SOCAR-ი შავ ზღვაში გაზის მოპოვების მიმართულებით თურქულ ნავთობკომპანიასთან თანამშრომლობას გეგმავს

SOCAR-ი შავ ზღვაში გაზის მოპოვების მიმართულებით თურქულ ნავთობკომპანიასთან თანამშრომლობას გეგმავს

თურქული ნავთობკომპანია Turkish Petroleum Corporation-ი (TPAO) და აზერბაიჯანის სახელმწიფო ნავთობკომპანია SOCAR-ი შავ ზღვაში გაზის მოპოვების სამუშაოებში თანამშრომლობას განიხილავენ. ამის შესახებ, თურქული მედიის ცნობით, SOCAR-ის თავმჯდომარემ თურქეთში, ვაგიფ ალიევმა განაცხადა.

როგორც მან აღნიშნა, შავ ზღვაში გაზის აღმოჩენისა და მოპოვების პროცესში თანამშრომლობა სტრატეგიულად მნიშვნელოვანია. „ეს ჩვენს ინტერესებშია“, – განაცხადა მან. ცნობისთვის, SOCAR-ი თურქულ ნავთობკომპანიასთან 1994 წლიდან თანამშრომლობს და ინვესტიციებს ახორციელებს.

თურქეთში SOCAR-ის თავმჯდომარემ ასევე ხაზი გაუსვა იმასაც, რომ TPAO-სთან თანამშრომლობა შესაძლოა გაგრძელდეს მესამე ქვეყნებში ინვესტიციების განხორციელებითაც, კერძოდ, პოტენციური პროექტების განხორციელებით „ენერგორესურსებით მდიდარ მესამე ქვეყნებში“. რომელ ქვეყნებზეა საუბარი, ჯერჯერობით უცნობია.

გარდა ამისა, თურქული მედიის ცნობით, SOCAR-ი კიდევ ერთ მსხვილ ინვესტიციას გეგმავს თურქეთში, საუბარია ბრიტანულ მულტინაციონალურ ქიმიურ კომპანია INEOS-სთან თანამშრომლობაზე.

„ინვესტიციის თაობაზე გადაწყვეტილება მომდევნო წელს გახდება ცნობილი. ჩვენ აღარ გვინდა, რომ ეს საკითხი კიდევ გადავავადოთ“, – განაცხადა ალიევმა.

მანამდე კი SOCAR-ის აღმასრულებელმა ხელმძღვანელმა თურქეთში, ზაურ გაჰრამანოვმა Anadolu Agency-ის განუცხადა, რომ პროექტის ინვესტიციის მოცულობა $1.6-დან $2 მილიარდამდე იქნება.

აღსანიშნავია, რომ ვაგიფ ალიევმა აღნიშნული განცხადებები თურქეთის პრეზიდენტის, რეჯეპ ტაიპ ერდოღანის აზერბაიჯანში ვიზიტის შემდეგ გააკეთა. როგორც ცნობილია, ერდოღანმა აზერბაიჯანელ კოლეგასთან ილჰამ ალიევთან SOCAR-ისა და TPAO-ს პოტენციური თანამშრომლობის საკითხები განიხილა.

SOCAR-ი თურქეთის უმსხვილესი უცხოელი ინვესტორია, რომლის მიერ თურქეთში განხორციელებული ინვესტიციები $16.5 მილიარდს შეადგენს.

ცნობისთვის, გასულ წელს თურქეთმა შავ ზღვაში  უმსხვილესი, 405 მილიარდი კუბური მეტრის მოცულობის გაზით მდიდარი საბადო აღმოაჩინა.

დატოვე კომენტარი

დაამატე კომენტარი

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *