რუსეთზე ენერგოდამოკიდებულების შესამცირებლად, აშშ ევროპას უფრო მეტ თხევად ბუნებრივ აირს მიაწვდის

რუსეთზე ენერგოდამოკიდებულების შესამცირებლად, აშშ ევროპას უფრო მეტ თხევად ბუნებრივ აირს მიაწვდის

ამერიკის შეერთებული შტატების პრეზიდენტის, ჯო ბაიდენის განცხადებით, რუსეთზე ენერგოდამოკიდებულების შესამცირებლად, აშშ ევროკავშირს უფრო მეტ თხევად ბუნებრივ აირს მიაწვდის.

„უსაფრთხო სუფთა ენერგომომავლის უზრუნველსაყოფად, დღეს ჩვენ თამაშის ერთობლივ წესებზე შევთანხმდით“, – განაცხადა ჯო ბაიდენმა. მისი განმარტებით, ამ ინიციატივას ორი მთავარი მიზანი აქვს: ერთი, რუსეთის გაზზე დამოკიდებულების რაც შეიძლება სწრაფად შესამცირებლად ევროპის დახმარებაა, მეორე კი – ზოგადად ევროპის მიერ გაზზე მოთხოვნის შემცირება.

გავრცელებული ინფორმაციით, აშშ ევროკავშირს წელს დამატებით მინიმუმ 15 მილიარდ კუბურ მეტრ თხევად ბუნებრივ აირს მიაწვდის. ევროკავშირი მიმდინარე წელს რუსეთზე ენერგოდამოკიდებულების შემცირებას 2/3-ით აპირებს. რუსეთიდან იმპორტირებულ წიაღისეულ საწვავზე კი ევროპა საბოლოოდ უარს 2027 წლისთვის იტყვის. ამჟამად ევროპის ბუნებრივი აირის მოთხოვნის 40%-ს სწორედ რუსეთი უზრუნველყოფს.

თუმცა, სფეროს ექსპერტების მოსაზრებით, აშშ-ს მიერ გამოთქმული ინიციატივა რუსული გაზის მთლიანად ჩასანაცვლებლად საკმარისი არ იქნება და ევროკავშირს სხვა გზების მოძიებაც მოუწევს. ცნობისათვის, 2021 წელს ევროპაში რუსული გაზის იმპორტმა 155 მილიარდი კუბური მეტრი შეადგინა.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო.