ფოტო: Wally Skalij/Getty
ამერიკელი რეპერი Kanye West-ი (Ye) ოქტომბერში რუსეთში ორ კონცერტს გამართავს. სანქტ-პეტერბურგის Gazprom Arena-ს განცხადებით, მუსიკოსი 10 და 11 ოქტომბერს 70 000 მაყურებელზე გათვლილ არენაზე გამოვა.
კონცერტების შესახებ ინფორმაცია არენამ ორშაბათს Telegram-ზე გაავრცელა და Kanye West-ს „ჩვენი დროის ყველაზე გავლენიანი მუსიკალური არტისტი“ უწოდა. ღონისძიებები მისი მსოფლიო ტურნეს ფარგლებში გაიმართება.
კონცერტები ასევე დაადასტურა რუსეთის სახელმწიფო საინფორმაციო სააგენტო TASS-მა. Reuters-ის ინფორმაციით, ღონისძიებების გამოცხადებიდან დაახლოებით ერთ საათში ყველაზე იაფი კატეგორიის ბილეთები უკვე გაყიდული იყო.
შედეგად, Kanye West-ი ერთ-ერთი ყველაზე ცნობილი ამერიკელი მუსიკოსი გახდება, რომელიც უკრაინაში რუსეთის შეჭრის შემდეგ, 2022 წლიდან, ქვეყანაში კონცერტს გამართავს.
რუსეთში დაგეგმილი კონცერტები განსაკუთრებით საყურადღებოა იმის გათვალისწინებით, რომ ბოლო პერიოდში რეპერის რამდენიმე ევროპული შოუ გაუქმდა ან გადაიდო. მათ შორის კონცერტები გაუქმდა პოლონეთში, იტალიაში, შვეიცარიასა და დიდ ბრიტანეთში, ხოლო საფრანგეთში დაგეგმილი გამოსვლა გადაიდო.
კანიეს მიმართ კრიტიკა ბოლო წლებში არაერთ ანტისემიტურ განცხადებას, ადოლფ ჰიტლერის მიმართ დადებით დამოკიდებულებასა და ნაცისტური სიმბოლიკის გამოყენებას უკავშირდება. მუსიკოსმა 2025 წელს „Heil Hitler“-ის სახელწოდების სიმღერაც გამოუშვა.
Kanye West-ი 2000-იანი წლებიდან ჰიპ-ჰოპის ერთ-ერთ ყველაზე გავლენიან არტისტად მიიჩნევა. მას კარიერის განმავლობაში Grammy-ის 24 ჯილდო აქვს მიღებული, Spotify-ზე კი ამჟამად თვეში 69.1 მილიონზე მეტი მსმენელი ჰყავს.
თუმცა ბოლო წლებში მისი კარიერული და ბიზნესიმპერია მნიშვნელოვნად შემცირდა. 2022 წელს Adidas-მა უესტთან თანამშრომლობა შეწყვიტა მისი ანტისემიტური განცხადებებისა და არასტაბილური ქცევის გამო. Forbes-ის დათვლებით, Adidas-ისა და მისი Yeezy-ს ბრენდის თანამშრომლობა დაახლოებით $1.5 მილიარდად იყო შეფასებული, ხოლო გარიგების გაუქმების შემდეგ კანიეს ქონება დაახლოებით $400 მილიონამდე შემცირდა.
წაიკითხეთ ასევე: რა ქონებას ფლობს Kanye West-ი?
მუსიკოსმა მოგვიანებით ბოდიში მოიხადა. 2026 წლის იანვარში Wall Street Journal-ში გამოქვეყნებულ განცხადებაში მან საკუთარი ანტისემიტური განცხადებები ბიპოლარულ აშლილობასა და თავის ტვინის დაზიანებას დაუკავშირა.
მიუხედავად ევროპაში კონცერტების ნაწილის გაუქმებისა, Kanye West-ის სხვა შოუები მაინც გაიმართა და დიდი აუდიტორიაც მიიზიდა. გავრცელებული ინფორმაციით, თურქეთში, სტამბოლის ათათურქის ოლიმპიურ სტადიონზე მის კონცერტს 118 000 ადამიანი დაესწრო. მომღერალმა განაცხადა, რომ ეს სტადიონზე ჩატარებული კონცერტების ყველაზე დიდი აუდიტორია იყო, თუმცა ამ რეკორდის დამოუკიდებლად დადასტურება რთულია.
აღსანიშნავია, რომ Kanye West-ის კონცერტი 12 ივნისს თბილისში, „დინამო არენაზეც“ გაიმართა. ღონისძიების ორგანიზატორი Starring Georgia იყო.
