ფოტო: gacetalegal.com
ამერიკის შეერთებული შტატების ადმინისტრაცია, დონალდ ტრამპის ხელმძღვანელობით, განიხილავს ინიციატივას, რომლის მიხედვითაც ხელოვნური ინტელექტის ახალი მოდელები საჯარო გამოშვებამდე სახელმწიფო კონტროლს დაექვემდებარება. ამის შესახებ ინფორმაცია თავდაპირველად The New York Times-მა გაავრცელა. გამოცემა აღნიშნავს, რომ ეს მიდგომა ტრამპის მიერ AI-რეგულაციებთან დაკავშირებით ადრე გამოხატულ უფრო ლიბერალურ პოზიციას ეწინააღმდეგება.
The New York Times-ის ცნობით, თეთრმა სახლმა შესაძლოა გამოსცეს აღმასრულებელი ბრძანება, რომლის ფარგლებშიც ხელოვნური ინტელექტის მიმართულებით სპეციალური სამუშაო ჯგუფი შეიქმნება. ჯგუფში ტექნოლოგიური კომპანიების წარმომადგენლები და სახელმწიფო მოხელეები იქნებიან გაერთიანებულნი, ხოლო ერთ-ერთ მთავარ ინიციატივად ახალი AI-მოდელების სავალდებულო შეფასების პროცესის დანერგვა განიხილება.
არსებული ინფორმაციით, შემოთავაზებული მექანიზმი შესაძლოა დაემსგავსოს იმ სისტემას, რომელიც გაერთიანებულ სამეფოშია დანერგილი. შეგახსენებთ, იქ AI-ის უსაფრთხოების სტანდარტების შეფასებაზე რამდენიმე სახელმწიფო უწყება მუშაობს.
თეთრი სახლის წარმომადგენლებმა უკვე გამართეს შეხვედრები ისეთი კომპანიების ხელმძღვანელებთან, როგორიცაა Anthropic-ი, Google-ი და OpenAI. როგორც ცნობილია, შეხვედრებზე სავარაუდო რეგულაციები და მათი განხორციელების გზები განიხილეს.
აღსანიშნავია, რომ მიმდინარე წლის მარტში ტრამპმა ხელოვნური ინტელექტის მრჩეველთა ახალ საბჭოში 13 წევრი დანიშნა. მათ შორის არიან ტექნოლოგიური სფეროს ლიდერები: მარკ ცუკერბერგი, ლარი ელისონი, ჯენსენ ჰუანგი და მაიკლ დელი. საბჭოს მიზანი მეცნიერების, ტექნოლოგიისა და ინოვაციების პოლიტიკის მიმართულებით პრეზიდენტისთვის კონსულტაციების გაწევაა.
ისიც უნდა ითქვას, რომ ტრამპი წარსულში AI-ის უფრო ნაკლებ რეგულირებას უჭერდა მხარს. 2025 წლის ივლისში მან განაცხადა, რომ ტექნოლოგიას განვითარების შესაძლებლობა უნდა მიეცეს და არ უნდა შევზღუდოთ ის ზედმეტი წესებით. თუმცა მისი პოზიცია მას შემდეგ შეიცვალა, რაც Anthropic-სა და პენტაგონს შორის კონფლიქტი წარმოიშვა.
კონფლიქტის საფუძველი AI-მოდელებზე შეუზღუდავი წვდომის შესახებ მთავრობის მოთხოვნა გახდა, რაზეც კომპანიამ უარი განაცხადა. ამის საპასუხოდ, აშშ-ის თავდაცვის დეპარტამენტის მდივანმა, პიტ ჰეგსეტმა განაცხადა, რომ Anthropic-ი შესაძლოა ეროვნული უსაფრთხოებისთვის რისკის შემქმნელად გამოცხადებულიყო. კომპანიამ ამ გადაწყვეტილების გასაჩივრება სცადა, თუმცა ფედერალურმა სააპელაციო სასამართლომ დროებითი შეჩერების მოთხოვნა არ დააკმაყოფილა.
ამავე პერიოდში Anthropic-ის თანადამფუძნებელმა ჯეკ კლარკმა განაცხადა, რომ კომპანია ფედერალურ მთავრობასთან თანამშრომლობს AI-მოდელ Claude Mythos-ის საკითხზე, რომელიც, მისი თქმით, იმდენად ძლიერი ინსტრუმენტია, რომ შეუძლია უსაფრთხოების სერიოზული ხარვეზების გამოყენება თითქმის ყველა მთავარ ოპერაციულ სისტემასა და ვებბრაუზერში. სწორედ ასეთი რისკები ზრდის მთავრობის მხრიდან ზედამხედველობის საჭიროებას, განსაკუთრებით კიბერთავდასხმების პოტენციური საფრთხის ფონზე.
პარალელურად, პენტაგონმა გასულ კვირას ხელშეკრულებები გააფორმა წამყვან ტექნოლოგიურ კომპანიებთან, რომელთა შორისაა OpenAI, Alphabet-ი, NVIDIA, SpaceX-ი, Microsoft-ი და Amazon-ი. შეთანხმების მიზანია, ამ კომპანიების AI-სისტემები სააგენტოს დახურულ ქსელებში გამოიყენებოდეს. აღნიშნული ტექნოლოგიები მონაცემთა ანალიზის გაუმჯობესებას, შექმნილი მდგომარეობის უკეთ გააზრებას და სამხედრო გადაწყვეტილებების მიღების პროცესის ოპტიმიზაციას ემსახურება.
მიმდინარე განხილვები აჩვენებს, რომ ხელოვნური ინტელექტის რეგულირების საკითხი სულ უფრო მნიშვნელოვან ადგილს იკავებს გლობალურ პოლიტიკაში და შესაძლოა უახლოეს მომავალში ტექნოლოგიური კომპანიებისთვის ახალი წესები ჩამოყალიბდეს.
