მიშელ ობამამ მეორე ავტობიოგრაფიული წიგნი, სახელწოდებით „The Light We Carry“ დაწერა, რომელიც 15 ნოემბერს გამოიცემა. ამის შესახებ ინფორმაცია აშშ-ის ყოფილმა პირველმა ლედიმ სოციალურ მედიაში გაავრცელა.
„ბოლო რამდენიმე წლის განმავლობაში ვფიქრობდი იმაზე, თუ როგორ უნდა დარჩე კონცენტრირებული სამყაროში, რომელიც სავსეა გაურკვევლობებით. ამ პროცესმა მიბიძგა დამეწერა ახალი წიგნი – „The Light We Carry“ – რომელიც 15 ნოემბერს გამოვა“, – ასეთი ტექსტი დაურთო მიშელ ობამამ Twitter-ზე გამოქვეყნებულ ვიდეოს, რომელშიც სწორედ ახალ წიგნზე საუბრობს.
These past few years, I've been thinking about how to stay centered in a world filled with so much uncertainty. And that process led me to writing my new book—The Light We Carry—coming out on November 15. Learn more at https://t.co/IZWLMRGTn5. #TheLightWeCarry pic.twitter.com/Eblo8Xoapc
— Michelle Obama (@MichelleObama) July 21, 2022
გავრცელებული ინფორმაციის თანახმად, ობამას ახალ წიგნს საგამომცემლო სახლი Penguin Random House-ი დაბეჭდავს. საწყის ეტაპზე მისი 2.75 მილიონი ეგზემპლარის გამოშვება იგეგმება. აქვე აღსანიშნავია, რომ წიგნი 27 ქვეყანაში 14 ენაზე გამოიცემა.
როგორც გამომცემელმა Associated Press-ს განუცხადა, „The Light We Carry“ ობამას პირველი წიგნის გაგრძელებას არ წარმოადგენს. შეგახსენებთ, აშშ-ის ყოფილი პირველი ლედის სადებიუტო ავტობიოგრაფიულ წიგნს „Becoming“, რომელიც 2018 წლის ნოემბერში გამოიცა, საკმაოდ დიდი წარმატება ხვდა წილად. გამოქვეყნებიდან 15 დღეში, აშშ-სა და კანადაში, მისი 2 მილიონზე მეტი ეგზემპლარი გაიყიდა. Penguin Random House-ის ინფორმაციით, მთელ მსოფლიოში წიგნის 17 მილიონზე მეტი ასლია გაყიდული.
