2025 წელი ოქროსთვის რეკორდული წელი აღმოჩნდა. ძვირფასი ლითონის ღირებულებამ ისტორიული ნიშნული არაერთხელ გადალახა და ბოლოს უნციაზე 4,500 დოლარსაც გადააჭარბა.
მიმდინარე წელს ოქროს ფასის მკვეთრი ზრდა უსაფრთხო აქტივებზე მოთხოვნის მატებამ, აშშ-ის ფედერალური რეზერვის მიერ საპროცენტო განაკვეთების შემცირების მოლოდინმა და ცენტრალური ბანკების მხრიდან ოქროს მარაგების აქტიურად შევსებამ განაპირობა. გლობალური ეკონომიკური თუ გეოპოლიტიკური გაურკვევლობის პირობებში, ბევრმა ქვეყანამ გადაწყვიტა საკუთარი რეზერვების დივერსიფიკაცია, რაც ბაზრის დინამიკაზე პირდაპირ აისახა.
აღნიშნული პერიოდის განმავლობაში მსოფლიო ოქროს რეზერვების ჯამურმა ღირებულებამ 4.67 ტრილიონ დოლარს მიაღწია, რაც უპრეცედენტო მაჩვენებელია. აშშ კვლავ ინარჩუნებს ლიდერობას 1.16 ტრილიონი დოლარის ღირებულების მარაგებით, მას მოჰყვება გერმანია 477.29 მილიარდი დოლარით, ხოლო იტალია და საფრანგეთი ასევე რჩებიან მოწინავე პოზიციებზე.
2025 წელს ოქროს შესყიდვების კუთხით განსაკუთრებული აქტიურობით პოლონეთი გამოირჩა, რომელმაც რეზერვებს 82.67 ტონა ოქრო დაამატა და თავისი მარაგების ღირებულება 75.63 მილიარდ დოლარამდე გაზარდა. მას მოჰყვება ყაზახეთი 40.97 ტონით და ბრაზილია 31.48 ტონით, რაც მიუთითებს, რომ განვითარებადი ეკონომიკები ოქროს ეროვნული უსაფრთხოების გარანტად მიიჩნევენ.
სხვა მნიშვნელოვან შემსყიდველებს შორის აღსანიშნავია თურქეთი და ჩინეთი, რომლებმაც მარაგები, შესაბამისად, 26.68 და 24.88 ტონით გაზარდეს. მიუხედავად მაღალი ფასებისა, ოქროს მიმართ ინტერესი არ განელებულა ისეთ ქვეყნებშიც, როგორიცაა ჩეხეთი, რომელმაც 18.04 ტონა ძვირფასი ლითონი შეიძინა, ასევე ერაყი, კამბოჯა, განა და გვატემალა.
ეს ტენდენცია ნათლად აჩვენებს, რომ მსოფლიოს წამყვანი თუ განვითარებადი სახელმწიფოები ოქროს ხედავენ როგორც მთავარ ინსტრუმენტს ინფლაციისა და გეოპოლიტიკური რისკებისგან თავის დასაცავად, მაშინაც კი, როდესაც ფასები პიკურ ნიშნულზეა.
BestBrokers-ის გუნდმა მსოფლიო ოქროს საბჭოს დეკემბრის ანგარიში გააანალიზა, რომელიც 2025 წლის ყველა ხელმისაწვდომ მონაცემს აერთიანებს და მსოფლიოში ოქროს უმსხვილესი შემსყიდველები გამოავლინა.
ქვეყნები, რომლებმაც 2025 წელს ყველაზე მეტი ოქრო შეიძინეს:
პოლონეთი: +82.67 ტონა, რეზერვების ღირებულება ამჟამად 75.63 მილიარდი დოლარია
ყაზახეთი: +40.97 ტონა, რეზერვების ღირებულება ამჟამად 46.30 მილიარდი დოლარია
ბრაზილია: +31.48 ტონა, რეზერვების ღირებულება ამჟამად 22.95 მილიარდი დოლარია
თურქეთი: +26.68 ტონა, რეზერვების ღირებულება ამჟამად 91.79 მილიარდი დოლარია
ჩინეთი: +24.88 ტონა, რეზერვების ღირებულება ამჟამად 328.30 მილიარდი დოლარია
ჩეხეთის რესპუბლიკა: +18.04 ტონა, რეზერვების ღირებულება ამჟამად 9.86 მილიარდი დოლარია
ერაყი: +8.21 ტონა, რეზერვების ღირებულება ამჟამად 24.34 მილიარდი დოლარია
კამბოჯა: +7.96 ტონა, რეზერვების ღირებულება ამჟამად 7.75 მილიარდი დოლარია
განა: +7.51 ტონა, რეზერვების ღირებულება ამჟამად 5.42 მილიარდი დოლარია
გვატემალა: +6.12 ტონა, რეზერვების ღირებულება ამჟამად 1.85 მილიარდი დოლარია
