ბერლინში, უკრაინის თავდაცვის საკონტაქტო ჯგუფის რიგით 34-ე შეხვედრაზე, მხარეებმა კიევისთვის დახმარების ახალი პაკეტი შეათანხმეს. შეხვედრის მონაწილეებმა აიღეს ვალდებულება, დააფინანსონ „უკრაინის პრიორიტეტული მოთხოვნების სია“ (PURL) და ჩეხეთის ინიციატივა საარტილერიო ჭურვების შესყიდვის შესახებ. გაერთიანებულმა სამეფომ კი დამოუკიდებლად განაცხადა კიევისთვის 120,000-მდე დრონის მიწოდების მზადყოფნა.
ჯგუფის 34-ე შეხვედრა გერმანიის თავდაცვის სამინისტროში გაიმართა. მოლაპარაკებებს გერმანიის თავდაცვის მინისტრი, ბორის პისტორიუსი და მისი ბრიტანელი კოლეგა, ჯონ ჰილი უძღვებოდნენ. ბერლინში შეხვედრას ესწრებოდნენ უკრაინის თავდაცვის მინისტრი მიხაილო ფიოდოროვი და ნატოს გენერალური მდივანი მარკ რუტე, ხოლო ჯგუფის სხვა წევრები დისკუსიაში ვირტუალურად მონაწილეობდნენ.
შეხვედრის მიმდინარეობისას როგორც პისტორიუსმა, ისე ჰილიმ აღნიშნეს, რომ მიუხედავად იმისა, რომ ახლა მსოფლიოს ყურადღება ჰორმუზის სრუტისკენაა მიმართული, ახლო აღმოსავლეთში მიმდინარე პროცესებმა უკრაინის საჭიროებები არ უნდა გადაფაროს. პისტორიუსმა ბერლინის მიერ აღებული უახლესი ვალდებულებებიც მიმოიხილა, კერძოდ 4 მილიარდი ევროს ღირებულების თავდაცვის პაკეტი, რომელიც ასობით Patriot-ის რაკეტის მიწოდებას, დრონების ერთობლივ წარმოებასა და საბრძოლო მონაცემების ციფრულად გაზიარებას ითვალისწინებს.
თავის მხრივ, უკრაინის თავდაცვის მინისტრმა, მიხაილო ფიოდოროვმა ისაუბრა უკრაინის ძალისხმევაზე, გაზარდოს დრონების შიდა წარმოება და დააჩქაროს მათი მიწოდება ფრონტის ხაზზე. პისტორიუსმა კიდევ ერთხელ დაადასტურა, რომ უკრაინის საჰაერო თავდაცვის გაძლიერება გერმანიის მთავარ პრიორიტეტად რჩება, რისთვისაც კიევი მომდევნო წლებში Patriot-ის ასობით რაკეტას, IRIS-T-სისტემებსა და ერთობლივად წარმოებულ შემტევ დრონებს მიიღებს.
რაც შეეხება გაერთიანებული სამეფოს ვალდებულებას, რომელიც თავდაცვის მინისტრმა ჯონ ჰილიმ გააჟღერა, ის წელს კიევისთვის 120,000 ერთეულზე მეტი დრონის, საარტილერიო ჭურვებისა და საჰაერო თავდაცვის რაკეტების მიწოდებას ითვალისწინებს. აღნიშნული ინიციატივა მხარდაჭერილი იქნება გაერთიანებული სამეფოს ყოველწლიური, 3 მილიარდი გირვანქა სტერლინგის ოდენობის სამხედრო ბიუჯეტითა და ERA-ს (რუსული აქტივებიდან მიღებული მოგების) ფონდებით.
