რა გავლენა იქონია პანდემიამ სკოლის მოსწავლეების ფსიქიკურ ჯანმრთელობაზე

რა გავლენა იქონია პანდემიამ სკოლის მოსწავლეების ფსიქიკურ ჯანმრთელობაზე

პანდემიის შედეგად, ამერიკელ მოსწავლეებში მუდმივი სასოწარკვეთილების და უგუნებობის მაჩვენებელმა იმატა, რამაც ახალგაზრდებში არსებული მენტალური დაავადებების კრიზისი კიდევ უფრო გააღრმავა, – ამის შესახებ აშშ-ის დაავადებათა პრევენციისა და კონტროლის ცენტრის უახლეს კვლევაში ვკითხულობთ, რომელშიც მონაწილეობა 7,705-მა უფროსკლასელმა მოსწავლემ მიიღო.

აღსანიშნავია, რომ საშუალო სკოლის უფროსკლასელებში სასოწარკვეთილებისა და უგუნებობის მაჩვენებელმა 44.2% შეადგინა, რაც სამი წლის ჭრილში 7.5%-იან ნამატს ნიშნავს. ეს მაჩვენებელი გაცილებით უფრო მაღალია ლგბტქ+ კომუნის წარმომადგენლებში – ის 75.7%-ს შეადგენს, მაშინ, როცა ჰეტეროსექსუალ მოსწავლეებში ეს მაჩვენებელი 36.7%-ს უდრის.

ამასთანავე, კვლევაში ვკითხულობთ, რომ სუიციდის მცდელობის ალბათობა თითქმის ორჯერ უფრო დიდია მდედრობითი, ვიდრე მამრობითი სქესის მოსწავლეებში – საერთო ჯამში, 2019-2021 წლებში სუიციდის მცდელობების რიცხვმა 0.1%-ით იმატა და 9% შეადგინა. აღსანიშნავია, რომ ჯანდაცვის სტატისტიკის ეროვნული ცენტრის მონაცემების თანახმად, 2020 წელს თვითმკვლელობით სიცოცხლე 10-24 წლამდე ასაკის 6,627-მა ადამიანმა დაასრულა.

ბოლო დეკადის განმავლობაში ზრდა ყველა მიმართულებით დაფიქსირდა – 2009 წელს, მაგალითად, მუდმივი სასოწარკვეთილებისა და უგუნებობის გრძნობას მოსწავლეთა 26.1% უჩიოდა, სუიციდზე მოსწავლეთა 13.8% ფიქრობდა, ხოლო 6.3%-ს მისი მცდელობაც კი ჰქონდა.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *