩვენებელი 2.96%-ს შეადგენს.