2025 წლის ოქტომბერში Nvidia მსოფლიოში პირველ კომპანია გახდა, რომელმაც საბაზრო კაპიტალიზაციით $5 ტრილიონს გადააჭარბა. ალბათ ბევრ ინვესტორს აინტერესებს, რომელი ტექნოლოგიური გიგანტი გადალახავს შემდეგში ამ ნიშნულს. საკუთარი პროგნოზი BestBrokers.com-მა შემოგვთავაზა.
BestBrokers.com-ის ანალიზი კომპანიების ბოლო სამი წლის საშუალო ზრდაზეა დაფუძნებული. შედეგად, მან სავარაუდო თარიღები გამოითვალა, თუ როდის შეძლებენ წამყვანი ტექნოლოგიური კომპანიები ღირებულების $5-ტრილიონიან ზღვრამდე გაზრდას.
ანგარიშზე დაყრდნობით, ამ მიზანთან ყველაზე ახლოს Microsoft-ი და Alphabet-ია. კერძოდ, BestBrokers.com-ის ანალიტიკოსების ვარაუდით, Microsoft-მა $5-ტრილიონიან ნიშნულს შესაძლოა 2026 წლის აგვისტოში მიაღწიოს. რაც შეეხება Alphabet-ს, პროგნოზის მიზედვით, მან ამავე ზღვარს შესაძლოა 2026 წლის ოქტომბერში, დაახლოებით ერთ წელიწადში მიაღწიოს, თუ მსგავსი ტემპით ზრდას გააგრძელებს.
Microsoft-ის ძლიერი ზრდა, ძირითადად, ღრუბლოვან სერვისებზე მოდის, თუმცა სხვა მიმართულებები, როგორიცაა გეიმინგი და AI, ასევე სწრაფად ვითარდება. Alphabet-ი, რომლის საშუალო წლიური ზრდის ტემპი ბოლო 3 წლის განმავლობაში 43%-ს შეადგენს, Google-ის სარეკლამო ბიზნესიდან კვლავ დიდ მოგებას იღებს, რაც კომპანიას საშუალებას აძლევს, ხელოვნური ინტელექტის ტექნოლოგიებში მილიარდები ჩადოს და AI-რბოლაში არ ჩემორჩეს.
აღსანიშნავია, რომ Alphabet-ის აქციების ფასზე დამატებით იმანაც იქონია გავლენა, რომ Berkshire Hathaway-მ კომპანიაში $4.9-მილიარდიანი ინვესტიცია განახორციელა.
რომელი ტექნოლოგიური გიგანტი როდის გადალახავს $5-ტრილიონიან ნიშნულს:
| კომპანია | საბაზრო კაპიტალიზაცია | 3-წლიანი საშუალო ზრდა | სავარაუდო თარიღი $5 ტრილიონამდე |
|---|---|---|---|
| Nvidia | *$4.97 ტრილიონი | 163% | უკვე მიაღწია — 2025 წლის 29 ოქტომბერი |
| Microsoft | $3.94 ტრილიონი | 32% | 18 აგვისტო, 2026 |
| Alphabet | $3.45 ტრილიონი | 43% | 25 ოქტომბერი, 2026 |
| Apple | $4.03 ტრილიონი | 18% | 14 იანვარი, 2027 |
| Broadcom | $1.78 ტრილიონი | 112% | 20 თებერვალი, 2027 |
| Meta | $1.68 ტრილიონი | 97% | 19 მაისი, 2027 |
| TSMC | $1.58 ტრილიონი | 77% | 13 ოქტომბერი, 2027 |
| Amazon | $2.40 ტრილიონი | 32% | 27 მაისი, 2028 |
| Tesla | $1.51 ტრილიონი | 33% | 26 დეკემბერი, 2029 |
| Oracle | $765.97 მილიარდი | 56% | 1-ელი იანვარი, 2030 |
*საბაზრო ღირებულება მოცემულია 2025 წლის 29 ოქტომბრის მდგომარეობით.
