იაპონია მზადაა, უკრაინას გაყინული რუსული აქტივებიდან დამატებით 3 მილიარდი აშშ დოლარი გამოუყოს. ამის შესახებ უკრაინის პრეზიდენტმა, ვოლოდიმირ ზელენსკიმ გუშინ განაცხადა.
იაპონიის პრემიერ-მინისტრ შიგერუ იშიბასთან სატელეფონო საუბრისას, ზელენსკიმ მას უკვე გაწეული, ჯამურად $12 მილიარდის მოცულობის დახმარებისთვის მადლობა გადაუხადა და აღნიშნა, რომ ეს „ათასობით ადამიანის სიცოცხლის გადარჩენას ხდის შესაძლებელს“.
„მე ვესაუბრე პრემიერ-მინისტრს იშიბას შობის ღამეს რუსეთის მიერ უკრაინის ენერგეტიკული ინფრასტრუქტურის მასიური დაბომბვის შესახებ და მადლობა გადავუხადე იაპონიას მზადყოფნისთვის, რომ იმუშაოს სამართლიანი და ხანგრძლივი მშვიდობის მისაღწევად“, – თქვა ზელენსკიმ.
24 დეკემბერს უკრაინამ იაპონიისა და დიდი ბრიტანეთისგან მსოფლიო ბანკის სასესხო პროგრამის ფარგლებში 1 მილიარდი დოლარი მიიღო. თანხა სოციალური და ჰუმანიტარული საჭიროებების დასაკმაყოფილებლად არის განკუთვნილი.
