მაღალი სიცხე

წყეულიმც იყოს Theranos-ი! ჯანდაცვის მომდევნო დიდ „ზღაპრულ მარტორქაზე“ შეშლილმა ინვესტორებმა რიში შაჰის სტარტაპის ღირებულება $5.6 მილიარდამდე აიყვანეს.

ნათელია, რა განზრახვები აქვს Outcome Health-ის მარკეტინგს. მომხმარებელმა უნდა იფიქროს, რომ ის დახვეწილ, თანამედროვე სამედიცინო ტექნოლოგიას გვთავაზობს. მის ვებგვერდზე წკრიალა ვიდეოებსა და შთამბეჭდავ სტატისტიკას ნახავთ. Outcome-ი, კომპანიისვე თქმით, „წელიწადში ნახევარ მილიარდზე მეტ პაციენტს ჯანმრთელობის კვლევებით“ უზრუნველყოფს.

მაგრამ Outcome-ი, სინამდვილეში, მედიაკომპანიაა: მისმა აღმასრულებელმა დირექტორმა, 31 წლის რიში შაჰმა (მარჯვნივ) ცხრა წლის წინ ის პრეზიდენტ შრადჰა აგარვალთან და მესამე თანადამფუძნებელთან ერთად ContextMedia-ს სახით წამოიწყო. კომპანია ექიმების კაბინეტებში ტაბლეტებსა და ინტერაქტიულ ეკრანებს ამონტაჟებს, რომლებზეც Outcome-ის 100-მდე კმაყოფილი პარტნიორის სამედიცინო ინფორმაციია გამოსახული; ვთქვათ, ონკოლოგის მოსაცდელში კიბოსთან დაკავშირებულ მონაცემებს ნახავთ ან 3-D-ში გამოსახულ ანატომიას, სპეციალისტებმა რომ თავიანთ პაციენტებს აჩვენონ. ამასთან, Outcome-ის ეკრანებზე რეკლამებიც ჩნდება, ძირითადად ისეთი ფარმაცევტული კომპანიებისა, როგორიც Pfizer-ი და Merck-ი არიან. შაჰის თქმით, Outcome-ის შემოსავალმა შარშან თითქმის $200 მილიონს მიაღწია – ეს რეკლამების დამსახურებაა.

ჯანმრთელობაზე ზრუნვისა რა მოგახსენოთ, მაგრამ წლების მანძილზე ინვესტორების ჯიუტი უარით გასტუმრების შემდეგ, ჩიკაგოში დაფუძნებული Outcome-ი დღეს უფრო სწრაფად იზიდავს ფულს, ვიდრე სასწაულმოქმედი წამალი რომ წარმოედგინა. მაისში შაჰმა საწყისი გარე დაფინანსების რაუნდის შესახებ გააკეთა განცხადება – სულ რაღაც $600 მილიონამდე დაფინანსების რაუნდი გვაქვს მხედველობაში ისეთი ფირმებისგან, როგორიცაა Goldman Sachs-ი, Google-თან აფილირებული CapitalG და Pritzker Group-ი, რის შედეგადაც, საბოლოო ჯამში, კომპანიის ღირებულება $5.6 მილიარდს გაუტოლდა. ეს მყვირალა რიცხვი ნიშნავს, რომ სულ რაღაც სამ წელიწადში Outcome-ი ექიმთა უმრავლესობის კაბინეტებში იქნება წარმოდგენილი. ასევე ნიშნავს, რომ შაჰის 71%-იანი წილი კომპანიაში დაახლოებით $3.4 მილიარდს უდრის, კომპანიის ვალის გათვალისწინებითაც კი.

ამ თვალწარმტაცმა რიცხვებმა გარკვეულ წრეებში ხალხი ახალ Theranos-ზე აალაპარაკა. ინვესტორთა თქმით, Outcome-ი დიდი ხანია, მოგებიანია და უფრო მეტს აკეთებს, ვიდრე მარკეტინგს.

თუმცა Outcome-ის გულშემატკივრებმა Theranos-ისგან ალბათ რაღაც ისწავლეს: მათ დაიტოვეს უფლება, თავიანთი აქციები ექვს წელიწადში გაანაღდონ, სულ ერთია, კომპანია გავა საჯარო ბაზარზე თუ არა. მაინც, ყოველი შემთხვევისთვის. 

მილიარდერი Outcome Health რიში შაჰი სტარტაპი ჯანდაცვა

წინა სტატია

როგორ აქცია გრეის ბონიმ ინტერიერის შესახებ შექმნილი ბლოგი დიდ ბიზნესად
23 აგვისტო, 2017

შემდეგი სტატია

ნენსკრა ჰესის პროექტის საჯარო განხილვებმა მაღალი ინტერესი გამოიწვია
26 აგვისტო, 2017
ევროკავშირში 65%-ით მეტი პროდუქცია გაგვაქვს, ვიდრე რუსეთში
საქართველო | სექ, 19, 2017
რომელი სახელმწიფო უწყებების დაფინანსება იზრდება 2018 წელს
საქართველო | ოქტ, 02, 2017
ქართული ბიზნესის #1 არჩევანი
კომპანიები | ოქტ, 19, 2017
Forbes Georgia in EnglishForbes WomanForbes Banker
მილიარდერების რეიტინგი - Real Time
იხილეთ ყველა