ფოტო: @exilenova_plus / Telegram
რუსეთში, ვლადიმირის ოლქში, Yandex-ის მონაცემთა ცენტრი სრულად გაითიშა. რუსული სახელმწიფო სააგენტო TASS-ის ცნობით, რომელიც კომპანიის ინფორმაციას ეყრდნობა, შეფერხება სავარაუდო დრონებით თავდასხმას უკავშირდება. ეს ბოლო დღეებში Yandex-ის მონაცემთა ცენტრებზე თავდასხმის მესამე შემთხვევაა.
11 ოქტომბერს Yandex Cloud-მა განაცხადა, რომ ელექტროენერგიის მიწოდების შეფერხება ru-central1-a ხელმისაწვდომობის ზონაში დაფიქსირდა. კომპანიის ცნობით, ტექნიკური გუნდი პრობლემის აღმოფხვრაზე მუშაობდა. მოგვიანებით გავრცელდა ინფორმაცია, რომ ვლადიმირის ოლქში მდებარე მონაცემთა ცენტრის მუშაობა სრულად შეჩერდა.
შეფერხებებმა Yandex-ის სხვადასხვა სერვისის მომხმარებლებსაც შეუქმნა პრობლემები. რუსეთში, ასევე სერბეთში, ყაზახეთში, ბელარუსსა და სომხეთში მომხმარებლები Yandex Go-ს მეშვეობით ტაქსის გამოძახებას ვერ ახერხებდნენ. რუსული გამოცემა Ostorozhno Novosti-ის ცნობით, შეფერხებით მუშაობდა მძღოლებისა და კურიერებისთვის განკუთვნილი Yandex Pro-ც, თანამშრომლებს კი კომპანიის შიდა მხარდაჭერის სისტემებთან წვდომის პრობლემა ჰქონდათ. მომხმარებლები ასევე იტყობინებოდნენ Yandex-ის ჭკვიანი სახლის სერვისების შეფერხების შესახებ.
რუსულმა ASTRA-მ გაავრცელა ინფორმაცია, რომ ვლადიმირის ოლქში დრონებით თავდასხმის საფრთხის შესახებ გაფრთხილების შემდეგ Yandex-ის მონაცემთა ცენტრს ელექტროენერგიის მიწოდება შეუწყდა. უკრაინულ მონიტორინგის არხებში ასევე გავრცელდა ფოტოები, რომლებზეც, სავარაუდოდ, ობიექტთან გაჩენილი ხანძარი ჩანს. მასალების ავთენტიკურობა და ობიექტისთვის მიყენებული ზიანის მასშტაბი დამოუკიდებლად დადასტურებული არ არის.
Yandex-ის მონაცემთა ცენტრებზე მანამდე ორი თავდასხმა მოხდა, რომლებიც კომპანიამ ოფიციალურად დაადასტურა. 8 ოქტომბერს რიაზანის ოლქის ქალაქ სასოვოში მდებარე მონაცემთა ცენტრში დრონებით თავდასხმის შედეგად ხანძარი გაჩნდა, რის გამოც ობიექტის მუშაობა სრულად შეჩერდა. კომპანიამ განაცხადა, რომ ჯერ არ შეეძლო განესაზღვრა, როდის გახდებოდა შესაძლებელი დაზიანებული აღჭურვილობის აღდგენა.
9 ოქტომბერს თავდასხმის შედეგად კალუგის ოლქში მდებარე მონაცემთა ცენტრიც დაზიანდა. გავრცელებული ინფორმაციით, მწყობრიდან რამდენიმე მოდული გამოვიდა, რასაც სერვისების მუშაობაზე გავლენის მოხდენა შეეძლო.
უკრაინის პრეზიდენტმა ვოლოდიმირ ზელენსკიმ 8 ოქტომბერს განაცხადა, რომ უკრაინა რუსეთის მიერ უკრაინულ მონაცემთა ცენტრებზე განხორციელებულ თავდასხმებს პასუხობდა. მან ისიც დასძინა, რომ რუსეთი უკრაინის მონაცემთა ცენტრებზე თავდასხმებს განაგრძობდა.
9 ოქტომბერს გავრცელებულ განცხადებაში Yandex-მა მონაცემთა ცენტრებს თავისი სერვისების კრიტიკულად მნიშვნელოვანი ინფრასტრუქტურა უწოდა და აღნიშნა, რომ თანამშრომლები მათ აღსადგენად მთელი საათის განმავლობაში მუშაობდნენ. 10 ოქტომბერს კი კომპანიამ მომხმარებლის შეთანხმება განაახლა და ფორსმაჟორულ გარემოებებს შორის დრონებითა და რაკეტებით თავდასხმებიც შეიტანა, რაც კომპანიას გარკვეულ შემთხვევებში სახელშეკრულებო ვალდებულებების შესრულებისგან ათავისუფლებს.
Forbes Georgia-ს აღმასრულებელი რედაქტორი
