2026 წლის ყველაზე მაღალანაზღაურებადი პოდკასტერები

ფოტოები: Getty Images

ჯეი შეტის მსგავსი შოუების ბაზარზე სტრიმინგის სერვისების შემოსვლით, პოდკასტერს, ტელეწამყვანსა და ინტერნეტკრეატორს შორის ზღვარი არასდროს ყოფილა ასეთი ბუნდოვანი, ხოლო ანაზღაურება – ასეთი დიდი.

როდესაც ჯეი შეტიმ 2019 წელს დაიწყო თავისი პოდკასტი On Purpose-ი, მას ახსოვს, როგორ ეუბნებოდა ხალხი, რომ უკვე დააგვიანდა. მათი თქმით, მედია უკვე გაჯერებული იყო, და ზრდისთვის აღარ იყო ადგილი. და განა ის სინამდვილეში მხოლოდ კონტენტკრეატორი არ იყო?

შვიდი წლის შემდეგ, 38 წლის თვითდახმარების გურუ მსოფლიოში ერთ-ერთ ყველაზე პოპულარულ პოდკასტს უძღვება, რომელიც კონკურენციას უწევს არა მხოლოდ უდიდეს სატელევიზიო, რადიო– და ინტერნეტტოქშოუებს, არამედ მთლიანად შლის ზღვარს მათ შორის. იმდენივე ადამიანი უყურებს მის ხანგრძლივ ინტერვიუებს სელებრითებთან (მათ შორის მიშელ ობამასა და მეტ დეიმონთან) YouTube-ზე, რამდენიც უსმენს iHeartMedia ქსელს – დისტრიბუციულ გარიგებებს, რომლებმაც, Forbes-ის შეფასებით, შეტის ბოლო 12 თვის განმავლობაში $21 მილიონი გადაუხადა. და როდესაც ეს გარიგებები წელს ამოიწურა, შეტიმ ახალი ტიპის კონტრაქტი მიიღო, რომლის მიხედვითაც მისი შოუს აუდიო– და ვიდეომასალა არა მხოლოდ Spotify-ზე, არამედ Netflix-ზეც გავრცელდებოდა, ორი კომპანია კი მას მომდევნო სამი წლის განმავლობაში დაახლოებით $100 მილიონს გადაუხდიდა.

„როდესაც დავიწყე, პოდკასტში ვიდეოს გამოყენება ნორმალური არ იყო, – განუცხადა შეტიმ Forbes-ს. – დღეს შოუსთვის ერთმანეთს ოთხი უდიდესი სტრიმერი ეჯიბრებოდა. ასეთი ინტერესი და ენთუზიაზმი საკმაოდ გასაოცარი იყო – ჩემთვის და მთლიანად ინდუსტრიისთვის“.

შთამბეჭდავია, რომ შეტის მსგავსი მეგაგარიგებებისას, ფილმების, ტელევიზიის ან გართობის სხვა ფორმების შემქმნელებისგან განსხვავებით, პოდკასტერები ინარჩუნებენ თავიანთი შოუს ძირითად ინტელექტუალურ საკუთრებას, რაც ნიშნავს, რომ ქსელები და პლატფორმები მილიონებს იხდიან მხოლოდ იმისთვის, რომ გარკვეული წლების განმავლობაში ჰქონდეთ დისტრიბუციისა და სარეკლამო გაყიდვების პარტნიორის ლიცენზია. ესაა ერთ-ერთი მიზეზი, რის გამოც პრემიუმ–სტრიმინგის გიგანტები, როგორიცაა Netflix-ი, Hulu და Tubi, დიდწილად უგულებელყოფდნენ ინდუსტრიის აღმავლობას ბოლო ათწლეულის განმავლობაში, რამაც YouTube-ს საშუალება მისცა, მსოფლიოში უდიდეს პოდკასტინგის პლატფორმად გადაქცეულიყო. თუმცა, 2025 წლიდან, იმ იმედით, რომ YouTube-ის დომინირებას ჩართულობის დროს შეამცირებდნენ, სტრიმერები ბაზარზე დიდი ამბით შევიდნენ.

ინდუსტრიის გარიგების შემქმნელები ამბობენ, რომ მას შემდეგ, რაც Netflix-ის საწყისი $1-დან $2 მილიონამდე შეთავაზებები საუკეთესო პოდკასტებისთვის კატეგორიულად უარყოფილ იქნა, სტრიმერმა მიიღო მსგავსი სტრატეგია, რომელიც ადრე გამოიყენა სცენარით განსაზღვრული ტელევიზიის ბაზრის წილის მოსაპოვებლად – გადაჭარბებული გადახდა, რათა ტალანტები მოქმედი პლატფორმებიდან მოეზიდათ. წელიწადში $10 მილიონის ან მეტის შეთავაზებებმა (ერთ– ან ორწლიან საცდელ ვადაში) საბოლოოდ დაარწმუნა Spotify-ის, iHeart-ისა და Barstool Sports-ის წამყვანი შოუები, რომ ამ პროექტს შეერთებოდნენ. როგორც ამბობენ, დიდ ბრიტანეთში დაფუძნებულმა პოდკასტ-ქსელმა Goalhanger-მა Netflix-ისგან $19 მილიონი მიიღო, რათა ამ უკანასკნელს მსოფლიო ჩემპიონატის დროს ყოველდღიური ტოქშოუ The Rest Is Football-ის მხოლოდ 40 ეპიზოდი ეჩვენებინა.

„ჩვენ ვიდეოპოდკასტებს თანამედროვე ტოქშოუს მსგავსად აღვიქვამთ“, – განაცხადა Netflix-ის თანააღმასრულებელმა დირექტორმა ტედ სარანდოსმა კომპანიის შემოსავლების შესახებ კონფერენციის დროს, წელს. „მაგრამ ერთი ბრენდის მიხედვით განსაზღვრული შოუს ნაცვლად, ასობით შოუ გაქვთ“.

მიუხედავად ამისა, პოდკასტები პოპულარულია ტრადიციული ტელევიზიისგან მათი თანდაყოლილი განსხვავებების გამო. მათი წარმოება გაცილებით იაფია, მათი გაშვება შეიძლება მთელი წლის განმავლობაში და შემოსავლის უმეტესი ნაწილის გამომუშავება აუდიო– და ვიდეოჩანაწერებში ჩასმული წამყვანის წაკითხული რეკლამებიდანაა შესაძლებელი. მაღალი დონის შოუებში, სანდო წამყვანის პირადი მხარდაჭერისთვის ან აუდიტორიის კონკრეტული დემოგრაფიული ჯგუფის მიზნობრივი გამოყენებისთვის ბრენდები პრემიუმ–ფასებს იხდიან.

ჯო როგანი მსოფლიოში ყველაზე მაღალანაზღაურებადი პოდკასტერია, რადგან ის მსმენელის ღრმა ნდობას მასიურ მასშტაბთან აერთიანებს, თვეში დაახლოებით 15 ეპიზოდს უშვებს და, მონაცემთა ერთ-ერთი პროვაიდერის თქმით, 80 მილიონზე მეტ ჩამოტვირთვასა და ნახვას იზიდავს. 2024 წელს Spotify-მ ის ახალი სამწლიანი კონტრაქტით დააჯილდოვა, რომლის ღირებულებამ შეიძლება $250 მილიონს მიაღწიოს.

პოდკასტერების უმეტესობისთვის, შეტის მსგავსი $100 მილიონზე მეტი კონტრაქტის მოპოვება რომელიმე მთავარი ქსელიდან – ძირითადად Spotify-დან, SiriusXM-იდან ან iHeart-იდან – კვლავ უდიდესი პრიზია. დადებული გარიგებები ფულს გარანტირებული ავანსის სახით იხდიან, შემოსავლების განაწილების მოდელით, რომელიც მოქმედებს ზღვრული ნიშნულის ზემოთ გენერირებულ ნებისმიერ დამატებით მოგებაზე, თუმცა ქსელებს შორის კონკურენციაა ის, რაც ელიტური ტალანტების მცირე ჯგუფისთვის გარანტიებს წელიწადში $30 მილიონს ზევით ზრდის. ამ ტემპით, ნაკლებად სავარაუდოა, რომ რეკლამის გაყიდვები ქსელებს შოუებიდან დიდ მოგებას მოუტანს, თუ საერთოდ მოუტანს რამეს. „თეორიულად, – ამბობს ერთ-ერთი წამყვანი იურისტი, – თუ კლიენტმა გარიგებიდან მოგება მიიღო, თქვენ ცუდი გარიგება დაგიდვიათ“.

მიუხედავად ამისა, ქსელები თავიანთ ყველაზე დიდ გარიგებებს სხვა მოსაზრებებით ამართლებენ, მათ შორის აბონენტებისა და მოწინავე კომპანიების სპონსორობის მოზიდვით, ასევე ტალანტების ბრენდის ელჩებად გამოყენებით. მაგალითად, Wondery-ის წამყვანი პოდკასტერები, New Heights-ის წამყვანები ჯეისონ და ტრევის კელსები, ივნისში Cannes Lions-ის ფესტივალზე მშობელი კომპანია Amazon-ის პანელზე გამოჩნდნენ.

ამასობაში, ტალანტები იყენებენ თავიანთ მეგაგარიგებებს და ინტელექტუალურ საკუთრებაზე კონტროლს, რათა შექმნან შოუების მინი–ქსელები თავიანთი ქოლგის ქვეშ, როგორიცაა ალექს კუპერის Unwell SiriusXM-ზე ან Charlamagne Tha God-ის Black Effect Podcast Network iHeart-ზე. ეს ქსელები ტალანტებს საშუალებას აძლევს, დამატებითი შემოსავალი მიიღონ სპონსორებისგან, იმისთვის, რომ მთავარ შოუში ადგილის მოსაპოვებლად რეკლამირება მოახდინონ მთელ რიგ არხებზე. თუმცა, დღემდე, ტალანტებით მართულ ამ ქსელებს ახალი ჰიტების გენერირება უჭირდათ და იმის გამო, რომ მათ ყველა წარმოებისა და ზედნადები ხარჯის გადახდა ჯიბიდან უწევთ, რამდენიმე კომპანიაში თანამშრომლების შემცირება (Crooked-ი) და მაღალი გადინება (Unwell-ი) დაფიქსირდა. დამოუკიდებელი ქსელები, როგორიცაა სტივენ ბარტლეტის Flight Story ან The Joe Budden Network–ი, უფრო მეტ წარმატებას აღწევენ თანდათანობით განვითარებაში.

საუკეთესო მოცემულობაშიც კი, კომპანიები ნაკლებად არსებობენ იმ ფულადი ნაკადებისთვის, რომელთა გენერირებაც შეუძლიათ და უფრო მეტად იმ აქტივებისთვის, რომლებადაც შეიძლება იქცნენ. ბილ სიმონსმა თავისი პოდკასტების ქსელი, The Ringer-ი, Spotify-ს 2020 წელს, დაახლოებით $200 მილიონად მიჰყიდა, ხოლო კონან ო’ბრაიენმა ორი წლის შემდეგ იგივე გააკეთა და SiriusXM-ისგან დაახლოებით $150 მილიონი მიიღო. აპრილში OpenAI-მა შეიძინა ტექნოლოგიური შოუ TBPN, რომელიც დაახლოებით $150 მილიონი ნაღდი ფულითა და აქციებით იყო წარმოდგენილი, რაც, Forbes-ის შეფასებით, მის წამყვანებს, ჯონ კუგანსა და ჯორდი ჰეისს, თითქმის $70 მილიონის მოგებას მოუტანს.

შეტი თავის საპროდიუსერო კომპანია Perfect Strangers-თან შედარებით ოდნავ განსხვავებულ მიდგომას ირჩევს და მცირერიცხოვან პრემიუმ–პროექტებში ინვესტირებას ახდენს. ამჟამად ის რამდენიმე სასცენარო და სცენარის გარეშე სატელევიზიო შოუს შემუშავების პროცესშია – Netflix-ში, ალბათ არა შემთხვევით – და არის ჟანრის შემცვლელი პოდკასტის, Friends Keep Secrets-ის პროდიუსერი, რომლის წამყვანები ბენი ბლანკო, დეივ ბერდი (უფრო ცნობილი როგორც ლილ დიკი) და კრისტინ ბატალუკო ცნობილ სტუმრებს ართობენ, სანამ მათ სახლში მიმოფანტული ფარული კამერები და მიკროფონები იწერენ. Spotify-ის რედაქტორებმა ეს პოდკასტი წლის ერთ-ერთ საუკეთესო ახალ პოდკასტად დაასახელეს.

„ხალხი ხშირად ამბობს: „ოჰ, თუ ეს ყველაფერი [პოდკასტის] დროს გააკეთე, რატომ აკეთებ სხვა რამეებსაც?“ – ამბობს შეტი. „მე კი ვპასუხობ: ‘არა, თქვენ ეს ყველაფერი იმისთვის გააკეთეთ, რომ შეგეძლოთ გააკეთოთ ყველაფერი, რაც კი მოგესურვებათ’. სწორედ ესაა მეწარმეობის ოცნებაც“.