ფოტო: Bloomberg
Reuters-ის ინფორმაციით, გერმანიაში მდებარე რუსულ მფლობელობაში არსებული ნავთობგადამმუშავებელი ქარხნის მენეჯმენტმა ბერლინს კერძო მიმოწერაში აცნობა, რომ აშშ-ის სანქციები ბიზნესს აზარალებს და ქვეყნის დედაქალაქისა და რეგიონისთვის საწვავის მიწოდებას საფრთხეს უქმნის. მედიასააგენტო აღნიშნულ ინფორმაციას წერილზე დაყრდნობით ავრცელებს.
იანვარში გაგზავნილ წერილში, PCK Schwedt-ის ქარხნის (რომელსაც „როსნეფტი“ აკონტროლებს) ხელმძღვანელობა ეკონომიკისა და ენერგეტიკის მინისტრ კატარინა რაიხეს „გადაუდებელი მიმართვით“ სთხოვს, ქარხნის მომავლის შესახებ აშშ-სთან არსებული გაურკვევლობა მოაგვაროს.
როგორც Reuters-ი წერს, ეს ქარხანა ბერლინში ყოველი 10 ავტომობილიდან 9-ს ამარაგებს საწვავით, ასევე ემსახურება აეროპორტს, ბრანდენბურგის ფედერალურ მიწასა და აღმოსავლეთ გერმანიას, და ქიმიური ინდუსტრიისთვის მნიშვნელოვანი კომპონენტების მიწოდებას უზრუნველყოფს. წერილში აღნიშნულია, რომ მიმდინარე სანქციები რეგიონის მომარაგების უსაფრთხოებაზე აისახება.
გასული წლის ბოლოს ვაშინგტონმა რუსეთის ენერგოსექტორზე ზეწოლის ფარგლებში „როსნეფტს“ სანქციები დაუწესა. ბერლინის ლობირების შედეგად PCK Schwedt-მა დროებითი გამონაკლისი მიიღო, თუმცა მისი მოქმედების ვადა 29 აპრილს იწურება.
წყაროს ინფორმაციით, ქარხნის საქმიანობა დამოკიდებულია გრძელვადიან მომარაგების კონტრაქტებზე, ბანკებზე გადახდებისთვის და სადაზღვევო კომპანიებზე ნავთობის ტვირთების დასაზღვევად. სანქციებში მოხვედრის შიშმა უკვე შეარყია „როსნეფტის“ გერმანული ფილიალის მიმართ ნდობა, მათ შორის ბანკებსა და მთავარ მომწოდებელთან, ყაზახეთთან ურთიერთობაში.
ქარხნის მენეჯმენტი წერილში აღნიშნავს, რომ უკვე აწყდება ოპერაციულ შეზღუდვებს და მთავრობას აშშ-ის სანქციებიდან მუდმივი გამონაკლისის მიღებას სთხოვს.
