დიდი ხანია, რესტორნების ინდუსტრიაში ამერიკული კომპანიები დომინირებენ. 2026 წლის ივლისის მონაცემებით, საჯაროდ დალისტულ სარესტორნო ქსელებს შორის ყველაზე მაღალი საბაზრო კაპიტალიზაცია McDonald’s-ს აქვს, რომლის ღირებულება 195.1 მილიარდ დოლარს აღწევს. ეს მაჩვენებელი უახლოესი კონკურენტის, Chipotle Mexican Grill-ის, საბაზრო კაპიტალიზაციას ოთხჯერ აღემატება.
წარმოგიდგენთ CompaniesMarketCap-ის მონაცემებზე დაყრდნობით შედგენილ რეიტინგს, რომელიც მსოფლიოს 20 ყველაზე ძვირად ღირებულ რესტორნების კომპანიას აერთიანებს.
| ადგილი | კომპანია | ქვეყანა | საბაზრო კაპიტალიზაცია (მლრდ, $) |
|---|---|---|---|
| 1 | McDonald’s | აშშ | 195.1 |
| 2 | Chipotle Mexican Grill | აშშ | 45.2 |
| 3 | Yum! Brands | აშშ | 45.1 |
| 4 | Restaurant Brands International | კანადა | 34.3 |
| 5 | Darden Restaurants | აშშ | 23.4 |
| 6 | Yum China | ჩინეთი | 14.8 |
| 7 | Texas Roadhouse | აშშ | 12.5 |
| 8 | Domino’s Pizza | აშშ | 10.0 |
| 9 | Zensho Holdings | იაპონია | 8.5 |
| 10 | CAVA Group | აშშ | 8.4 |
| 11 | Brinker International | აშშ | 7.9 |
| 12 | Hai Di Lao Hot Pot | ჩინეთი | 7.6 |
| 13 | Food & Life Companies | იაპონია | 6.8 |
| 14 | McDonald’s Japan | იაპონია | 6.3 |
| 15 | Americana Restaurants International | არაბთა გაერთიანებული საამიროები | 4.7 |
| 16 | Wingstop Restaurants | აშშ | 4.2 |
| 17 | The Cheesecake Factory | აშშ | 4.1 |
| 18 | Skylark Holdings | იაპონია | 4.1 |
| 19 | Jollibee | ფილიპინები | 2.7 |
| 20 | Shake Shack | აშშ | 2.5 |
McDonald’s-ი 1940 წელს, კალიფორნიის ქალაქ სან-ბერნარდინოში, ძმებმა, რიჩარდ და მორის მაკდონალდებმა დააარსეს. რამდენიმე ათწლეულში კომპანიამ საერთაშორისო გაფართოება დაიწყო და დღეს მსოფლიოს მასშტაბით 40 000-ზე მეტ რესტორანს ფლობს. ყველაზე დიდი წარმოდგენილობა მას აშშ-ში, ჩინეთსა და იაპონიაში აქვს.
საინტერესოა, რომ McDonald’s Japan-ი დამოუკიდებლადაც მოხვდა რეიტინგში. იაპონური შვილობილი კომპანია, რომელიც 1971 წელს დენ ფუჯიტამ დააფუძნა, დღეს 6.3 მილიარდი დოლარის საბაზრო კაპიტალიზაციით ფასდება.
ამერიკული კომპანიების დომინირება
რეიტინგში მეორე და მესამე ადგილებს ასევე ამერიკული კომპანიები, Chipotle Mexican Grill-ი (45.2 მილიარდი დოლარი) და Yum! Brands-ი (45.1 მილიარდი დოლარი), იკავებენ.
საერთო ჯამში, მსოფლიოს 20 ყველაზე ძვირად ღირებულ რესტორნების კომპანიას შორის 11 ამერიკულია. მათ შორისაა სწრაფად მზარდი CAVA Group-ი, რომლის საბაზრო კაპიტალიზაცია უკვე 8.4 მილიარდ დოლარს აღწევს.
Chipotle-ი 1993 წელს დენვერში დაარსდა და სწრაფი, თუმცა შედარებით მაღალი ხარისხის კვების სეგმენტის ერთ-ერთ პიონერად მიიჩნევა. აღსანიშნავია, რომ 2006 წლამდე კომპანიის 90%-იან წილს სწორედ McDonald’s-ი ფლობდა.
Yum! Brands-ი კი ლუისვილში დაფუძნებული ჰოლდინგია, რომელსაც ეკუთვნის მსოფლიოში ცნობილი ბრენდები: KFC, Pizza Hut-ი და Taco Bell-ი. მას ჩინური ბიზნესი 2016 წელს დამოუკიდებელ კომპანიად, Yum China-ად, გამოეყო, რომლის საბაზრო კაპიტალიზაცია დღეს 14.8 მილიარდ დოლარს შეადგენს.
ყველაზე ძვირად ღირებული არაამერიკული რესტორნების კომპანიები
არაამერიკულ კომპანიებს შორის ყველაზე მაღალი შეფასება კანადურ Restaurant Brands International-ს აქვს. მისი საბაზრო კაპიტალიზაცია 34.3 მილიარდი დოლარია. კომპანია ფლობს ისეთ საერთაშორისო ქსელებს, როგორებიცაა Burger King-ი, Popeyes-ი და Tim Hortons-ი.
რეიტინგში ასევე წარმოდგენილია Americana Restaurants International-ი, რომლის საბაზრო კაპიტალიზაცია 4.7 მილიარდ დოლარს აღწევს. არაბთა გაერთიანებულ საამიროებში დაფუძნებული კომპანია სწრაფი კვების არაერთ ბრენდს მართავს და მისი 50%-იანი წილის მფლობელი საუდის არაბეთის Public Investment Fund-ია.
აზიურ კომპანიებს შორის გამოირჩევიან ჩინეთში დაფუძნებული Hai Di Lao Hot Pot-ი (7.6 მილიარდი დოლარი) და იაპონიაში დაფუძნებული Zensho Holdings-ი (8.5 მილიარდი დოლარი).
