ამერიკის შეერთებული შტატების სახელმწიფო დეპარტამენტის განათლებისა კულტურის საკითხების მიმართულების ხელმძღვანელმა, მერი როისმა Forbes Georgia-სთან ამერიკის შეერთებულ შტატებში საერთაშორისო სტუდენტებისა და საგანმანათლებლო პროგრამების შესახებ ისაუბრა. როისის თქმით, ამერიკულ სასწავლებლებში სტუდენტთა კორპუსის მრავალფეროვნების ხელშეწყობა სახელმწიფო დეპარტამენტის ერთ-ერთ პრიორიტეტს წარმოადგენს, რისთვისაც არაერთი ტიპის საგანმანათლებლო და საგრანტო პროგრამა არსებობს.
ჰააგაში გამართულ გლობალურ მეწარმეობის სამიტზე სახელმწიფო დეპარტამენტმა 2018 წლის ანგარიში წარადგინა, რომელშიც საერთაშორისო სტუდენტების სტატისტიკა არის ასახული.
2017-2018 სასწავლო წლის განმავლობაში აშშ-მა სულ 1,094,792 საერთაშორისო სტუდენტი მიიღო. ამ სტუდენტების 65%-ის სწავლების საფასურის დაფინანსების უმთავრესი წყარო არა აშშ-ის მთავრობის და უნივერსიტეტების გრანტები, არამედ მათი პერსონალური სახსრები იყო.
ქვეყნების მიხედვით, ამერიკაში ყველაზე მეტი უცხოელი სტუდენტი ჩინეთის სახალხო რესპუბლიკიდან ჩადის, მათი რაოდენობა მთლიანად საერთაშორისო სტუდენტების რაოდენობის 33%-ს შეადგენს. სტუდენტთა რაოდენობის 18%-ით მეორე ადგილზე ინდოეთი, 5%-ით მესამეზე კი სამხრეთ კორეაა.
2017-2018 წელს ამერიკულ უმაღლეს სასწავლებში საბაკალავრო და უფრო მაღალ აკადემიურ საფეხურებზე ჩარიცხული სტუდენტების მთლიანი რაოდენობა 7%-ით გაიზარდა და 597 შეადგინა. ეს უცხოელ სტუდენტთა მთლიანი რაოდენობის 0.05%-ია.
ქართველ სტუდენტთა განაწილება სწავლების საფეხურის მიხედვით ასე გამოიყურება:
საქართველოს მეზობელი ქვეყნების მიხედვით, უცხოელ სტუდენტთა რაოდენობა ასე ნაწილდება:
სომხეთი – 313 სტუდენტი;
აზერბაიჯანი – 426 სტუდენტი;
თურქეთი – 10,520 სტუდენტი;
რუსეთი – 5,518 სტუდენტი;
სახელმწიფო დეპარტამენტის მდივნის ასისტენტის, მერი როისის თქმით, უცხოელი სტუდენტებისთვის აშშ-ში განათლების მიღების მსურველები რამდენიმე ძირითად სირთულეს აწყდებიან, რომელთაგან მთავარი ბარიერები სწავლის საფასური და ინგლისური ენის ცოდნის დონეა. სახელმწიფო დეპარტამენტის მიერ შექმნილი პროგრამები კი სწორედ ამ და სხვა დაბრკოლების გადალახვას ემსახურება.
“ჩვენ გვინდა, რომ ამერიკის შეერთებულ შტატებში სწავლის შესაძლებლობა უფრო მეტ ადამიანს მიეცეს. ეს აძლიერებს ჩვენს უნივერსიტეტებს და იძლევა კარგ ცხოვრებისეულ გამოცდილებას. ამერიკაში განათლების მიღების არაერთი შესაძლებლობა არსებობს, ჩვენ სტუდენტებს ვურჩევთ გამოიყენონ ეგრეთწოდებული 2+2 პროგრამა. ეს შესაძლებლობას გაძლევთ ორი წლის განმავლობაში ისწავლოთ სახელმწიფო უნივერსიტეტში, ხოლო ორი წლის შემდეგ კი სხვა სასწავლებელში გადაინაცვლოთ. 2+2 პროგრამა არის კარგი საშუალება იმისთვის, რათა სწავლის საფასურის შემცირება მოახდინოთ,”- ამბობს როისი.
საერთაშორისო სტუდენტების რაოდენობის მიხედვით, პირველ ადგილზე ჰარვარდი იმყოფება. ტოპ 10 უნივერსიტეტი უცხოელ სტუდენტთა რაოდენობით ასე გამოიყურება:
ჰარვარდის უნივერსიტეტი – 5,023 სტუდენტი;
სტენფორდის უნივერსიტეტი – 3,615 სტუდენტი;
კალიფორნიის უნივერსიტეტი – 3,411 სტუდენტი;
კოლუმბიის უნივერსიტეტი – 3,243 სტუდენტი;
კალიფორნიის უნივერსიტეტი – ბერკლი – 3,170 სტუდენტი;
მიჩიგანის უნივერსიტეტი – 3,014 სტუდენტი;
ჯონს ჰოპკინზის უნივერსიტეტი – 2,787 სტუდენტი;
კალიფორნიის უნივერსიტეტი – სან დიეგო – 2,778 სტუდენტი;
იელის უნივერსიტეტი – 2,684 სტუდენტი;
მასაჩუსეტსის ტექნოლოგიური ინსტიტუტი – 2,282 სტუდენტი.
აკადემიური მიმართულებების მიხედვით, სტუდენტთა 33% ზუსტ და საბუნებისმეტყველო მეცნიერებების ფაკულტეტებზე სწავლობს, 17% ინჟინერიის მიმართულებაზე, 14.6% ჯანდაცვის, 7.1% კი სოციალური მეცნიერებების მიმართულებაზე.
ბიზნესს საერთაშორისო სტუდენტების მხოლოდ 3.2% სწავლობს.
ამერიკის შეერთებული შტატების ვაჭრობის დეპარტამენტის სტატისტიკის მიხედვით, გასულ წელს საერთაშორისო სტუდენტების ჯამური კონტრიბუცია ქვეყნის მთლიან შიდა პროდუქტში $48 მილიარდი დოლარის ტოლი იყო.
