ბიტკოინის გლობალური მაინინგი წელიწადში დაახლოებით 152,270 გვტ.სთ ელექტროენერგიას მოითხოვს. ეს ციფრი იმდენად მასშტაბურია, რომ ის აღემატება ისეთი განვითარებული ქვეყნების მთლიან წლიურ ენერგომოხმარებას, როგორიცაა შვედეთი, ნორვეგია და ნიდერლანდები.
BestBrokers-ის გუნდმა კემბრიჯის ელექტროენერგიის მოხმარების ინდექსზე დაყრდნობით ჩაატარა კვლევა, რომელმაც აჩვენა, რომ მაინინგის პროცესი კოლოსალურ ენერგორესურსს მოითხოვს. ყოველდღიურად მსოფლიო მაინერები 417.18 გვტ.სთ ენერგიას ხარჯავენ. ბიტკოინის ქსელი კი ისეა მოწყობილი, რომ ყოველ 24 საათში საშუალოდ 144 ბლოკი მუშავდება, რაც დღეში 450 ახალი ბიტკოინის მოპოვების საშუალებას იძლევა.
2025 წლის დეკემბრის მონაცემებით, აშშ-ში ერთი ბიტკოინის მაინინგის თვითღირებულებამ 130,000 დოლარს მიაღწია, რაც მის საბაზრო ფასზე ბევრად მეტია. აშშ-ში მაინინგი დღეში 158.2 გვტ.სთ ენერგიას მოითხოვს, რაც ქვეყნის წლიური ენერგომოხმარების 1.3%-ზე მეტია.
ნოემბერში კრიპტოვალუტის ფასის 30%-იანმა ვარდნამ მაინერები მძიმე მდგომარეობაში ჩააყენა. ამჟამად ბაზარზე ბიტკოინის პირდაპირ ყიდვა უფრო იაფია, ვიდრე მისი მოპოვება.
შექმნილი ვითარება აჩვენებს, რომ თუ ბიტკოინის ფასი მკვეთრად არ გაიზარდა, მაინერების დიდ ნაწილს ოპერირების გაგრძელება წამგებიან პირობებში მოუწევთ, რაც შესაძლოა ქსელის ჰეშრეიტის მნიშვნელოვანი გადანაწილების მიზეზი გახდეს.
