ფოტო: AFP
აშშ და კანადა მუშაობენ შეთანხმებაზე, რომელიც მიზნად ისახავს კანადურ ფოლადსა და ავტომობილებზე დაწესებული ამერიკული ტარიფების შემსუბუქებას. ორი ქვეყნის მთავრობები ცდილობენ გამოასწორონ ურთიერთობები, რომლებიც აგვისტოში, სავაჭრო მოლაპარაკებების ჩაშლის შემდეგ, დაიძაბა.
მოლაპარაკებები აშშ-ის სავაჭრო კანონმდებლობის 232-ე მუხლის საფუძველზე დაწესებულ ტარიფებს შეეხება, მათ შორის, კანადურ ფოლადზე 50%-მდე და ავტომობილებზე 25%-იან საიმპორტო გადასახადებს.
კანადური პროდუქციის იმპორტზე დაწესებული ტარიფები ტრამპისთვის პოლიტიკურ ტვირთად იქცა, რის გამოც სასაზღვრო შტატებში რესპუბლიკელი კანდიდატები კანადასთან სავაჭრო ომის დასრულებას სულ უფრო აქტიურად ითხოვენ.
მოლაპარაკებებში ჩართული კანადელი ანონიმური პირი აცხადებს, რომ ფოლადსა და ავტომობილებზე დაწესებულ ტარიფებთან დაკავშირებული შეთანხმება შესაძლოა 3 ნოემბრის შუალედურ არჩევნებამდე გაფორმდეს. ამავდროულად, აშშ-ის წარმომადგენელი ანონიმური პირები აღნიშნავენ, რომ ტრამპის ადმინისტრაცია კანადისგან დამატებით დათმობებს ელოდება. წყაროებმა მედიას ინფორმაცია ანონიმურობის დაცვის პირობით მიაწოდეს, რადგან მოლაპარაკებები დახურულ რეჟიმში მიმდინარეობს.
USTR-ის განცხადებით, აშშ-ის სავაჭრო წარმომადგენლის ოფისსა და კანადას შორის ბოლო დღეებში შესაძლო შეთანხმების ზოგად სტრუქტურასა და სხვა სავაჭრო საკითხებზე კონსულტაციები გაიმართა.
ამერიკელი ავტომწარმოებლები იმედოვნებდნენ, რომ სავაჭრო მოლაპარაკებები ვაშინგტონის მიერ თავდაპირველად დაწესებულ 25%-იან ტარიფებს შეამსუბუქებს, რომლებმაც სატრანსპორტო საშუალებებისა და სათადარიგო ნაწილებისთვის საზღვრის გადაკვეთის ღირებულება მნიშვნელოვნად გაზარდა.
აშშ-ის პრეზიდენტმა პარასკევს ხელი მოაწერა ბრძანებას კანადის ზოგიერთ სასოფლო-სამეურნეო და სატყეო პროდუქტზე 50%-იანი ტარიფების მოხსნის შესახებ.
შეგახსენებთ, რომ რამდენიმე კვირის წინ ტრამპმა გამოაცხადა, რომ 2027 წლის 1 იანვრიდან კანადიდან ფოლადისა და ავტომობილების იმპორტზე ტარიფებს 50%-მდე გაზრდის.
