Paramount Pictures-ს „Top Gun: Maverick“-ის გამო უჩივიან

Paramount Pictures-ს „Top Gun: Maverick“-ის გამო უჩივიან

1983 წელს ჟურნალ California-ში ეჰუდ იონეიმ სტატია გამოაქვეყნა, რომელიც ფილმ „Top Guns“-ს დაედო საფუძვლად – კინოსურათი სამი წლის შემდეგ გამოვიდა. ცოტა ხნის წინ კი ეკრანებზე ფილმის მეორე ნაწილი, „Top Gun: Maverick“-ი გამოჩნდა. იონეის მემკვიდრეები Paramount Pictures-ს აღნიშნულ კინოსურათთან დაკავშირებით საავტორო უფლებების დარღვევაში ადანაშაულებენ.

ლოს-ანჯელესის ფედერალურ სასამართლოში შეტანილი საჩივრის თანახმად, Paramount Global-ის შვილობილმა კომპანიამ ახალი ფილმის ეჰუდ იონეის სტატიის მიხედვით გადაღებასთან დაკავშირებით ავტორის ოჯახისგან ნებართვა ვერ მიიღო.

ეჰუდის ქვრივი და ვაჟი, რომლებიც ისრაელში ცხოვრობენ, „Top Gun: Maverick“-ის მოგებიდან კომპენსაციის სახით მოცემული დროისთვის გაურკვეველ თანხას ითხოვენ. მათ ასევე სურთ, ფილმის დისტრიბუციისა და „Top Guns“-ის მომდევნო ნაწილების დაბლოკვა.

„ეს პრეტენზიები უსაფუძვლოა და ჩვენ თავს მაქსიმალურად დავიცავთ“, – ნათქვამია Paramount-ის განცხადებაში.

შეგახსენებთ, ცნობილი ამერიკელი მსახიობის, ტომ კრუზის მონაწილეობით გადაღებული ფილმი „Top Gun: Maverick“-ი კინოთეატრებში მაისის ბოლოს გამოჩნდა. აღსანიშნავია, რომ $170-მილიონიანი ბიუჯეტის მქონე კინოსურათის შემოსავალმა ჩრდილოეთ ამერიკაში, სადებიუტო უიკენდზე, 124 მილიონი აშშ დოლარი შეადგინა. რაც შეეხება საერთაშორისო გაყიდვებით მიღებულ შემოსავალს, ბოლო მონაცემებით, ის 557.2 მილიონ აშშ დოლარს უტოლდება.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *