ჩეხეთის განვითარების სააგენტო საქართველოში წლიურად 2 მლნ ევროს პროექტებს ახორციელებს

ჩეხეთის განვითარების სააგენტო საქართველოში წლიურად 2 მლნ ევროს პროექტებს ახორციელებს

ჩეხეთის განვითარების სააგენტო საქართველოში წლის განმავლობაში დაახლოებით 2 მლნ ევროს ოდენობის პროექტებს ახორციელებს. ამის შესახებ Forbes Georgia-სთან ინტერვიუში ჩეხეთის განვითარების სააგენტოს დირექტორმა, იან სლივამ განაცხადა. სლივა საქართველოში ჩეხეთის დელეგაციის ოფიციალურ ვიზიტს ხელმძღვანელობს, რომელიც 19 აპრილს დაიწყო და 22 აპრილს დასრულდება.

„საქართველოზე ჩვენი თანამშრომლობის დიდი წილი მოდის. ეს ცოტათი ნაკლებია, მაგალითად, ეთიოპიაზე, ბოსნიასა და მოლდოვაზე. თუმცა, ის პროექტები, აქ რასაც ვახორციელებთ, საკმაოდ ხარისხიანია. სხვა ქვეყნებისგან განსხვავებით, ჩვენ აქ მასშტაბურ ინფრასტრუქტურას არ უზრუნველვყოფთ. ჩვენ უფრო მცირე პროექტებს ვაკეთებთ, თუმცა – უფრო მიზნობრივს. შეიძლება ითქვას, რომ ექვს ქვეყანას შორის, საქართველო ალბათ ყველაზე განვითარებულია და ყველაზე მარტივია აქ მუშაობა“, – აღნიშნა იან სლივამ.

ჩეხეთის განვითარების სააგენტოს მიმდინარე წელს საქართველოში 18  პროექტი აქვს. პროექტები მრავალფეროვანია, მათ შორის ჯანდაცვის, აგროტურიზმის, გარემოს დაცვის სფეროებში.

„ყველა ჩვენი პროექტი რაღაც კუთხით მაინც განვითარებაზეა ორიენტირებული, იქნება ეს თაფლის წარმოება თუ სხვა. მაგალითად, გვაქვს საკმაოდ კომპლექსური პროექტი მეტყევეობაში. ეს პროექტები ეხმარება საქართველოს, განავითაროს სოფლის მეურნეობის ეკონომიკა. და თუ, მაგალითად, ეს ეხება DCFTA-ს, დავეხმაროთ მათ ექსპორტში. პროექტები, რა თქმა უნდა, საქართველოს მთავრობასთან ერთად ხორციელდება და ყოველთვის საქართველოს პრიორიტეტების შესაბამისია“, – განაცხადა ჩეხეთის განვითარების სააგენტოს დირექტორმა.

ცნობისთვის, ჩეხეთის განვითარების სააგენტოს დელეგაციის ვიზიტის ფარგლებში ხუთშაბათს, თბილისში მეფუტკრეობის მულტიფუნქციური რეგიონული ცენტრის გახსნა იგეგმება. დელეგაცია ასევე ეწვევა რუხისა და ბათუმის საავადმყოფოებს აჭარაში. რუხისა და ბათუმის ახალაშენებული საავადმყოფოები თანამედროვე ტექნიკით სწორედ ჩეხეთის განვითარების სააგენტოს ფინანსური მხარდაჭერით აღიჭურვა. დელეგაცია ასევე ეწვევა ზუგდიდის სკრინინგ-ცენტრს, რომელიც ჩეხეთის განვითარების სააგენტოს ფინანსური მხარდაჭერით, ჩეხეთის რესპუბლიკის „კარიტასის“ მიერ აშენდა და აღიჭურვა.

19 აპრილს კი სააგენტოს დელეგაციამ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან ურთიერთგაგების ორ მემორანდუმს მოაწერა ხელი. მემორანდუმები გულისხმობს თანამშრომლობას ორი პროექტის ფარგლებში, რომლებიც საქართველოში ჩეხეთის რესპუბლიკის ფინანსური დახმარებით განხორციელდა: : „გზა სახლისკენ“, რომელიც მიზნად ისახავს საქართველოში მოზარდთა განვითარების ალტერნატიული სოციალური სერვისის შექმნას (მთლიანი ბიუჯეტი დაახლოებით 780 000 ევრო) და პირველადი ჯანმრთელობის დაცვის გაძლიერებას საქართველოში (მთლიანი ბიუჯეტი 1 233 000 ევრო).

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

This site is protected by reCAPTCHA and the Google Privacy Policy and Terms of Service apply.