საქართველოს ეროვნულმა ბანკმა ავტორიტეტული საერთაშორისო გამოცემა Central Banking-ის საუკეთესო ფინტექ პოლიტიკის ნომინაციაში გაიმარჯვა

საქართველოს ეროვნულმა ბანკმა ავტორიტეტული საერთაშორისო გამოცემა Central Banking-ის საუკეთესო ფინტექ პოლიტიკის ნომინაციაში გაიმარჯვა

საქართველოს ეროვნულმა ბანკმა საერთაშორისო ავტორიტეტული გამოცემა Central Banking-ის ამჯერად მეორე, Fintech & RegTech კონკურსშიც გაიმარჯვა და წლის საუკეთესო ფინტექ პოლიტიკის ჯილდო მოიპოვა, რომელიც ყოველწლიურად თანამედროვე ტექნოლოგიურ ინოვაციებზე ორიენტირებულ ცენტრალურ ბანკებს გადაეცემა. აღსანიშნავია, რომ წელს ეს ეროვნული ბანკისთვის Central Banking Awards-ის რიგით უკვე მესამე ჯილდოა, ყველაზე გამჭვირვალე ცენტრალური ბანკისა და საუკეთესო რისკმენეჯერის ჯილდოების შემდგომ.

გადაწყვეტილების მიღებისას ჟიურის წევრებმა გაითვალისწინეს  საქართველოს ეროვნული ბანკის  ახალი მიდგომები, ინიციატივები და ტექნოლოგიისა და დიგიტალიზაციის სფეროში მიღწეული შედეგები.

ახალი ტექნოლოგიების ხელშესაწყობად და ფინტექის ეკოსისტემის განვითარების მიზნით, ეროვნულმა ბანკმა არაერთი წარმატებული ნაბიჯი გადადგა: ფინტექის ინფრასტრუქტურულ პროექტებთან ერთად, როგორებიცაა, ღია ბანკინგის სტანდარტიზაცია, მყისიერი გადახდები, ციფრული ლარი, ხოლო ფინტექ კომპანიებისთვის  ფიქსირებული ხარჯების შემცირების მიზნით – ციფრული ბანკი. აღსანიშნავია, რომ ვითარდება ახალი ღია მარეგულირებელი ჩარჩო, რომელიც  ფინტექ ინოვატორებს საზედამხედველო ჩარჩოს განვითარებაში მონაწილეობის მიღების საშუალებას აძლევს. ღია მარეგულირებელი ჩარჩო რამდენიმე ინსტრუმენტს იყენებს:

ფინანსური ინოვაციების ოფისი – ოფისის მიზანია ფინანსური ინოვაციების მქონე პირებსა და საქართველოს ეროვნული ბანკის ზედამხედველებს შორის ეფექტიანი კომუნიკაციის ჩარჩოს შექმნა, ფინანსურ სექტორში პასუხისმგებლიანი ინოვაციების ხელშეწყობა და  ფინტექ ორგანიზაციების დახმარება რეგულაციების საზედამხედველო მიდგომის გაცნობიერებაში. თანამედროვე საზედამხედველო ჩარჩო საკმაოდ კომპლექსურია და ნავიგაციისთვის რთულია, განსაკუთრებით, ახალი ფინანსური სტარტაპებისთვის. ამიტომ, მნიშვნელოვანია ფინტექ იდეების მქონე ინოვატორების წახალისება და ამ იდეების მდგრად ფინანსურ მოდელად გარდაქმნის ხელშეწყობა.

რეგულირების ლაბორატორია – საფინანსო სექტორის წარმომადგენლებს საშუალებას აძლევს რეალურ რეჟიმში, ზედამხედველის კონტროლირებად გარემოში გამოცადონ ინოვაციური სერვისები და პროდუქტები. მნიშვნელოვანი ყურადღება ეთმობა სისტემური რისკების ტესტირებას.

ციფრული ბანკის ლიცენზირება – ციფრული ბანკის მოდელის განვითარებით ეროვნული ბანკი მიზნად ისახავს ხელი შეუწყოს: ინოვაციური ბიზნეს მოდელების განვითარებას; ფინანსური პროდუქტების მრავალფეროვნებას; დიდი მონაცემების უკეთ გამოყენებას; მომხმარებლის გარშემო არსებულ ტექნოლოგიურ ინფრასტრუქტურაზე მორგებული, მოხერხებული, სწრაფი და ხელმისაწვდომი ციფრული ფინანსური ეკოსისტემის განვითარებას; ღრუბლოვანი სერვისების ეფექტიან გამოყენებას; ტექნოლოგიურ კომპანიებთან ინტეგრაციის გამარტივებას და საბითუმო ბაზარზე საბანკო საქმის როგორც სერვისის მოდელის განვითარებას; ახალი ტექნოლოგიური მოთამაშეების შემოსვლას და კონკურენციის გაზრდას საფინანსო სექტორში.

ხელოვნური ინტელექტისა და მანქანური სწავლების მოდელის მართვის ჩარჩო – შესაბამისი საზედამხედველო ჩარჩოს განვითარება დღის წესრიგში მონაცემთა მეცნიერების ახალი მეთოდების და დიდი მონაცემების სწრაფმა გავრცელებამ  დააყენა. საქართველოს ეროვნული ბანკმა ამ მიზნით, რეგულირების ლაბორატორიის ელემენტების გამოყენებით, მოდელის რისკის მართვის თანამედროვე ჩარჩო შექმნა. შესაბამისად, ფინანსურ სექტორში მონაცემთა მეცნიერების მეთოდების მდგრად განვითარებისათვის ხელსაყრელი გარემო შექმნა.

დღეს, ეროვნული ბანკის ფინანსური და საზედამხედველო ტექნოლოგიების განვითარების დეპარტამენტის ხელმძღვანელმა, ოთარ გორგოძემ Central Banking-ის საზაფხულო შეხვედრაში მიიღო მონაწილეობა. სიტყვით გამოსვლისას მან ხელოვნური ინტელექტისა და მანქანური სწავლების რეგულირებაზე გაამახვილა ყურადღება და მან ვრცლად ისაუბრა იმის შესახებ, თუ როგორი შეიძლება იყოს მათი რეგულირების ჩარჩო. “სწრაფად ცვალებად ტექნოლოგიურ გარემოში, სადაც მუდმივად იზრდება მონაცემები, მეტად გამოიყენება ხელოვნური ინტელექტი და მანქანური სწავლება, მარეგულირებელთა მთავარი გამოწვევა  პრაქტიკულობის შენარჩუნებაა. ეს ნიშნავს უცნობი რისკების ნაცნობ რისკებად გარდაქმნას. ღია საზედამხედველო მიდგომა სწორედ რისკზე დაფუძნებული მიდგომაა”, – განაცხადა ოთარ გორგოძემ.

Central Banking Publications-ი 1990 წელს ლონდონში დაარსდა. Central Banking-ი წარმოადგენს ფინანსურ მედია პორტალსა და გამომცემლობას. იგი დამოუკიდებელია თავის საქმიანობაში. Central Banking-ს ფართო აუდიტორია ჰყავს, რომელიც ძირითადად, მსოფლიოს ცენტრალურ ბანკებს და ფინანსურ მარეგულირებლებს, საერთაშორისო ფინანსურ ინსტიტუტებს და ფინანსური სექტორის სხვა წარმომადგენლებს მოიცავს.

დაჯილდოების ცერემონია, Central Banking-ის “საზაფხულო შეხვედრების” ღონისძიების ფარგლებში, ონლაინ ფორმატში, ივნისში გაიმართა, რომელშიც მონაწილეობა საქართველოს ეროვნულმა ბანკმა,  როგორც სამ ნომინაციაში გამარჯვებულმა მიიღო.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

This site is protected by reCAPTCHA and the Google Privacy Policy and Terms of Service apply.