ფოტო: David Paul Morris/Bloomberg
Oracle-ის თანადამფუძნებელი ლარი ელისონი Forbes-ის უმდიდრეს ადამიანთა რეიტინგში მეორე ადგილზე დაბრუნდა. ბოლო ხუთ დღეში Oracle-ის აქციების ფასის 28%-იანი ზრდის ფონზე, ელისონმა ქონება მნიშვნელოვნად გაზარდა და სიაში ლარი პეიჯს, სერგეი ბრინსა და ჯეფ ბეზოსს გადაუსწრო.
სამშაბათს, საფონდო ბირჟების დახურვისას, ელისონის ქონება დაახლოებით 296 მილიარდ დოლარს შეადგენდა. მიუხედავად იმისა, რომ მისი ქონება წინა დღესთან შედარებით დაახლოებით 4 მილიარდი დოლარით შემცირდა, მილიარდერმა მეორე ადგილი მაინც შეინარჩუნა. ერთი დღით ადრე Oracle-ის აქციების ფასის მკვეთრი ზრდის შედეგად ელისონის ქონებამ 300 მილიარდ დოლარსაც გადააჭარბა.
ამჟამად Forbes-ის უმდიდრესი ადამიანების რეიტინგში ელისონს მხოლოდ ილონ მასკი უსწრებს, რომლის ქონება დაახლოებით 826 მილიარდ დოლარად არის შეფასებული.
Oracle-ის წარმატება პირდაპირ უკავშირდება ხელოვნური ინტელექტის ბუმს. კომპანია, რომელიც წარსულში ძირითადად მონაცემთა ბაზების პროგრამული უზრუნველყოფით იყო ცნობილი, დღეს ერთ-ერთ მთავარ მიმწოდებლად იქცა იმ გამოთვლითი ინფრასტრუქტურისა, რომელიც ChatGPT-ის მსგავსი მოწინავე AI-მოდელების მუშაობას უზრუნველყოფს. სწორედ ამ ტრანსფორმაციამ და ინვესტორების პოზიტიურმა განწყობამ Oracle-ის აქციები მნიშვნელოვნად გააძვირა.
საპირისპირო ვითარებაა Google-ის მშობელი კომპანიის, Alphabet-ის შემთხვევაში. კომპანიის აქციების ფასი ბოლო ხუთ დღეში 6%-ით შემცირდა, ხოლო სამშაბათს დამატებით 3.8%-ით დაეცა. ინვესტორების შიში გამოიწვია კომპანიის მიერ გაცხადებულმა გეგმამ, AI-ინფრასტრუქტურის დასაფინანსებლად 80 მილიარდი დოლარი მოიზიდოს.
Alphabet-ის აქციების ფასის ვარდნამ კომპანიის თანადამფუძნებლების ქონებაზეც იმოქმედა. ლარი პეიჯმა და სერგეი ბრინმა ერთ დღეში დაახლოებით 10-10 მილიარდი დოლარი დაკარგეს.
ანალიტიკოსების შეფასებით, ხელოვნური ინტელექტის რბოლა ერთდროულად ქმნის და ამცირებს მილიარდერთა ქონებებს. ერთი მხრივ, ინფრასტრუქტურის მიმწოდებლები, როგორიცაა Oracle-ი, სარგებელს იღებენ AI-ზე მზარდი მოთხოვნიდან, ხოლო მეორე მხრივ, ისეთი ტექნოლოგიური გიგანტები, როგორებიც არიან Alphabet-ი, Microsoft-ი, Meta და Amazon-ი, ასობით მილიარდ დოლარს ხარჯავენ ახალი მონაცემთა ცენტრებისა და გამოთვლითი სიმძლავრეების განვითარებაზე.
მოლოდინების მიხედვით, ღრუბლოვანი ტექნოლოგიების ოთხი უმსხვილესი ოპერატორი – Alphabet-ი, Microsoft-ი, Meta და Amazon-ი – მიმდინარე წელს ხელოვნურ ინტელექტთან დაკავშირებულ ინფრასტრუქტურაში ჯამურად 725 მილიარდ დოლარს დახარჯავენ. ეს მაჩვენებელი თითქმის ორჯერ აღემატება გასული წლის დანახარჯებს და ანალიტიკოსები ვარაუდობენ, რომ უახლოეს წლებში 1 ტრილიონ დოლარსაც გადააჭარბებს.
რაც შეეხება ლარი ელისონს, 80 წლის მილიარდერი Oracle-ის აქციების გარდა, Tesla-ს აქციონერი და ილონ მასკის დიდი ხნის მოკავშირეა. ის ასევე ფლობს ჰავაის კუნძულ ლანაის დაახლოებით 98%-ს და აქტიურად უჭერს მხარს მისი შვილის, დევიდ ელისონის ბიზნესპროექტებს, მათ შორის Skydance-სა და Paramount-ს. 2025 წლის სექტემბერში ელისონმა მცირე ხნით მსოფლიოს უმდიდრესი ადამიანის პოზიციაც დაიკავა, როდესაც მისი ქონების ღირებულებამ 400 მილიარდ დოლარს გადააჭარბა.
