ფოტო: telanganatoday.com
ირანის ისლამური რევოლუციის გუშაგთა კორპუსის განცხადებით, ქვეყანამ დღეს იორდანიაში მდებარე აშშ-ის სამხედრო ბაზასა და სპარსეთის ყურის რეგიონში არსებულ კიდევ 21 ობიექტზე რაკეტებითა და დრონებით თავდასხმები განახორციელა. თეირანის თქმით, ეს პასუხი იყო აშშ-ის მიერ ჰორმუზის სრუტის მიმდებარე ტერიტორიებზე განხორციელებულ სამხედრო ოპერაციაზე.
ირანული მედიის ინფორმაციით, სამიზნეებს შორის იყო აშშ-ის სამხედრო ობიექტები იორდანიაში, ქუვეითსა და ბაჰრეინში. აღსანიშნავია, რომ ერთ-ერთი ყველაზე მასშტაბური სამხედრო ესკალაციაა მას შემდეგ, რაც ვაშინგტონმა და თეირანმა აპრილში ცეცხლის შეწყვეტის შეთანხმებას მიაღწიეს.
დაპირისპირება მას შემდეგ გამწვავდა, რაც აშშ-ის სამხედრო ძალებმა ჰორმუზის სრუტის მახლობლად ირანის საჰაერო თავდაცვის სისტემებზე, მართვის ცენტრებსა და სადაზვერვო რადარებზე იერიში მიიტანეს. აშშ-ის პრეზიდენტის, დონალდ ტრამპის განცხადებით, ოპერაცია პასუხი იყო ირანის მიერ ამერიკული Apache-ის ტიპის სამხედრო ვერტმფრენის ჩამოგდებაზე.
„ვფიქრობ, პასუხი ძალიან ძლიერი უნდა იყოს და სწორედ ასეთია ეს ოპერაცია“, – განაცხადა ტრამპმა ABC News-თან ინტერვიუში.
ირანის სახელმწიფო მედიის ცნობით, ამერიკულმა ძალებმა იერიში მიიტანეს ჰორმუზის სრუტეში მდებარე ქეშმის კუნძულსა და სირიკის საპორტო ქალაქზე. აფეთქებების ხმა ისმოდა ასევე ბანდარ-აბასისა და ჯასკის რაიონებში.
საპასუხოდ, ირანის რევოლუციურმა გუშაგთა კორპუსმა განაცხადა, რომ იორდანიაში მდებარე ალ-აზრაქის ამერიკულ ბაზაზე ოთხი სამიზნე შორი მოქმედების რაკეტებით დაბომბა. მათი მტკიცებით, სამიზნეებს შორის იყო F-35 ტიპის გამანადგურებლების ანგარები და სარდლობის ცენტრი.
თუმცა, იორდანიის შეიარაღებული ძალების განცხადებით, მათ ხუთი ირანული რაკეტა გაანადგურეს, რომლებიც ალ-აზრაქის ბაზისკენ იყო გაშვებული. სამხედროების თქმით, რაკეტების ნამსხვრევები ქვეყნის ტერიტორიაზე ჩამოცვივდა, მაგრამ მსხვერპლი და მნიშვნელოვანი ზიანი არ დაფიქსირებულა.
ქუვეითის სამხედრო უწყებამ ასევე დაადასტურა, რომ ქვეყნის საჰაერო თავდაცვის სისტემები მტრულ საჰაერო სამიზნეებს ებრძოდნენ მას შემდეგ, რაც ირანმა განაცხადა, რომ ქუვეითში მდებარე ალი ალ სალემის ბაზაზე დრონებით შეტევა განახორციელა.
ამასთან, ირანმა განაცხადა, რომ დრონებით შეუტია აშშ-ის მეხუთე ფლოტის ობიექტებს ბაჰრეინში და გააფრთხილა ვაშინგტონი, რომ სამხედრო მოქმედებების გაგრძელების შემთხვევაში „კიდევ უფრო მკაცრ პასუხს“ ელოდოს.
ბაჰრეინის შინაგან საქმეთა სამინისტრომ მოსახლეობას უსაფრთხო ადგილებში გადასვლისკენ მოუწოდა და საჰაერო განგაში გამოაცხადა. მოგვიანებით სამეფოს წარმომადგენლებმა განაცხადეს, რომ ქვეყნის საჰაერო თავდაცვამ ირანული თავდასხმები მოიგერია.
აშშ-ის ერთ-ერთმა მაღალჩინოსანმა, რომელმაც ანონიმურობის დაცვა ითხოვა, განაცხადა, რომ პირველადი შეფასებით, ირანის მიერ გაშვებული რაკეტებისა და დრონების თითქმის ყველა ერთეული განეიტრალდა და ამ ეტაპზე ამერიკულ სამხედრო პერსონალს შორის დაზარალებულების შესახებ ინფორმაცია არ არსებობს.
