2021 წელს საქართველოს ეკონომიკამ ნავთობპროდუქტების შეძენაში 4 მილიარდ ლარზე მეტი გადაიხადა. სწორედ ამდენია ქვეყანაში მოქმედი უმსხვილესი ნავთობიმპორტიორი კომპანიების მიერ მიღებული ჯამური შემოსავალი.
მაღალი ალბათობით, წელს ეს თანხა 5.5 მილიარდ ლარსაც გადააჭარბებს, რაც საწვავის ფასის მკვეთრი ზრდით არის განპირობებული. წლის პირველ 9 თვეში ნავთობპროდუქტების იმპორტის ღირებულებამ უკვე 1 მილიარდ დოლარს გადააჭარბა.
ფინანსური ანგარიშგებების მიხედვით, ქვეყნის ყველაზე შემოსავლიანი ნავთობკომპანია „სოკარ პეტროლიუმ ჯორჯიაა”, რომელმაც 2021 წელს 972 მილიონის ღირებულების საწვავის რეალიზაცია მოახდინა. მეორე ადგილს 706 მილიონის გაყიდვებით „სან პეტროლიუმ ჯორჯია” ანუ „გალფი” იკავებს, მას 702 მილიონი ლარის შემოსავლით „რომპეტროლი” მოჰყვება.
ნავთობპროდუქტების სექტორი ბიუჯეტის ერთ-ერთი წამყვანი გადამხდელია. მაგალითად, ერთი ლიტრი ბენზინის ფასში ამჟამად 38 თეთრი აქციზზე, 56 თეთრი კი დღგ-ზე მოდის, რაც ჯამში 94 თეთრს შეადგენს. შესაბამისად, ფასის თითქმის ერთი მესამედი მხოლოდ ამ ორ გადასახადზე მოდის.
ფინანსური ანგარიშგებების მიხედვით, მაღალი შემოსავლების მიუხედავად, ნავთობკომპანიების წმინდა მოგება არცთუ ისე მაღალია და წმინდა მოგების მარჟა შემოსავლებთან მიმართებით მხოლოდ 1.5%-ია. ტოპ-იმპორტიორი კომპანიების ჯამური შემოსავლიდან – 4 მილიარდი ლარიდან – წმინდა მოგებაზე მხოლოდ 60 მილიონი ლარი მოდიოდა.
საქართველოში მოქმედი ნავთობკომპანიების შემოსავლები 2021 წელს
ქვეყანაში მოქმედი ნავთობკომპანიების წმინდა მოგება 2021 წელს
