ფოტო: Getty Images
2026 წლის მსოფლიო ჩემპიონატზე მოასპარეზე 48 ეროვნული ნაკრებიდან უმრავლესობამ ტურნირზე მხოლოდ სამი სპორტული ბრენდის – Adidas-ის, Nike-ისა და Puma-ს ფორმებით ითამაშა. Tonton Sports-ის მონაცემების მიხედვით, სწორედ ამ სამმა კომპანიამ მოამარაგა 37 ნაკრები, ხოლო დარჩენილმა 11-მა ნაკრებმა 10 სხვადასხვა მწარმოებლის ფორმა მოირგო.
აღსანიშნავია, რომ წლევანდელ მსოფლიო ჩემპიონატზე მხოლოდ ერთი, ფინალური შეხვედრაა დარჩენილი, რომელშიც ერთმანეთს არგენტინისა და ესპანეთის ნაკრებები დაუპირისპირდებიან. ტურნირის გადამწყვეტ მატჩში ორივე მათგანი Adidas-ის მიერ შეკერილი ფორმით იასპარეზებს.
საფეხბურთო ფორმები ყველაზე მეტ ნაკრებს წელს სწორედ Adidas-მა მიაწოდა, რომელმაც მსოფლიო ჩემპიონატზე 14 გუნდი მოამარაგა. მას Nike-ი მოსდევს 12 ნაკრებით, ხოლო მესამე ადგილზე Puma-ა 11 ნაკრებით.
| ბრენდი | ნაკრებების რაოდენობა | ქვეყნები |
|---|---|---|
| Adidas | 14 | ალჟირი, არგენტინა, ბელგია, კოლუმბია, კიურასაო, გერმანია, იაპონია, მექსიკა, კატარი, საუდის არაბეთი, შოტლანდია, სამხრეთი აფრიკა, ესპანეთი, შვედეთი |
| Nike | 12 | ავსტრალია, ბრაზილია, კანადა, ხორვატია, ინგლისი, საფრანგეთი, ნიდერლანდები, ნორვეგია, სამხრეთი კორეა, თურქეთი, აშშ, ურუგვაი |
| Puma | 11 | ავსტრია, ჩეხეთი, ეგვიპტე, განა, კოტ-დ’ივუარი, მაროკო, ახალი ზელანდია, პარაგვაი, პორტუგალია, სენეგალი, შვეიცარია |
| Kelme | 2 | ბოსნია და ჰერცეგოვინა, იორდანია |
| Capelli | 1 | კაბო-ვერდე |
| Umbro | 1 | კონგოს დემოკრატიული რესპუბლიკა |
| Marathon | 1 | ეკვადორი |
| Saeta | 1 | ჰაიტი |
| Majid | 1 | ირანი |
| Jako | 1 | ერაყი |
| Reebok | 1 | პანამა |
| Kappa | 1 | ტუნისი |
| 7Saber | 1 | უზბეკეთი |
მსხვილი გლობალური კომპანიების პარალელურად, მსოფლიო ჩემპიონატზე რამდენიმე მცირე ზომის მწარმოებელიც იყო წარმოდგენილი. მაგალითად, ესპანური Kelme ერთადერთი მცირე ზომის ბრენდია, რომელმაც წლევანდელ მსოფლიო ჩემპიონატზე ფორმებით ერთზე მეტი ნაკრები მოამარაგა: ბოსნია და ჰერცეგოვინა და იორდანია.
დანარჩენი კომპანიები თითო ეროვნულ გუნდთან თანამშრომლობდნენ. მათ შორის არიან Marathon-ი (ეკვადორი), Majid-ი (ირანი), Saeta (ჰაიტი), Jako (ერაყი), Reebok-ი (პანამა), Umbro (კონგოს დემოკრატიული რესპუბლიკა), Kappa (ტუნისი), Capelli (კაბო-ვერდე) და 7Saber-ი (უზბეკეთი).
ბოლო წლების ერთ-ერთი ყველაზე მნიშვნელოვანი ცვლილება გერმანიის საფეხბურთო ნაკრების გადაწყვეტილება იყო, რომელმაც მრავალწლიანი პარტნიორობის შემდეგ Adidas-თან თანამშრომლობა შეწყვიტა და კონტრაქტი მის მთავარ კონკურენტ Nike-თან გააფორმა.
