ქვეყნის კეთილდღეობა ხშირად მისი შრომისუნარიანი მოსახლეობის განათლების დონესთან არის დაკავშირებული. სამუშაო ძალა კი, რომლის განათლების დონე მაღალია, როგორც წესი, უფრო მაღალი პროდუქტიულობით, ინოვაციების მეტი შესაძლებლობითა და ეკონომიკური ზრდის პოტენციალით გამოირჩევა.
Visual Capitalist-მა, CBRE Research-ის მიერ შეგროვებულ მონაცემებზე დაყრდნობით, შემოგვთავაზა ქვეყნების სია, რომლებსაც ყველაზე განათლებული მოსახლეობა ჰყავს. კვლევის დროს ქვეყნებში 25-64 წლის ადამიანების რაოდენობა დაითვალეს და განსაზღვრეს მათი წილი, რომლებსაც ბაკალავრის ან უფრო მაღალი ხარისხი აქვთ მიღებული. სია 2023 წლის მდგომარეობით არსებული მონაცემების გამოყენებით არის შედგენილი.
აღნიშნული კუთხით სახელმწიფოების შედარებისას არ უნდა დაგვავიწყდეს, რომ ქვეყნები უმაღლეს განათლებაზე წვდომის სხვადასხვა ეტაპზე არიან. მაგალითად, თუ განვითარებულ ქვეყნებში განათლებაზე ხელმისაწვდომობის მაჩვენებელი მაღალია და უფრო და უფრო იზრდება, განვითარებადი ეკონომიკები ამ ტემპის დაწევას კვლავ ცდილობენ.
შესაბამისად, დასავლეთის ქვეყნებს განათლებული მოსახლეობის ყველაზე მაღალი მაჩვენებელი აქვთ, განათლებული ზრდასრულების წილის მიხედვით. რეიტინგის ტოპ-10 ქვეყნიდან ექვსი ევროპაში მდებარეობს. სიას ირლანდია ლიდერობს, რომლის 25-64 წლის მოსახლეობის ნახევარზე მეტს, 52.4%-ს უნივერსიტეტის სხვადასხვა ხარისხი აქვს. მას მოსდევს შვეიცარია და სინგაპური, შესაბამისად, მოცემულ ასაკობრივ კატეგორიაში განათლებული მოსახლეობის 46%-იანი და 45%-იანი წილით.
აღსანიშნავია, რომ განათლებული მოსახლეობის რაოდენობით (78.2 მილიონი) ამერიკის შეერთებული შტატები გამოირჩევა და 25-64 წლის მოსახლეობის რაოდენობასთან პროცენტულ თანაფარდობას თუ გამოვრიცხავთ, ამ კუთხით ის მესამე ადგილზეა.
ინდოეთსა და ჩინეთს, მსოფლიოს ორ ყველაზე მჭიდროდ დასახლებულ ქვეყანას, სიაში შესულ სახელმწიფოებს შორის განათლებული ადამიანების ყველაზე დაბალი წილი აქვს. თუმცა, მოსახლეობის ზომის გამო, მათ ყველა სხვა ქვეყანას შორის უნივერსიტეტის ხარისხის მფლობელი ყველაზე მეტი მოქალაქე ჰყავს, შესაბამისად, 139.4 მილიონი და 88.1 მილიონი.
განათლების დონესა და ერთ სულ მოსახლეზე მშპ-ს შორის ძლიერი დადებითი კორელაციის გათვალისწინებით, უმაღლეს განათლებაზე ხელმისაწვდომობის ზრდა განვითარებადი ეკონომიკებისთვის პრიორიტეტად რჩება, სადაც სამუშაო ძალის დიდი ნაწილი გაუნათლებელია.
ტოპ-10 ქვეყანა, რომლებსაც ყველაზე განათლებული მოსახლეობა ჰყავს:
| ქვეყანა | 25-64 წლის მოსახლეობა, რომელსაც აქვს ბაკალავრის ან უფრო მაღალი ხარისხი | ბაკალავრის ან უფრო მაღალი ხარისხის მქონე მოსახლეობის წილი | რეგიონი |
|---|---|---|---|
| ირლანდია | 1.8 მლნ | 52.4% | ევროპა |
| შვეიცარია | 2.7 მლნ | 46.0% | ევროპა |
| სინგაპური | 1.9 მლნ | 45.0% | აზია |
| ბელგია | 3.3 მლნ | 44.1% | ევროპა |
| გაერთიანებული სამეფო | 19.1 მლნ | 43.6% | ევროპა |
| ნიდერლანდი | 4.8 მლნ | 42.0% | ევროპა |
| აშშ | 78.2 მლნ | 40.3% | ჩრდილოეთი ამერიკა |
| ავსტრალია | 6.9 მლნ | 39.8% | ოკეანია |
| ისრაელი | 2.2 მლნ | 39.7% | ახლო აღმოსავლეთი |
| შვედეთი | 2.6 მლნ | 39.6% | ევროპა |
