ფოტო: ullstein bild | Getty Images
უკრაინის პრეზიდენტმა, ვოლოდიმირ ზელენსკიმ, ამერიკელი მილიარდერი ბიზნესმენი ილონ მასკი უკრაინის ერთ-ერთი უმაღლესი სახელმწიფო ჯილდოთი, თავისუფლების ორდენით დააჯილდოვა. შესაბამის ბრძანებას ზელენსკიმ ხელი უკვე მოაწერა.
„ადამიანის სიცოცხლისა და თავისუფლების დაცვის საქმეში განსაკუთრებული პირადი დამსახურებისთვის, ასევე უკრაინისა და ამერიკის შეერთებული შტატების ხალხებს შორის ურთიერთობების განვითარებაში შეტანილი წვლილისთვის, გამოვცემ ბრძანებას: თავისუფლების ორდენით დაჯილდოვდეს ამერიკის შეერთებული შტატების მოქალაქე, მეწარმე, ინჟინერი და SpaceX-ისა და Tesla-ს აღმასრულებელი დირექტორი ილონ მასკი“, — წერია ზელენსკის ბრძანებაში.
ცნობისთვის, მასკის SpaceX-ის სატელიტურ ინტერნეტსერვის Starlink-ს უკრაინის სამხედრო ძალები კომუნიკაციისა და ოპერაციების კოორდინაციისთვის 2022 წლიდან, რუსეთის ომის დაწყების პერიოდიდან, აქტიურად იყენებენ. 2026 წლის თებერვალში SpaceX-მა რუსეთის სამხედრო ძალების მიერ გამოყენებადი Starlink-ის ათასობით ტერმინალიც გათიშა, რითაც რუსული მხარის შესაძლებლობები შეასუსტა.
პარალელურად, კიევი ცდილობს მასკის დარწმუნებას, უკრაინის სამხედრო ძალებს Starlink-ის ქსელით სარგებლობის უფლება რუსეთის ტერიტორიაზეც მისცეს. ეს კიევს რუსეთის ტერიტორიაზე სარაკეტო და დრონებით თავდასხმისას ზუსტი დარტყმების განხორციელებაში დაეხმარება.
„მასკის პოზიციით, ამ ეტაპზე ეს ესკალაციად ჩაითვლება. თუმცა ახალი არგუმენტების მოსმენის შემთხვევაში, მან შესაძლოა გადაწყვეტილება შეცვალოს“, — განაცხადა ზელენსკიმ გასულ შაბათს ჟურნალისტებთან საუბრისას.
უკრაინა თავისუფლების ორდენს უცხოელ ლიდერებსა და საზოგადო მოღვაწეებს მხარდაჭერისთვის ხშირად გადასცემს. მათ შორის, ბოლო წლებში, ზელენსკიმ ორდენით საფრანგეთის პრეზიდენტი ემანუელ მაკრონი, გაერთიანებული სამეფოს პრემიერ-მინისტრი ენდი ბერნემი და ლიეტუვის პრეზიდენტი გიტანას ნაუსედა დააჯილდოვა.
