ფოტო: Nathan Laine
მსოფლიოს უმდიდრესმა ადამიანმა, ილონ მასკიმა, Forbes-თან ინტერვიუში განაცხადა, რომ OpenAI-სთან სასამართლო დავაში მიღებული გადაწყვეტილება „საშიშ პრეცედენტს“ ქმნის და არაკომერციული ორგანიზაციების მიმართ ნდობას აზიანებს. აღსანიშნავია, რომ ეს მისი პირველი ინტერვიუ იყო მას შემდეგ, რაც სასამართლომ OpenAI-ის საქმეზე გადაწყვეტილება მის წინააღმდეგ მიიღო.
ამ ინტერვიუდან რამდენიმე საათით ადრე ნაფიცმა მსაჯულებმა დაადგინეს, რომ მასკმა OpenAI-ისა და მისი ხელმძღვანელის, სემ ალტმანის წინააღმდეგ სარჩელი დაგვიანებით შეიტანა. სასამართლომ მიიჩნია, რომ მისი პრეტენზიები კანონით განსაზღვრულ ვადებს სცდებოდა, რის გამოც საქმე არსებით განხილვამდე არც მისულა.
მასკი ამტკიცებდა, რომ OpenAI-ის ხელმძღვანელობამ დაარღვია კომპანიის თავდაპირველი მისია და ორგანიზაცია, რომელსაც საზოგადოებრივი ინტერესებისთვის უნდა ემუშავა, მოგებაზე ორიენტირებულ ბიზნესად გადააქცია. სასამართლოში ის $150 მილიარდის კომპენსაციას ითხოვდა და ასევე ალტმანისა და OpenAI-ის თანადამფუძნებლის, გრეგ ბროკმანის ხელმძღვანელი პოზიციებიდან ჩამოშორებას ცდილობდა.
„ვფიქრობ, ეს ძალიან საშიში პრეცედენტია,“ – განაცხადა მასკმა Forbes-ის კითხვაზე პასუხად. „თუ ვინმეს შეუძლია არაკომერციული ორგანიზაცია კომერციულ კომპანიად გადააქციოს, ეს ამერიკაში საქველმოქმედო საქმიანობის საფუძვლებს აზიანებს.“
სასამართლოში მარცხის მიუხედავად, მასკი ბრძოლის გაგრძელებას გეგმავს. მისი ადვოკატის, მარკ ტობეროფის თქმით, გადაწყვეტილება გასაჩივრდება. თავად მასკმა სოციალურ ქსელ X-ზე დაწერა, რომ სასამართლოს საქმე არსებითად არ განუხილავს და OpenAI-ის ხელმძღვანელები საკუთარი გამდიდრების მიზნით მოქმედებდნენ, თუმცა ეს ბრალდებები არც მოსამართლეს და არც ნაფიც მსაჯულებს ოფიციალურად არ დაუდასტურებიათ.
სასამართლო პროცესი სამი კვირის განმავლობაში მიმდინარეობდა და მასზე ჩვენება მისცეს როგორც მასკმა, ისე ალტმანმა. საქმე ერთ-ერთ ყველაზე ხმაურიან დაპირისპირებად იქცა ხელოვნური ინტელექტის ინდუსტრიაში, განსაკუთრებით იმ ფონზე, როცა მასკი უკვე საკუთარი AI-კომპანიის, xAI-ის განვითარებაზე მუშაობს და OpenAI-ის პირდაპირ კონკურენტად მიიჩნევა.
ინტერვიუს დროს მასკს ასევე ჰკითხეს SpaceX-ის შესაძლო IPO-ს შესახებ. Forbes-ის ცნობით, კომპანია შესაძლოა ისტორიაში ყველაზე მასშტაბური საჯარო შეთავაზებისთვის ემზადებოდეს, თუმცა მასკმა ამ თემაზე კომენტარის გაკეთებაზე უარი თქვა.
