თამამად შეიძლება ითქვას, რომ ტექნოლოგიური სიახლეებით სახელგანთქმული საუდის არაბეთისგან მრავალმხრივი ექსცენტრიკული გადაწყვეტები აღარავის უკვირს, მაგრამ ის, რასაც სამეფო ტახტის მემკვიდრე, მოჰამედ ბინ სალმანი ქვეყნის ჩრდილო-დასავლეთში ქმნის, ყოველგვარ ჩარჩოს სცდება და მასშტაბითა და არქიტექტურული გამჭრიახობით მხოლოდ გიზის პირამიდებს თუ გაუტოლდება.
ის, რისი აშენება საუდის არაბეთის ჩრდილო-დასავლეთში იგეგმება, მსოფლიოს უდიდესი ნაგებობა იქნება. ცხადია, საუბარია 487 მეტრის სიმაღლის და 120 კილომეტრის სიგრძის შუშის ცათამბჯენზე, რომელიც სათავეს წითელი ზღვის სანაპიროზე იღებს და მთებსა და უდაბნოს კვეთს. ეს პროექტი, რომელსაც The Mirror Line-ი ჰქვია, პრინც მუჰამედ ბინ სალმანის მიერ ინიცირებულ მომავლის ქალაქს, Neom-ს უკავშირდება. მუჰამედ ბინ სალმანისთვის ნეომი სიმბოლოა, რომლითაც საუდის არაბეთის ტრანსფორმაცია იწყება – ნავთობმომპოვებელი გიგანტი მთავარ წიაღისეულზენელ-ნელა უარს ამბობს და მაღალგანვითარებულ ტექნოლოგიებზე გადადის.
აღსანიშნავია, რომ საუდის არაბეთის ხელისუფლების ეს პროექტი გასაიდუმლოებულია – მასზე წვდომა ამერიკულმა გამოცემამ, The Wall Street Journal-მა მიიღო.
აღსანიშნავია, რომ 120 კილომეტრის სიგრძის ცათამბჯენი სრულად იმეორებს ქალაქ ნეომის ფუტურისტულ ხედვას. საინტერესოა, რომ შენობის სხვადასხვა ნაწილს შორის გადაადგილებისთვის, ადამიანები ცათამბჯენის ქვეშ გატარებული ჩქაროსნული მატარებლით ისარგებლებენ. მოსახლეობის გამოკვების საკითხის მოგვარება კი შენობის კონსტრუქციაში ინტეგრირებული ვერტიკალური ფერმების მეშვეობით იგეგმება. გადაწყვეტილია The Mirror Line-ში მცხოვრები ადამიანების გართობის საკითხიც – ამისთვის, საუდის არაბეთის ხელისუფლება 300 მეტრის სიმაღლეზე საფეხბურთო სტადიონის აშენებას, ხოლო შენობის ქვეშ – იახტების სადგომის მოწყობას გეგმავს.
თუმცა აქვე უნდა აღინიშნოს, რომ ამბიციური The Mirror Line-ი ქალაქ ნეომის პროექტში შემავალი მხოლოდ ერთ-ერთი ნაგებობაა. მთელი ეს ქალაქი, რომელიც საუდის არაბეთის სამეფო ტახტის მემკვიდრის, მოჰამედ ბინ სალმანის წარმოსახვის ნაყოფია, ამერიკის შტატ მასაჩუსეტსის ზომისაა. ამ პროექტით, საუდის არაბეთის ხელისუფლების ქვეყანაში პირდაპირი უცხოური ინვესტიციების მოზიდვა და ათასობით სამუშაო ადგილის შექმნა სურს.
თუმცა ყველაფერი ისე მარტივად არ არის, როგორც ეს საუდის არაბეთის ხელისუფლებას წარმოუდგენია – ამ ფუტურისტულ პროექტს არაერთი პოლიტიკური წინააღმდეგობის გადალახვა უწევს. საქმე ისაა, რომ ბოლო წლებში, არაბული სახელმწიფოს მიერ ადამიანის უფლებების არასათანადოდ დაცვისა და გამოჩენილი ჟურნალისტის, ჯამალ ხაშოგის მკვლელობის გამო, საუდის არაბეთის ხელისუფლებასა და დასავლურ სახელმწიფოებს შორის ურთიერთობა განსაკუთრებით დაიძაბა. თუმცა არსებობს მოსაზრება, რომ აშშ-ის პრეზიდენტსა და საუდის არაბეთის პრინცს შორის გასულ კვირას გამართული შეხვედრის შემდეგ ორ ქვეყანას შორის არსებული ურთიერთობები ნორმალიზაციისკენ აიღებს გეზს, რაც, თავისთავად, არაბულ ქვეყანაში ამერიკული ინვესტიციების შემოდინების შეუწყობს ხელს.
თუმცა პოლიტიკა ერთადერთი გარემოება არ არის, რომელიც უდაბნოში ფუტურისტული ქალაქის აშენებას უდგას წინ. 2021 წლის იანვარში მომზადებული ანგარიშიდან ირკვევა, The Mirror Line-ის აშენება რამდენიმე ეტაპად უნდა გაიმართოს, რასაც, საერთო ჯამში, 50 წლამდე დასჭირდება – ამგვარი გეგმა სრულად ეწინააღმდეგება სამეფო ტახტის მემკვიდრის გეგმას, რომლის თანახმად, ქალაქის მშენებლობა 2030 წლისთვის უნდა დასრულდეს.
ამასთანავე, როგორც ნეომის თანამშრომლების შიდა წერილიდან ირკვევა, ამგვარი პროპორციების ნაგებობა უდაბნოში არსებული მიწისქვეშა წყლების დინებას დაარღვევს და ენდემური ფრინველებისა და ცხოველების არსებობას ხელს შეუშლის.
თუმცა იმ შემთხვევაში, თუ საუდის არაბეთის ხელისუფლება The Mirror Line-ის აშენებას მართლაც მოახერხებს, ეს ნაგებობა კაცობრიობის ისტორიაში ისეთივე მნიშვნელობით შევა, როგორითაც გიზის პირამიდები ან ჩინეთის დიდი კედელი. ცნობისთვის გეტყვით, რომ მსოფლიოს ყველაზე გრძელი ცათამბჯენის სავარაუდო ღირებულება $1 ტრილიონს შეადგენს – შენობაში ხუთი მილიონი ადამიანის დაბინავება იგეგმება.
დატოვე კომენტარი
